¹ Mumwaka wakuhova wa Darius muhameni, ame naumwande nakwatitireko kumwe na kupopera Michael. ² Weno kuni kutantera ushiri. VaHompa vatatu ngava tundilira mu Persia, ntani umwe wavo waune ngakara ngagho kupitakana vaunyendi. Opo ngawana una nkondo wamughungagho wendi, ghuye ngatapa mukumo kwakehe uno ngavataparare untungi wamu Greece. ³ Hompa wangondo ngamoneka ogho ngapititiro untungi waunene po, ntani ghuye ngapititira kutwara kushihoro shamwene. ⁴ Palimoneko lyandi, untungi wendi ngaukutaura kumwe nakukugaununa kumaruha mane gha mpepo yaliwiru, ngoli kapishi kumuhoko wendi, ntani nka kapishi na unankondo akalire apa apititilire. MuUntungi wendi ngavauhupamo vaunyendi kuupako vamuhoko wendi. ⁵ Hompa waku Ucuma ngakara nkondo, ngoli ghumwe wamukavita kurona wendi ngakara nkondo kumupitakana ntani ngapangera. Lipangero lyendi ngalikara lipangero lyalinenepo. ⁶ Kunyima ya mwaka dadisheshu, apa ngarutikamo ruvede, makura vavo ngavakukwatakana. Mona kadi wa Hompa waku Ucumu ngaya kwa Hompa waku Umboyera mukuyakuyuva likukwatakano. Ngoli ghuye kapi ngaremka mahoko ghendi ghakare naunankondo, ndi ashi ngayimane, ndi po ashi mahoko. Ghuye ngava mushweneka-kumwe navaunyendi ovo ngava muyito, na vashe, kumwe navo ngava mukwatitoko muruvede oro. ⁷ Ngoli ruha rumwe mumpo yendi ngarumoneka mulivega lyendi. Ngahomono vakavita kumwe nakungena mulipangero lya Hompa waku Umboyera. ngava rwita, ntani ngavavena. ⁸ Ngakwata vaKarunga vavo, kumwe navikuwo, ntani naupungwiro wavo wa ngorodo na siliveri, kumwe nakuvitwara ku Egipite. Mumwaka dangandi ngakara ure na Hompa wa kuUmboyera. ⁹ Makura Hompa waku Umboyera ngaghupa lipangero lya Hompa waku Ucuma, ngoli ngalipakerera kulivhu lyendi. ¹⁰ Monendi wamukafumu ngakuwapayikira mukupongeka vakavita vankondo. ngavaya nankondo mukuyahupa navintje; ngavapita mundjira nadintje dogoro kuUntungi wendi. ¹¹ Makura Hompa waku Ucuma ngagarapa unene; makura ngayenda akamurwanite, Hompa waku Umboyera. Hompa wa KuUmboyera ngaturapo vakavita vankondo une, ngoli vakavita ngavavatapa mulivhu lyendi. ¹² Vakavita ngavava ghupamo, ntani mutjima wa Hompa wa kuUcuma ngava ghuhafita, makura ngarenka mayovi murongo vaweko, ngoli kapi ngakara mufundi. ¹³ Makura Hompa wa kuUmboyera ngaturapo nka vakavita, vankondo kupitakana vakuhova. Muruku rwa mwaka dadishehsu, Hompa waku Umboyera ngakara navakavita vankondo ovo ngava karo navirwita vyavingi. ¹⁴ Muruvede oro vavangi ngavahomokera Hompa wa kuUcuma. Vana vavakafumu vanyanya mukatji kavantu voye ngavakupongayika mukutikita mo lirwameno, ngoli kapi ngavavitikitamo. ¹⁵ Hompa wa kuUmboyera ngaya, nakukundurukida ndundu, kumwe nakudikako likuma. Vakavita vaku Ucuma kapi ngavavura kuyimana, nampili vakavita vavo vankondo navoshi. Kapi ngavakara nankondo dakuyimana. ¹⁶ Ovo ngavamutapararo ngavaruwana yira moomo avi shanena, ntani kwato ogho ngayimano mundjira yendi. Ghuye ngakara mulivega lyaliwa, ntani lidjonauko ngalikara mulihoko lyendi. ¹⁷ Hompa waku Umboyera ngaya naghu nankondo kumwe nambara yendi nayintje, ntani kumwe naye ngapakara likuyuvatano omu ngavagwanekera kumwe na Hompa waku Ucuma. Ngatapa monendi wamukadona munkwara ogho ngadjonauro Untungi waku Ucuma. Ngoli lifanayiko kapi ngalitikamo ndi ashi limuvatere. ¹⁸ Kunyima yavi, Hompa waku Umboyera ngakara anavangara kumavega hakulifuta ntani ngakwata vavangi vako. Ngoli mukurona wavakavita ngakara nalikuyuvo olyo ngalirenkito likuyuvo olyo ngalimuvyukire mwene. ¹⁹ Makura ngavangarara kuukavita wamulivhu lyendi, ngoli ngapunduka ngawa; kapi ngavitikitamo. ²⁰ Makura umwe ngatunda mulivega ogho ngaghupo mutero kupitira muvantu vatape mauwa kuuntungi. Ngoli kumayuva ghakumeho ngaghatjokapo, ene ngoli kapishi muugara ndi ashi mumarwanambo. ²¹ Mulivango lyendi ghuye ngaturapo muntu umwe ogho vadira kupa ghunankondo walifumadeko; ghuye ngaya pahana kuvitaterera mukuya ghupa untungi pa mayere. ²² Vakavita ngavavakushapo yira ruhandjo kumeho yendi. Navantje vakavita kumwe navakurona palikugwanekero ngavava djonaurapo. ²³ Pashirugho shinya mbunga ayi totirepo, akare kuna kupukita; kumwe