¹ Le azan xɛntɔ gbe, ye tɔn ahwa Jeruzalɛmu be ɔgun ɔ́n, ewɛ ye mɛn tɛtɛ, tɔn vo ná Apotru yé, yé gba kpé Judéa kɔdo Samarya tomɛ. ² Ɛmɛ kena mɛ Mawu be ɔvivɔn le yé ɔ, kɔ Etyɛni sɔn ɖi kɔdo avi abobo le ji. ³ Le Sawulu (Solu) be akpaji, e kikan Mawu be ɔgun, bo nɔn gbo byɛ ɔxwe ye mɛn do nɔn wli ɛnusun kɔdo nyɔ́nu ye do gankpa mɛ. ⁴ Ye mɛkena gba kpé yé, nɔn sɔn fi ye yé do nɔn jra Mawu be ɛwɛn nywɛn. ⁵ Filipu, byɛ Samarya tɔmɛ bodo jra risto be ɛwɛn. ⁶ Ɛmɛn ye nɔn le ɔto ɖo nu exo kena Filipu le lɔ nu, kena ye se bo gɔ kpɔn enu majɔkpon na ele wanuyé. ⁷ Ɖo gbigbɔ makɔn makɔn ye tɔn le ɛmɛn kena gbigbo vwɛn ye wlimɛ kɔdo abobo dido, ewɛ mǝn kena kplibɔ ye kɔdo tɛnkpo nɔn ye be ɔzɔn jɛ mɛn ná yé. ⁸ Ewɛ jijwɛ gbo ɖé nɔn eyo ɔ mɛ. ⁹ Nusun ɖe kená ye yɔ bé Simɔ́n nɔn eto ɔmɛ bayi, bo nɔn wa ɛmɛ jwɛ mɛ, nɔn wa majiki zan, bo nɔn kpaca Samarya to vi ye. ¹⁰ Ye mɛ tɛtɛ, le viyɛ vu kaka do jɛ ɛmɛgan xo ji nɔn ɖo ɔto ebe exo lilɔ yé, ye nɔn lɔ bé: ɛmɛn xetɔ nyi Mawu e hinhlɔn, kená ye yɔ be hinhlɔn gbotɔ. ¹¹ Yé nɔn ɖo ɔto wi, ɖo enɔn nɔ́n kpaca ye do ebe majiki nu wiwa mɛ. ¹² Vɔ kena ye xɔse Filipu be xo ɔ ná le jra nu Mawu be ɔxɔluɖu to mɛn be ɛwɛn nywɛn ɔn kɔdo Yésu Kristo be nyikɔ, nunsun kɔdo nyɔnnu ye lɛ Mawu sin. ¹³ Simɔn yɔ ŋtɔ keke yi se, ewɛ kena ye lɛ Mawu be ɛsi nɛn egodo ɔ, uŋgɔci ɔzɔga ná Filipu kpɔno, ewɛ e bo nɔn kpɔn Mawu be zan jwasu ye, amliman ye nɔn le kpa ca nwi. ¹⁴ Apotru ye, kená le Jéruzalɛmu, kena ye se be Samarya yi Mawu be xo ɔ se, ye zɔn Piyɛ kɔdo Jan do hlán. ¹⁵ Ye ɛmɛn xe tɔ ye ba Samarya to viye de, xo ɖɛná yé ná yado yi gbigbɔ kikɔn. ¹⁶ Ɖo uŋkpɔ́n jɛ te do ɛmɛn tiji le ye mɛo, ye lɛ Mawu be ɛsi ná ye le yésu risto be nyíkɔmɛ kpo wɛ. ¹⁷ Le eflɛn Piyɛ kɔdo Jan ɖo ɔ lɔ yé tana ye, ewɛ ye yi gbigbo kikɔn. ¹⁸ Kená Simɔn kpɔn be gbigbɔ kikɔn nyi ná do zɔn ɔlɔ ze do eta Apɔtru ye tɔ́n mɛ, e yi ɔho le ná nu yé. ¹⁹ Bo le lɔ nu bé: miná acɛ xiɔ tɔ wu emlɔn cán, do be ɛmɛ keji ma ɖo ɔlɔ ye, ya yi gbigbɔ kikɔn. ²⁰ Vɔ Piyɛ lɔ nɛn: xwe hɔ nɛn crɔn gɔdɔ kená nyi be ɔxɔse be Mawu be enu nina ye nɔn xwɛ kɔdo ɔho. ²¹ Uŋɖo mi ma, alo a ɖo eɖe le emɛ o ɖo xwe jimɛ uŋjɔ le Mawu de o. ²² Lɛvɔɖɛ na ɔxwetɔ na ado yi xwɛ jimɛ be súsú yikɛ ɔ, na anyi wiwa. ²³ Ɖo uŋ kpɔn be ɔle vivɛ sise mɛ, kɔdo enuvwɛn be kanbla ye mɛn. ²⁴ Simɔn ɖo ewu: mìye uŋtɔ keke mì xo ɖɛ na ɔxwetɔ do xo ta mɛ, ɖo enu sianu kena mìlɔ ye uŋka do jɛ do xo ji o. ²⁵ Egodo, kena ye di ɖase do ɔxwétɔ be exo wu ɔ, kɔdo e lilɔ wu, Piyɛ kɔdo Jan lɛkɔ sɔn Jéruzalɛmu bodo le jra nu ɛwɛn nywɛn le Samarya be ɛgle toxo ye mɛ. ²⁶ Ɔxwétɔ be ɛwɛnzangun lokpo to ná Filipu be: cité, sɔn eto ɔ be ɔfɔgbe le emɔn kena nɔn sɔn Jéruzalɛmu le Gaza kena nyi zogbé. ²⁷ E bo fɔn jɛ emɔn ɛwɛ kpɔn Etyopya tɔ, ɛmɛ sisa Kandase be cámi Etyopya be ɔxɔlu si ewɛ nyi ɔdokunji kpɔntɔ, ebo ba Jéruzalɛmu a do sɛn Mawu. ²⁸ A bo lɛkɔ, le awan sinɔn xwe le esɔji, ewɛ ele xlɛ nu exolɔdo awan tɔ Esayi be xwema. ²⁹ Gbigbɔ lɔ ná Filipu bé: zɔn gogo esɔ hun xɛntɔ. ³⁰ Filipu do ɔwezɔn ba, ewɛ ele se nu Etyopya tɔ le xlɛ nu exolodo awan tɔ Esaya be xwema. E lɔ nɛn be: ɖe ɔse enu kená ɔle xlɛnu be ɔgbɔn mɛ? ³¹ Eɖo ewu be: na ɖé ma tɛn kpe ewu ɖo, na ɛmɛ uŋkpe do xo wuo? Ewɛ eyɔ Filipu be nɛ byɛ ehunmɛ ná a sinɔn awan kɔdo ye. ³² Enu winwlan ke ele xlɛnu lɛ xe: E kwɛ do jɛ mɔ́n ɖi kɛn ɛlɛngbɔ na ye ka sɔn hu dɔ gbe, ɖikɛn ɛlɛnvi kena ye le kpanu ɔfún na ɛbɛ makɛ uŋbo hun ɔnu kpa o. ³³ Le ebe ɖeke ɖiɖe kpɔtɔ mɛ, ye ɖo kojo nɛn. Ewɛ eku kan, mɛnɛn wɛ a ba hwlɛn gán o? Ɖo yé ebe bɛ le le awan zanji. ³⁴ Ɛmɛ sisa lɔná Filipu be: uŋɖe kukunɔn, ɛmɛn nɔwe xo wɛ exolɔdo awantɔ le lɔ nu? ³⁵ Ɖe eyɔ uŋtɔ wu wɛ, alɔ ɛmɛnbu wu wɛ? Le eflɛn mɛn Filipu kɛbɛ; ewe ebɛ jí sɔ́n, ewɛn nywɛn Yésu tɔn ji. ³⁶ ená ye le emɔnji le sɔn nwɔn, ye kpɔn etɔ, ewɛ ɛmɛn sisa lɔ be: etɔ xé: nukɔ uŋma tɛn wuŋ aɖe emɔn be ma lɛ Mawu sin? ³⁷ Filipu lɔ bé: na ɔ xɔse le xwe ji mɛ, exɛn atɛn uŋnyi wiwa. Ɛmɛn sisa ɖo ewu: uŋ xɔse be Yésu Kristo nyi Mawu be vi. ³⁸ Eɖo esɔ hun ɔn te: Filipu kɔdo ɛmɛn sisa ɔ jɛte, ye bo byɛ etɔ mɛ, ewɛ Filipu lɛ esin nɛn. ³⁹ Keená yé tɔ́n le etɔ mɛ ɔn, ɔxwétɔ be gbigbɔ kɔ Filipu do lɛ, ewɛ ɛmɛn sisa ɔ uŋgɔ kpɔn Filipu o. Le jijwɛ kpikpɔmɛ e bo wli ébé lé sɔ́n nu. ⁴⁰ Filipu ba tɔn le Azoti, bo lɛle eflɛn do sɔn Sézaré bodo le ɛwɛn nywɛn jranu le efi siafi na é nɔn zɔn.