¹ Kaagbennu a buol e k n luon faatu, A daa te k n difei. ² K maan faa tie palpienn-daanɔ ne a sommin k bia faatin, gbiintilin k sommin. ³ Ii tie taanfieku nba tie n gungul buol, sianmiba k n sii tuumbe paakin paakin a kunnkɔl k lin tii nnin k maan fine tie gungul buol nan n guutua. ⁴ Lenŋe k u kɔnn datai piinni: kɔnn b naagbankɔnŋaa nan jukbanjai. ⁵ A tie yudaanɔ k bia mɔk panŋ ki gal juat kul, k panŋ tenn yann. ⁶ K bii paala waat ki bii bial gɔɔnt. Nikpela kul k fiit faat b mɔnŋi k b bannu tien tann. ⁷ Saakob Yennu a belik nan ninŋe taamii nan b taanjakila dual gɔɔn-gɔɔn. ⁸ Yennu fin kinkɔɔ k t tiina jaŋmaani, li tie k a wutuol do sua kan fiit set a tuann. ⁹ Yennu a muant a buut yendɔnŋ niŋa yuo nba ki a fiil a kan bu k somm binba k b diimm tinŋ na k jaŋmaani n kuab k bin ŋmin suonŋ. ¹⁰ Yuo nba k Yennu wutuol baa a datai paak niib tu tula dontil e. K binba nyii tɔb ni nan saa tien jaanm. ¹¹ Tuulin i yonmdaanɔ Yennun linba k ii senn mɔsonn a i saa tulɔ na, ii baar nan ii piini k tulɔ. ¹² Digbana nba kul kpia na n baal nan bii piini, k tul Yennu nba k nisaalik tienɔ na. ¹³ U te k doo dialaa sikint b mɔnŋ, k te k tingbounŋ na kpanbaala tiinɔ jaŋmaaani. ¹⁴ Min ŋalin n sii tun mɔk dindann yuo kul nannua. K piak a sann yuo kul. ¹⁵ N saa muant a ŋant nba tie; k bia piak a tinnu po daal kul. Li lek i yab gal bannu nba tie waa. ¹⁶ N saa tuo fin kaagbennu-yonmdaannɔpanŋ nie. N saa dont a saan, k maunt fin yonmdannɔ kin kua maan . ¹⁷ O Yennu maa din tie bik a: ki a tu min a muomaan n bia daa tian k piak a bakitnaunŋ tuona po. ¹⁸ N Yennu mɔtana n ji kpeta k n yuut penn a a daa nyikitimi. Ii be nanin , k mii muatil a panŋ nan a yiiko ki tien maalu nba waa kul. ¹⁹ O Yennu a ŋant saa baal sanpagbuonŋa, fine tie daanɔ nba tun tuonjaana . Ki sua ki be ki tie nan fin na. ²⁰ A lek te daa mii nan wahala nan yuudonn baa tii paaka. ŋaan a saa ŋanm k tult manfuol a. ŋaan a ka n te k tiin siek kpienm tinŋ ni. ²¹ L ŋan nan maan tien nijann ki gal nan maa bo be tie bianŋinba. A bia saa ŋanm maan n paala. ²² Yennu n saa faa kɔɔnn ki donta , n Yennu n saa yin yanŋ nan bon fiifaat k dont a ŋant paak. Fin nba tie Islael tieb ŋant daanɔ. ²³ N sii dontila k yiikin nan palmaann, yuo nba k nyiin k dontila i na . K maan a tinnin maa. ²⁴ Daal kul n saa paak k muant a ŋant po, ki maan niib nba luon a bin tuulin danŋ na. A nyannib , k bin dii fei waa.