nakambunga kakadidi tupu ngawanenepo unankondo. ²⁴ Aghana kupukurura ghuye ngangena kumarugha ghamwe ghalipititiro, makura ngaruwane evi vadilire kuruwana vashe ndi ashi vashe va vashe. Makura ngatapere vakwami vendi vininke evi ngava hupa kapishi paveta, vya kuvaka, ntani naghu ngawo. Ngakuwapayikira mukughupako kughukavita, ngoli pakashirugho tupu. ²⁵ Ghuye ngaturapo ghuna nkondo ntani mumutjima wendi ngataparara Hompa waku Ucuma navakavita vankondo unene. Hompa waku Ucuma ngafutira mbunga yayinene na vakavita vankondo unene, ngoli kapi ngavavura kuyimana mukondashi vaunyendi ngavamuhulita livega mukumutaparara. ²⁶ Nampili mbovo valyango ndya dendi dadiwa ngavamutaparara. Vakavita vendi ngavavakushapo yira ruhandjo, ntani vavangi ngava vadipagha. ²⁷ Navantje vaHompa ovo, mudimutjima davo navantje kuna kukughayarera udona, ngoli kapi ngavaikara vinke vya mulyo. Pakughulilira shirugho ngashitikamo osho vaturapo. ²⁸ Makura Hompa waku Umboyera ngavyuka mulivhu lyendi naghu ngawo waunene, mumutjima wendi ghuye kunaditaparara vantu vakupongoka. Ngaviruwana makura ghuye ngavyuke mushirongo shendi. ²⁹ Pashirugho shamatokoro ghuye ngavyuka makura ngakaye mukuyataparara vaUcuma nka. Ngoli shirugho shino kapi ngashikara yira shakughova. ³⁰ Shikepa sha Kittim ngashi mutaparara, ntani ngakara naghoma. Ghuye ngakavyuka ntani ngakara naugara mukutaparara vantu vakukukwatakana muupongoki, makura ngaruwaneko shintu. Ngakavyuka nakuyanegheda shihoro kovo ghashuvilire mulikukwatakano lya kupongoka. ³¹ Vakavita ngavashapuka na kudira kukughamitira kuntembeli. Ngavashayikitapo ndjambo ya kehe liyuva, ngavaturapo shidira osho ngashiyititopo lidonganito lyene lyene. ³² Kovo varuwanino udona mukutaparara likukwatakano, ngavapukita na kuvadjonaura. Ngoli vantu ovo vayivo Karunga wavo ngavakara naunankondo kumwe nakuruwanako shintu. ³³ Ovo vanakaro mukatji kavantu vakaro naukonentu ngavarenka vavangi vayuve. Ngoli ngavakuganda kumarufuro nakumundiro; ngavakara vanadorongo ntani ngava vavaka mumayuva ogho. ³⁴ Mukupira nkondo kwavo, ngavavatera nalivatero lyalididi. Mukukukitaukira kwavo vavangi ngavavahamena. ³⁵ Vamwe ovo vakaro naukonentu ngavakupundura mposhi ovyo ngavishoroko ngava vaghupemo, ngavavakusha, ntani na kuvakenita, dogoro kuuhura waruvede. Shirugho shalitumbwidiro shimpe ngashiya. ³⁶ Hompa ngaruwana kutwara likuyuvo lyendi. ghuye ngakunenepeka nakukuyerura mwene kupitakana vakarunga navantje. Mukutaparara Karunga wava Karunga mughamba vighamba vyakutetukita, ghuye ngavitikitamo dogoro ugara ngautikemo. Kovyo atokora ngavitikamo. ³⁷ Kapi ngatamburako vaKarunga vavasha vavo, nampili Karunga ogho vahora vakamali, ndi ashi ngatambureko kehe uno Karunga wapeke, ngoli ngakunenepeka naumwendi kupitakana navantje. ³⁸ Ghuye ngafumadeka Karunga wavakavita mulivega lyevi. Karunga ogho vadilire kuyiva vashe ashi ngavamufumadeka na ngorodo ndi siliveli, na mawe ghaufughuli navinke vimwe vya ufughuli. ³⁹ Ghuye ngahomona kamba da nkondo naKarunga wantunda virongo. Kwa kehe uno ngamutamburo, gvhuye ngamufumadeka unene. Ghuye ngavarenka vakare vapangeli vavantu vavangi, makura ngagaunune livhu murupe rwamfuto. ⁴⁰ Kuuhura washirugho, Hompa waku Ucuma ngahomona. Hompa waku Umboyera ngamudonganita namatemba ntani navarondi vankambe ntani navikepa vyavingi. Ngataparara virongo, mukuvahandjitira, kumwe nakupita. ⁴¹ Ghuye ngayenda mushirongo shashiwa, na dimurongo da mayovi gha vaIsraeli ngava wako. Ngoli ovo ngavashenduko muliwoko lyendi: Edom, Moab, ntani nava vakuhupako vantu vaAmmon. ⁴² Ghuye ngahonyonona mawoko ghendi muvirongo; Shirongo sha Egipte kapi ngavashiyoghora. ⁴³ Ngapangera ushwi wa ngorodo na siliveli, ntani navinke navintje vyaufughuli vya muEgipte; Va Libyans na va Cushites ngava kwama mumbadi yendi. ⁴⁴ Ngoli mbudi yaku Upumeyuva na Umboyera ngayimutukukita, makura ngayenda naugara waunene mukakadjonaurapo nakukatura vavangi mulidjonauro. ⁴⁵ Ngakatulitapo tende yauhameni wavatungimo pakatji kamafuta nandundu yauwa wavapongoki. Ngatika kuuhura, ntani kapi ngakukara mupopore wendi nampili umwe.