¹ Agora ben, en canto á ofrenda para os irmáns, facede vós tamén como lle dixen ás igrexas da Galacia: ² cada primeiro día da semana, cada un de vós aparte algo, aforrando daquilo que teña gañado, para que cando eu vaia non teñades necesidade de facer colectas. ³ E, cando chegue, a aqueles que vós aprobedes, mandarei con cartas para levaren a expresión da vosa bondade ás igrexas de Xerusalém. ⁴ E se paga a pena que vaia eu tamén, eles virán comigo. ⁵ Irei onda vós cando atravese Macedonia, pois preciso pasar pola Macedonia. ⁶ Pode ser que me quede convosco, se cadra todo o inverno, para que me axudedes na viaxe onde teña que ir. ⁷ Pero non vos quero ver só de paso, pois se o Señor o permite, quero quedar algún tempo convosco. ⁸ Polo de agora, quedarei en Éfeso ata Pentecostés, ⁹ pois abríuseme unha porta grande e frutífera, aínda que hai moitos que están a poñer atrancos. ¹⁰ Cando chegue Timoteo, mirade que estea convosco sen problemas, porque el traballa na obra do Señor coma min. ¹¹ Polo tanto, que ninguén o teña en pouco, ao contrario, axudádeo na viaxe para que volva a min cheo de paz, porque o estou agardando cos irmáns. ¹² En canto ao noso irmán Apolos, animeino moito a que fose onda vós cos irmáns, pero de ningunha maneira tivo o desexo de ir polo de agora; porén irá cando teña oportunidade. ¹³ Vixiade, estade firmes na fe, portádevos dun xeito valente, sede fortes. ¹⁴ Facede todas as cousas con amor. ¹⁵ Pídovos irmáns (xa sabedes dos da casa de Estéfanas, os primeiros convertidos da Acaia que se adicaron a servir aos irmáns) ¹⁶ que vos poñades á disposición deles e de todos os que traballan e serven aos demais. ¹⁷ Estou moi alegre coa visita de Estéfanas, de Fortunato e de Acaio, pois axudáronme a vencer a morriña que tiña por vós. ¹⁸ Refrescaron o meu espírito e mailo voso; dádelle valor sempre a persoas así. ¹⁹ Mándanvos recordos as igrexas da Asia. Saúdanvos con moito agarimo no Señor, tanto Aquila como Prisca, do mesmo xeito que a igrexa que está na súa casa. ²⁰ Saúdanvos todos os irmáns. Saudádevos uns aos outros cun bico santo. ²¹ Eu Paulo, saúdovos, escribíndovos coa miña propia man. ²² Se algún non ama ao Señor, sexa maldito! ²³ O Señor vén! A graza do Señor Xesús sexa convosco. ²⁴ O meu amor sexa con todos vós en Cristo Xesús.