¹ Paruvede runya, Mona Hompa wamumati ogho ngapititiro vantu, ngamoneka. Ngapakara ruvede rwarudito oro rwadiliro kukara kuntamekero ya kehe shirongo. Pashirugho shinya vantu ngavava yoghora, kehe uno ngavawana lidina lyendi valitjanga mumbapira. ² Vavangi ovo vararo mumbundu ya livhu ngavarambuka, vamwe kuliparu lyanaruntje ano vamwe kulishwaghu na kuudona. ³ Kovo vakaro naukonentu ngavavenbera yira ntungwedi kuliwiru, ntani ovo ngava shighuro vavangi kuuhungami yira ntungwedi naruntje na naruntje. ⁴ Ngoli ove, Daniel, fuka ngango odo; rayima mbapira oyo dogoro kuuhura waruvede. Vavangi ngavaduka pano na panya, ntani ukonentu ngaukuwederera.'' ⁵ Makura, Daniel, akankuka, amono vamwe vavili vanayimana. Umwe kwayimanine kuntere yino ya mukuro, ano umwe kwayimanine kuntere yinya ya mukuro. ⁶ Umwe wavo aghamba kuvakafumu vanya vadwatiro mumakeshe ghakuvembera, umwe ogho akaliro pantunda ya mukuro, ''Shirugho sha kutika pani dogoro kuuhura wavishoroka vyaviwa ngoli. ⁷ Ani yuvhu mukafumu ogho adwatiro mulikeshe lyakuvembera, ogho akaliro pantunda ya mukuro- ayerura lihoko lyendi lyarulyo lihoko lyendi lyarumontjo muuntungi wamuliwiru ntani shitjangwa naumwe ogho aparuko naruntje ngavikara vyapashiruwo tupu, mumaruvede, ntani nakashiruwo kakadidi tupu. Unankondo wa vantu vakupongoko ngavautjorapo, vininke navintje ovyo ngavipwapo. ⁸ Aniyuvu, ngoli kapi navikwatire lighano. Makura anipura, ''Ntilyande, ashi vinke vivuro kukara vitundwamo vya vininke ovyo?'' ⁹ Aghamba, ''Yenda nandjira yoye, Daniel, mbyevishi nkango vanayihara ntani vanafikiliri dogoro kushirugho shakuhulilira. ¹⁰ Vavangi ngavavakenita, kuvakusha, ntani na kuvawapita, ngoli vadona ngavaruwana udona. Kudereko mudona ngavikwato lighano, ngoli vakonentu ngavavikwata lighano. ¹¹ Kutundilira pashirugho shinya sha ndjambo ya lishwakerero vayighupapo ntani udona ogho wayititopo lidjonauko vaghuturapo, ngagha kara mayuva 1,290. ¹² Mutungwika ndjegho ngataterero dogoro kughuura wa mayuva 1,335. Ngauyenda nandjira yoye dogoro kuuhura, ntani ngaupwiyumuka. ¹³ Ove ngaumoneka mulivega olyo vakutumbwidira, kuura wa mayuva ogho.''