¹ Ja̧'hua̧nö̧ ja̧'a̧ pi̧yȩ ji̧na̧'a̧ David röji ucuocuinömä - Isaí i̧tti̧ Davidmä rö̧ä̧nä̧ ttucuotinäcu̧, ja̧u̧mä̧ Jacob minä Ö̧Ä̧NÄ̧HUA̧ pojopö ȩmi̧nä̧cu̧, Israelttö ttesehuächi'önä ra̧huä̧huä̧ i̧sa̧ ji̧na̧'a̧. ² TÖ̧Ä̧NÄ̧HUA̧ a̧'cua̧ru̧hua̧mä̧ ttönä ucuocuinö, ja̧'hua̧ta̧'a̧nö̧ i̧huȩnȩmä̧ chi̧nȩnä̧ ki̧na̧'a̧. ³ Israel ttö̧ja̧ TÖ̧Ä̧NÄ̧HUA̧mä̧ ucuocuinö̧ Israel ttö̧ja̧ ttido'quimä päinäcu̧sä̧: Jueö huȩnȩmä̧ ruhuo ttö̧ja̧rö̧ hue'ömä, TÖ̧Ä̧NÄ̧HUA̧rö̧ ye'ecunö hue'ö. ⁴ Ja̧u̧mä̧ mo̧ro̧ päia'a ajiya isoppa juiyö mo̧ro̧ kä̧hua̧ räo'omenä tejäda'a jä̧'i̧nö̧'a̧nö̧ jä̧cua̧, ajiya ichö o'ca'a kä̧hua̧ tejädi'omenä rȩjȩttö̧ isä'cua bahuia'a jä̧'i̧nö̧'a̧nö̧. ⁵ Iso päi'önä̧tä̧, ¿Ttö chahuaruhuä mä̧cö̧ ja̧'a̧ pitömä̧ Dios ä'cajo̧mettö̧mä̧? ¿Cuiyöttömä̧ chi̧yä̧cua̧jä̧ pä'ocö pinö̧ ttörö, o'cajuiyönä̧ adiunä̧tä̧ hueyecujuiyönä̧? Ja̧u̧ mä̧cö̧ ja̧'a̧ ttö chö̧ji̧pö̧nä̧ ppä'dinö̧mä̧ ja̧hua̧ta̧'a̧nö̧ pa̧'a̧nö̧ ji̧ya̧ttö̧hué pädö'inä̧ jȩpö̧mä̧? ⁶ Ja̧hua̧nö̧ ja̧'a̧nä̧ suronä̧ huottömä̧ o'catoi'önä̧ so̧ä̧cä jä̧i̧nö̧'a̧nö̧ huotö u̧micu̧ rä'epö icuähuotö jahuätömä̧ ȩmä̧huoco̧tö̧ ttadita huetta pä'ö'inä̧. ⁷ Ya̧te jahuätörö me'ö̧mä̧ meö̧'a̧nö̧ ja̧'a̧ cuoräunä̧tä̧ ja̧hua̧nö̧ jö̧ juiyöttömä̧ dacuä̧'chu i̧so̧'quȩnä̧tä̧. Jahuätömä̧ kutä tticu'anö̧ huotö tto̧jo̧cuo̧mettö̧tä̧." ⁸ Pitö ji̧na̧'a̧ su̧ro̧da̧u̧ umätö̧ David umöhuäyotö huo̧juȩcuo̧tö̧mä̧: Joseb Basebet Tacmo ttö̧ja̧ jahuätömä su̧ro̧da̧u̧ huo̧juȩcu̧nä̧ huotö ttu̧ru̧hua̧ ji̧na̧'a̧. Ja̧u̧mä̧ koronö mo̧ro̧ päi'omenä 800nö umätö̧rö̧ cuä'ö icuinö. ⁹ Ja̧u̧nu̧ o'comenä ki̧nö̧ Eleazar Dodo i̧tti̧, Aho ttö̧ja̧ tti̧tti̧, huämetucuä huotöttö ya̧tȩ ju̧ru̧hua̧ David umöhuä̧ya̧. Ja̧u̧mä̧ juȩnȩtä̧ ki̧nö̧ jahuätö filisteo ttö̧ja̧ ca̧ca̧cui̧pö̧ pättä'chäcuähuomenä tturohuähua pä'ö ja̧'hua̧ta̧'a̧nö̧ Israel ttö̧ja̧mä̧ juhuorö ppa̧ttä̧chä̧ji̧ o'ca'a. ¹⁰ Eleazar ä̧rä̧mi̧'ö̧ ja̧'hua̧ta̧'a̧nö̧ filisteos ttö̧ja̧cu̧ rohuähuinö umö'inä 'cuächi'önä ja̧'hua̧ta̧'a̧nö̧ ucurä'chumä umönä 'chu̧huä̧rä̧nö̧. TU̧RU̧HUA̧ ja̧u̧nu̧ mo̧ro̧ rohuäu ujurunä jȩpi̧nö̧. Su̧ro̧da̧u̧mä̧ ppa̧'ä̧chi̧nä̧tö̧. Ja̧u̧nu̧ o'comenä Eleazar, tto'co jähuä ttö̧ca̧ca̧ta̧ pä'ötä ppa̧'ä̧chi̧nä̧tö̧. ¹⁵ Ja̧hua̧nö̧ ja̧'a̧ Davidmä riänä ajiya ahua a̧di̧rijä̧chiäcu päi'nö:"Ya̧tȩ Belén ötahuiyänä ka̧ju rejuttö ajiya chahua pä'ö i̧ya̧cua̧sä̧, doächäcuähuomȩ ka̧'a̧ reju ajiya acuäjumä!" ¹⁶ Ja̧hua̧nö ja̧'a̧ttö Filisteos su̧roda̧unä päi'ö doächö baepinätö̧ huä̧mȩtucuä umätö juruhuätömä̧ ja̧hua̧nö ja̧'a̧ttö Belén ötahuiyä doächäcuähuome käju rejuttö ajiya ȩminä̧tö. Ja̧hua̧nö ja̧'a̧ttö jahuätömä̧ ajiya ȩmäjä̧tö̧'cotö Davídrö ȩpö̧ iyinätö, ja̧hua̧nö̧ ja̧'a̧nä̧ ahua pä'ö kö'cocö pinö. ttahuajueimä, U̧RU̧HUA̧ iminätä toinö. ¹⁷ Ja̧unö̧ o'ca'a päinö: Pi̧yȩmä oto ja̧'a̧ ttörömä CHU̧RU̧HUA̧, ttö pi̧yȩ chahua päömä.¿Chauttömä ttidepänä suräui̧huätö ttucuoja jäi̧nö'a̧nötä̧ ja̧'a̧?"Ja̧hua̧nö ja̧'a̧ttö̧ ahua päocu pinö. Umä̧tö̧ huä̧metucuä juruätö jȩttäji jina̧'a̧ ja̧uja̧jimä. ¹⁸ Abisai Joad i̧jä̧hua̧ Sarvia i̧tti̧. Ja̧u̧ jina̧'a̧ huä̧metucuänö huotö tturuhua̧ pinömä̧. Jaumä yautenä rohuäu 'chänö cuä'ö icuinö trescientonö huotörö.Ja̧umä̧ pajimä̧ huä̧metucuä su̧ro̧da̧uru ppa̧'a̧dö̧ oä'chinö̧. ¹⁹ ¿Ja̧umä̧cö tä̧ji̧ huä̧metucuä huotöttö juiyo u̧cuohua̧mä̧? Ja̧umä tturuhuä päiönä jea̧ pä'ö 'chi̧nö. Ucuohuajuimä yoretehuo ca'ajina'a ttocoumä huä̧metucuä su̧roda̧utä juiyo ri̧ä̧nä̧tä̧ ttucuohua'attö. ²⁰ Benaia i̧sa̧mä̧ Joiada i̧tti̧ ji̧na̧'a̧; juiyo juruhuinö ja̧'hua̧nö̧ ja̧'a̧ttö̧ ujuru i̧jȩpä̧'chi̧nö̧. Ja̧u̧mä̧ Ariel i̧tti̧mö̧ ta̧ju̧ru̧ncuä'ö icuinö Moab i̧sa̧. Ja̧'hua̧ta̧nö̧ ja̧u̧mä̧ mȩyȩhui̧nö̧ reju jacuä jahuätömä möyähuirö cuä'inö jua'atä ö̧ja̧'a̧nä̧ diyahuächina'a. ²¹ Ja̧'hua̧ta̧nö̧ Egipcio i̧sa̧ böorö'inä