¹ Okutja otji u hina maepero, arikana mundu, nangarire kutja oove une tji mo pangura: orondu mu itji ove tji mo pangura o mukuenu, ove mo ri pangura o muini; orondu ove ngu mo pangura u tjita ovina o tjingevio. ² Nunguari ete matu tjiua kutja o mbanguriro ja Mukuru, iri mo ngaro jo uatjiri ku imba mbe tjita o vina o hamukueena imbio. ³ Nambano, arikana mundu, ngu u pangura imba mbe tjita ovina mbi nu ove uina au vi tjita, u ripura kutja ove mo jepe o mbanguriro ja Mukuru? ⁴ Poo ove u njengurisa o rutumbo ruo unjanutima, no ndaro onde, no muretima Ue, no ku hina ndjiviro jo kutja u tjitira oku tuara ove ko meriverero uo ndanaukiro? ⁵ Nunguari otja ko makukutiro no meheriverero uo mutima uoje, u ri puikira o mazenge o muini, ue juva ro mazenge no mavandururiro uo mbanguriro o samba ja Mukuru; ⁶ Ngu me je ku jandja ku auhe otja ko vitjitua vie: ⁷ Ku imba mbe paha o ujere, no ndjozikiro, no ku hina ku zundaka amave ungura ouua noku hina tjiruejo, o muinjo uaaruhe: ⁸ Nunguari ku imba mbe ri o va tuimise vo zombata, nu mbe hina nduviro ko uatjiri, nunguari mbe kongorera o uhasemba, ma jandja o mazenge no mapindi, ⁹ O mbamisiro no mihihamo ko muinjo uo mundu auhe ngu tjita o uvi, uo Mujuuta rutenga na ko uo Viuana uina. ¹⁰ Nunguari ma jandja o ujere, no ndjozikiro, no hange ku auhe ngu tjita ouua, ko Mujuuta rutenga na ko uo Viuana uina. ¹¹ Orondu ku Mukuru kapena ndengero jo mirungu. ¹² Orondu avehe imba mba katuka no ku hina Veta, mave pandjara noku hina Veta: Nu avehe imba mba katuka ko Veta mave pangurua mo Veta. ¹³ Orondu ka va zuve vo Veta mberi o vasemba po murungu ua Mukuru nunguari imba mbe tjita o Veta mave sembamisiua. ¹⁴ Orondu imba ovo Viuana mbe hina Veta, tji mave tjiti mongaro jo undu o vina mbiri mo Veta, ovo ave hina Veta, o veta kuvo o veni; ¹⁵ Mbe raisa o vitjitua vio Veta mbia tjangua mo mitima viao, o urizemburuka uao uina a ma u ve hatoirire, nu o uripura uao ama u ve vara o vanandjo poo o ve hina ndjo), ¹⁶ Me juva indi Mukuru ndi meje ku pangura o viundikua vio vandu, otja ko mbuze ombua jandje. ¹⁷ Tara, u isaneua o Mujuuta, ue rijameka ko Veta, nu u rihiva na Mukuru, ¹⁸ Nu u tjiua o mbango Je, nu u jandja ondengu ko vina imbi mbiri o visemba tjinene, otja tji ua hongua oku za mo Veta; ¹⁹ Au no ngamburiro ndja zikama move omuini kutja o ove o mutike uo vapotu, o ndjerera ku imba mbe rim o ndorera, ²⁰ O mutumbure uo majova, o muhonge uo unatje, ngu una o muano uo ndjiviro no uo uatjiri mo Veta. ²¹ Ove ngu hongo ovakuenu, ko rihongo o muini? Ove ngu zuvarisa kutja o mundu ka sere oku vaka, ove u vaka? ²² Ove ngu mo tja o mudu kasere oku katuka ko oruvakero, ove u katuka o ruvakero? Ove ngu ua tonda o visenginina, ove u punda o zondemberi? ²³ Ove ngu u rihiva no Veta, ove u tengurura Mukuru noku katuka ko Veta? ²⁴ Orondu ena ra Mukuru ri jambururua mokati ko Viuana motjimbe tjenu, otja tji pa tjangua. ²⁵ Orondu o masukarero je vatera tjiri, tji u takamisa o Veta: nunguari tji uri o mukatuke uo Veta, o masukarero uoje je rira o mahasukarero. ²⁶ Nu nambano, inga o mahasukarero tji ma je takamisa o usemba uo Veta, o mahasukarero ue ka jena ku varua otjo masukarero. ²⁷ Nu o mahasukarero ngeri mo ngaro jo undu, tji maje jenenisa o Veta, ka jena ku pangura ene, mbu mu katuka ko Veta mo matjangua na mo masukarero. ²⁸ Orondu eje ka Mujuuta ingui ngu ri nao pendje; nu uina ka masukarero inga ngeri pendje mo njama: ²⁹ Nunguari o Mujuuta eje ingui nguri nao mo ukoto, nu o masukarero ouo inga ouo mutima, mo mbepo, nu ka uo mo matjangua; inga ouo ndangero ndji heri o jo vandu, nunguari ndji za ku Mukuru.