¹ Dauhuiyä u̧huä̧ju̧ ȩ'u̧cu̧ pänä,ja̧hua̧ta̧nö̧ ruhuotö curä ttörohuähua pä'ö pätecuächinätö,David hue'inö u̧mu̧huä̧yä̧ Joabrö ja̧hua̧ta̧'a̧nö Israel su̧rö̧du̧ o'catoiönärö. Jahuätömä rohuäu juruhuinätö̧ Amon umuhuäyotö su̧ro̧da̧u̧rö̧ ja̧hua̧ta̧'a̧nö jahuätömä ka̧cuäminätö̧ Rabanä.jahuanö ja'anä Davidmä Jurusalennätä kä̧ma̧di̧nö̧. ² Ni̧pä̧ro̧mȩcu̧ päi'omenä Davidmä ä̧'ä̧ma̧ttö̧ ä̧rä̧ma̧chö̧ ö̧jode ruhuode huä̧mȩ pämärächi'omȩ cue'ächinö̧, juȩnȩ kä̧nö̧mä̧ isaju aje i'ö kö̧ja̧'a̧ topinö̧ jahuäjumä toomenömä̧ juiyo a̧'cua̧cui̧nä̧ju̧. ³ Ja̧'hua̧nö̧ ja̧'a̧, Davidmä ya̧tȩ huȩnȩ ȩcuä̧ ttö̧ja̧sa̧rö̧ hue'inö̧ ja̧'hua̧nö̧ hueäjäcu ja̧u̧mä̧ jahuäjuru huo̧jua̧rö̧ jä'epö ä̧ju̧cui̧nö̧. Ya̧tȩmä̧ pä'inö̧: ¿Jahuäjumä Eliam ittiju Betsabémä̧cö̧ ja̧'hua̧ta̧'a̧nö̧ hit ttö̧ja̧sa̧ Urías irecuamä̧cö̧?" ⁴ Davidmä huȩnȩ ȩcuä̧ ttö̧ja̧rö̧ hue'inö, huȩä̧jä̧u̧mä̧ tti'cächiniyä̧cu̧. Jahuäjumä ja̧u̧ ö̧jo̧mȩcu̧ ichi'inä̧ju̧, ja̧'hua̧nö̧ ja̧'a̧ ja̧u̧mä̧ jahuäcu ä'inö̧ (Isopäi'önä jahuäjumä ihua kö̧rö̧mä̧ tucäu kicuäji o'ca'a ji̧na̧'a̧). Ja̧'hua̧nö̧ ja̧'a̧ juajumä kojusodecu ppa̧'a̧chi̧nä̧ju̧. ⁵ Jahuäju isajumä muchaju juo'ä'coju huȩnȩ ȩcuä̧ ttö̧ja̧sa̧rö̧ hue'inäju muchaju juo'äju pä'ö Davidrö jiähuäjiyaju pä'ö. ⁶ Ja̧hua̧nö̧ ja̧'a̧ Davidmä̧ hue'inö̧ Joab'rö pa̧'a̧nö̧ pä'ö: " Hitita ttö̧ja̧sa̧ Uriarö hue'ittö." Ja̧hua̧nö̧ päcu Joabmä̧ hue'inö̧ Uriarö David ö̧ja̧'a̧. ⁷ Uría juhua'a ichi'omenä̧, David jäepinä̧cu̧ tta̧'a̧nö̧tä̧ ö̧jä̧ Joabmä̧, tta̧'a̧nö̧tä̧ ja̧'a̧cuä̧ su̧ro̧do̧u̧ cuärä ttörohuähua'amä̧. ⁸ David pä'inö̧ Uriarö: "Cuojuisodecu mȩyȩu̧, cu̧jä̧piyä̧ töcähuäjí." Ja̧hua̧nö̧ päcu Uriamä̧ rä'opächinö̧ ru̧hua̧ ojusodettö, ru̧hua̧mä̧ Uria rä'opö i̧hua̧'a̧ topö mippo'önä̧ iyähuä hue'inö̧. ⁹ Ja̧hua̧nö̧ ja̧'a̧nä̧ Uriamä̧ ä'inö̧ ru̧hua̧ ojusode apate ä'ca u̧mu̧huäyotucutä, ja̧u̧mä̧ mȩyȩhuo̧cö̧ pinö̧ ojusodecumä̧. ¹⁰ 'Cuäopäjí David'rö jittähuomenä̧, "David pä'inö̧ Uriarö, "¿Ucumä̧ otottö ichäjijäcö pä'äjisä dä̧bu̧ cuojusodecumä̧ cui̧meyȩhuo̧ca̧'a̧ jä̧ttö̧?" ¹¹ Uria ädätinö̧ David'rö, I̧soca̧'inä̧, Israelttö su̧ro̧do̧u̧'i̧nä̧ ja̧hua̧ta̧'nö̧ Judattö su̧ro̧do̧u̧'i̧nä̧ ka̧cuätö isode i̧sa̧ i̧jȩta̧ttö̧ adicuode dȩa̧'a̧tä̧, ja̧hua̧ta̧'a̧nö̧ chu̧ru̧hua̧ Joab'inä̧ o'catoi'önä̧ umuhuäyotucumä̧ ka̧cuä̧tö̧ huäjuarä jo̧metä̧. ¿Tta̧'a̧nö̧ pä'ö ttömä̧ chojusodenä̧ do'ächö au