¹ Paulus, o mukarere ua Jesu Kriste, ngua ianeua otjo muapostele, ngua puraurirua Ombuze Ombua ja Mukuru, ² (Ndja kuizikire ko murungu uo ruveze mo vaprofete Ve mo Matjangua o Majapuke), ³ O hunga no Muna Ue Jesu Kriste o Muhona uetu, mo njama ngua zire mo ndui ja David, ⁴ Ngua hakerue otjo Muna ua Mukuru no masa, otja ko Mbepo jo ujapuke, no mbendukiro mo vati; ⁵ Mu Je mu tua jakura o tjari no u apostele, oku jeta o viuana avihe ko nduviro mo ngamburiro mena Re; ⁶ Mokati kavo uina mu muna ene, mbu muri imba mba isanenua pendje i Kriste: ⁷ Ku imba avehe mberi mo Rome, mba suverua i Mukuru, mba isaneua oku rira o vakambure. O tjari ku ene, no hange oku za ku Mukuru Tate uetu, na Muhona Jesu Kriste. ⁸ Rutenga me tja o kuhepa ku Mukuru mu Jesu Kriste mena renu amuhe, o ngamburiro jenu tjinga ai serekarerua mo uje auhe. ⁹ Orondu Muhona o hatoi jandje, ngu mbi karera no mbepo jandje mo Mbuze o Mbua jo Muna Ue, kutja hi kuramisa oku hongonona ene ¹⁰ Aruhe mo zongumbiro zandje, a me ningire kutja tji ma pe urika, rumue nai kombunda jo ruveze orure, me kara no ujenda o upue mo mbango ja Mukuru oku ja ku ene. ¹¹ Orondu mbi zera oku mu muna, kutja mbi jandje ku ene o tjijandjeua tjimue tjo mbepo, kutja mu zikamisiue; ¹² O kutja, a mi na ene tu huhminiue pamue mo ngamburiro jetu atuhe, o jenu no jandje. ¹³ Nambano hinee kara noku hina ku mu tjivisa vakuetu, kutja po tuingi mba tandere oku ja ku ene, nunguari mba tjaerua ngamba; kutja mbi kare no vihape mokati kenu uina tjimuna mo viuana viarue. ¹⁴ A mi mbiri kehi jo ndjo ko Vahirika no ko viuana viarue, ko zonongo na ku mbe heri o zonongo. ¹⁵ O kutja, otja tji peri mu ami, mbe ri rongerera oku zuvarisa o Mbuze o Mbua uina ku ene mbu mu ri mo Rome. ¹⁶ Orondu ami hi tisiua i jo Mbuze o Mbua ja Kriste o honi, orondu ojo o masa ua Mukuru koku jama ingui auhe ndu ma itavere; rutenga ko Mujuuta nu uina ko Muhirika. ¹⁷ Orondu mu jo o uesemba ua Mukuru u vandururua oku za ko ngamburiro oku jenda ko ngamburiro, otja tji pa tjangua, “O mutakame ma hupu mo ngamburiro.” ¹⁸ Orondu o mazenge ua Mukuru ja vandururua oku za Mejuru o hunga no ku hina Mukuru akuhe, no uhasemba uo vandu, mbe ninikiza o uatjiri no uhasemba, ¹⁹ Orondu ovina imbi mbia soku tjiukua o hunga na Mukuru via vandururua o ukahu mo ukoto uao, Mukuru tjinga ae vi vandurura kuvo. ²⁰ Orondu ovina Vie o vihamunika, okutja o masa Ue uaaruhe, no Umukuru Ue, vi munika o ukahu mo uje mbua mema, navi pangunuka mo vina mbia ungurua; Okutja ovo otji ve hina tji mave tara mo. ²¹ Orondu ovo nandi va tjivirue Mukuru, kave Mu hivirikire otja Mukuru, poo okutja okuhepa. Nunguari ovo va kara o mungandjo mo uripura uao, no mutima uao o mujova au zorerisiua. ²² Ovo va rira o majova, ama ve rihee o veni kutja o zonongo, ²³ Nave tanaurire o ujere ua Mukuru ngu ha zundara ko tjiserekarera tji tja ungurirua mo saneno jo mundu ngu zundara, no jo zondera, no vipuka mbi jatera ko vikoti vine no vina mbi kunguzuka. ²⁴ Nu Mukuru otje ve jandja ko uhakohoke mo zonduma zo mitima viao oku tengurura o tutu tuao mokati kao oveni. ²⁵ Orondu ovo va tanaurira o uatjiri ua Mukuru ko tjizeze, no vo ve rikotamena nave karere otjina tji tja memua oku kapita ingui o Mumeme ngua serua o ndaja ngaaruhe. Amen. ²⁶ Mena ra itji Mukuru Ue ve jandja ko zonduma zo urunde. Orondu no vakaendu vao va tanaurira ongaro ja hapo ku indi ndji heri o ja hapo. ²⁷ Mo muano o tjingeuo uina o varumendu, va jesa ongaro ja hapo joku ungurisiua ko vakaendu, nave ruku oku tirasana o hura, ovarumendu no varumendu ama ve ungura o vizepaisa honi, nave jakura muvo oveni o tjisuta tji tja puira o ndataiziro jao. ²⁸ Novo otja tji ve ha muine a ku ri naua kutja ve kare na Mukuru mo ndjiviro jao, Mukuru otje ve jandja ko ndunge jo urunde oku tjita o vina mbi he ri o visemba, ²⁹ Ave urisiua no uhasemba auhe, oruvakiro, ourunde, o minenetima, o zondjambu; ve ura neruru, omazepiro, okuposa, ovineja, ovikaro o vivi, otujambo, ³⁰ Okuhororasana, o vanjengue va Mukuru, overitongamise, ove ritange, o va ute vo vina o vivi, ove hina nduviro ko vakuate, ³¹ Ka ve pangununa, ve teja o zonduvasaneno, kave na unjanutima, kave na tjari, ³² Ovo, nangarire tji vena o ndjiviro jo veta ja Mukuru, jo kujta imba mbe tjita o vina mbi va puirua i jo ndiro, kakutja ve vi tjita o veni uriri, nunguari ve na o njune mu imba mbe vi tjita uina.