cuä'inö. Ja̧u̧ Egipto ttö̧ja̧sa̧mä̧ umönä 'chu̧'ä̧ri̧nö̧ dacuodä ja̧'hua̧nö̧ ja̧'a̧nä̧ Benaia rohuähuinö ja̧u̧cu̧, i̧so̧'quȩ yo̧'quȩtȩnä̧tä̧. Ja̧u̧mä̧ Egipto ttö̧ja̧sa̧rö̧ 'cho'ipinö umöttö̧ dacuodä jua'a o'ca'amä cuä'ö icuinö chutä ödacuodänä. ²² Joiada i̧tti̧ Benanía ja̧'hua̧nö̧ jȩpi̧nö̧, ja̧'hua̧nö̧ ja̧'a̧ttö̧ korotö umötö̧ huämetucuä juruhuätucu ottinäcu̧. ²³ Ja̧u̧mä̧ röänä ttucuotinä̧cu̧ korotö su̧ro̧da̧u̧ treintanö huotö abonänö, ja̧'hua̧nö̧ ja̧'a̧nä̧ juiyomä ucuo i̧sa̧mä̧ pocö pinö korotö su̧ro̧da̧u̧ huämetucuä pojopö ku̧nä̧hu̧ä̧tö̧ jö̧'a̧nö̧mä̧ ja̧'hua̧nö̧ ja̧'a̧nä̧ David hueinäcu̧ umöhuäyotö churutä tta̧'ä̧rä̧tö̧rö̧ huea pä'ö. ²⁴ Treintanö huotö juruhuinä̧tö̧mä̧ pitö ja̧'a̧: Joab ö̧jä̧hua̧ Asael'inä, Belén ttö̧ja̧sa̧ Dodo i̧tti̧ Elhanán'inä, ²⁵ Harod ttö̧ja̧sa̧ Sama'inä, Harod ttö̧ja̧sa̧ Elica'inä, ²⁶ paltita ttö̧ja̧sa̧ Heles'inä, tecoa ttö̧ja̧sa̧ Iques i̧tti̧ Ira'inä, ²⁷ Anatot ttö̧ja̧sa̧ Abiezer'inä, husat ttö̧ja̧sa̧ Mebunai'inä ²⁸ Ahoh ttö̧ja̧sa̧ Salmón'inä, netofa ttö̧ja̧sa̧ Maharai'inä; ²⁹ netofa ttö̧ja̧sa̧ Baana i̧tti̧ Heleb'inä, benjamín ahuaruhuä 'cotö tti̧rȩjä̧ttö̧ guibeá ttö̧ja̧sa̧ Ribai i̧tti̧ Itai'inä, ³⁰ Piratón ttö̧ja̧sa̧ Benaía'inä, Gaasttö pämäroppänä kö̧ Hidai'inä, ³¹ Arbá ttö̧ja̧sa̧ Abi Albón'inä ³² Saalbón ttö̧ja̧sa̧ Eliaba'inä, Jasén i̧tti̧mö̧'inä, Arar ttö̧ja̧sa̧ Sama i̧tti̧ Jonatán'inä; ³³ Arar ttö̧ja̧sa̧ Sarar i̧tti̧, Ahím, ³⁴ maaca ttö̧ja̧sa̧ ahasbai i̧tti̧ Elifelet, gilon ttö̧ja̧sa̧ Ahitofel i̧tti̧ Eliam, ³⁵ carmel ttö̧ja̧sa Hesraí, arbi ttö̧ja̧sa̧ Paarai, ³⁶ Soba ttö̧ja̧sa̧ Natán i̧tti̧ Igal, Gad ahuaruhuä o'cotö i̧sa̧ Boni. ³⁷ Amon ttö̧ja̧sa̧ Selec, beherot ttöja̧sa̧ Naharai, Sarvia i̧tti̧ öäre ttö̧ȩpärä̧cuä̧huä̧ obí ȩpä̧tö̧, ³⁸ Ira itri ttö̧ja̧sa̧, Gareb itri ttö̧ja̧sa̧, ³⁹ hitita ttö̧ja̧sa̧ Urías-o'catoi'önä̧mä̧ treinta y siete ji̧na̧'a̧.