cuä̧nö̧, ja̧hua̧ta̧'a̧nö̧ chirecuacu chä'a pä'ö jä̧ttö̧? Iso päi'önä̧ ucu cua̧'cua̧rä̧i̧mä̧, ja̧hua̧nö̧mä̧ jȩpo̧cö̧sä̧." ¹² Ja̧'hua̧nö̧ ja̧'a̧ttö̧ Davidmä Uríasrö pä'inö, Jitä mo̧ro̧'i̧nä̧ pȩnȩtä̧ ki̧'i̧pi̧, yo̧ȩi̧ mo̧ro̧tä̧ cui̧'cha̧ pä'ömä huȩdä̧cua̧jä̧." Ja̧'hua̧nö̧ päjäcu Uríasmä ja̧u̧ mo̧ro̧'i̧nä̧ ja̧'hua̧ta̧'a̧nö̧ koro mo̧ro̧'i̧nä̧ Jerusalén ötahuiyänätä̧ ki̧nö̧. ¹³ David huoäjäcumä, chutäcu u̧cuȩ'i̧nä̧ cuinö ja̧'hua̧ta̧'a̧nö̧ a̧huȩ'i̧nä̧ ahuinö ja̧'hua̧nö̧ jȩpö̧ Davidmä tä̧mä̧chö̧nä̧ jȩpi̧nö̧. Ja̧u̧nö̧ yodo, Uríasmä̧ rä'opächö ä̧'ä̧manä u̧ru̧hua̧ umöhuäyotöcu ä'inö; ja̧u̧mä̧ ojusodera̧'a̧cu̧mä̧ 'cho̧cö̧ pinö. ¹⁴ Ja̧'hua̧nö̧ ja̧'a̧ mo̧ro̧ päia'a Davidmä ji̧yȩtȩ i̧huȩnȩ huȩyu̧tä̧ji̧'ca̧ Uríasrö hue'inö Joabrö iyiyarö pä'ö. ¹⁵ David i̧huȩnȩ huȩyu̧tu̧mä̧ pa̧'a̧nö̧ pä'inö: Uríasrömä curä rö̧ä̧nä̧ tturohuähuome ku̧ni̧rö̧ ja̧'hua̧nö̧ jȩpö̧ ja̧u̧ttö̧mä̧ tucuipächaja ta'ö icu cuä'ö tticuarö." ²¹ 21¿ Díjä̧ttö̧ Abimelecrö cuäö icuäjimä, Jerobaal i̧ttirö? ¿Isaju mä̧'cö jina̧'a̧ tä̧ji̧ ido'qui säyuhuo'qui isode räbä ju'tojutu kä̧'inäju̧mä̧ ja̧u̧ru̧ mo̧'önä 'corupäinä Tebestö? ¿Tta'anö päö ttoecuäbä tö'cönä̧ pähui'äjätö? Jahua'anö jo̧ttömä ucutä cuädäta päö ja̧'a̧: "Ucu cumuhuä̧ya̧ Urías hitita isotö i̧sa̧'inä 'corujuoä̧chäji." ²⁴ Ja̧'hua̧nö̧ ja̧'a̧ umöhuäyotö 'po'obuhuiyänä 'po'ähuätömä ötahuiyä ttoecuäbättö 'po'ähuätö cumöhuäyotö su̧ro̧da̧u̧rö̧ ja̧'hua̧nö̧ 'pottähuomenä ru̧hua̧ umöhuäyotöttö yotute to'e'ächäjätö ja̧'hua̧ta̧'a̧nö̧ cumöhuä̧ya̧ Hitita ttö̧ja̧sa̧ Urías'inä 'corujuo'ächäji." ²⁵ Ja̧'hua̧nö̧ ja̧'a̧ Davidmä huȩnȩ ji'äu ichäjirö pä'inö: Joabrö pa̧'a̧nö̧ ji'ähui: Ja̧u̧ 'cuäopönämä juiyomä 'cua̧'cua̧ rocuecuä isopäi'önä curodämä ka̧ra̧ ka̧ra̧nö̧ cuä'äö icu si'epö icua'a. Ötahuiyä ttö̧ja̧cu̧mä̧ jua'a yabonötä̧ rohuähui ja̧'hua̧nö̧ rohuäu cujuruhuajá. Ja̧'hua̧ta̧'a̧nö̧ Joabrömä esehuächi'önä ji'ähuirö." ²⁶ Ja̧'hua̧nö̧ ja̧'a̧ Urías irecua, kirecuo Uríasmä 'coru juo'ächäji pätta'a ä̧ju̧cu̧mä̧, jahuäjumä kirecuorö rö̧ä̧nä̧ ajahuinäju. ²⁷ Ka̧'cua̧ tta̧jȩcuä̧ji̧ 'cuäo'äji o'ca'a, Davidmä̧ ottäjiyarö pä'ö hue'inö̧ ja̧'hua̧nö̧ huȩä̧jä̧u̧ o'ö tti̧huä̧jä̧cua̧ ruhuodenä ki̧nä̧ju̧, ja̧'hua̧nö̧ kä̧nö̧mä̧ ja̧u̧ irecua jö̧nä̧tä̧ juo'ächinä̧ju̧, ja̧'hua̧nö̧ ja̧'a̧ ki̧tti̧rö̧ ku̧nä̧ri̧nä̧ju̧. Ja̧'hua̧nö̧ ja̧'a̧nä̧ David jȩä̧ji̧mä̧ TÖ̧Ä̧NÄ̧HUA̧mä̧ kö'cocö pinö.