1 Yennu sommin k maan nyun na dian yiak e. 2 K i n taa k siit tinŋi, n fel bakil niŋe . N baal nyun sunsuuk niŋa, ki nyun pana yaa lin piinin me. 3 N bak e nan maa yikinn k luon smmil. Ki n kunkol ji ton, k n ninbina mɔnn ki kpaan fin Yennu. 4 Binba namin k li ki mɔk paak yab ki gal n yul paak yuta. Niib bonciann tie n datai ki namin k l k mɔk paaki. Ki tie binba luon ki bin biilin . Ki mianin a man jiin linba ki n ki jan. 5 Yennu, n yanbɔmm ko bɔl a buoli ki a mii maa bianŋinba ki n jat. 6 N yonmdaanɔ yabint Yennu, a daa te ki n baat nan fei Ki tien binba tiena yada na. Islael tieb Yennu, a daa te ki n dint binba jiantila na fei. 7 Ki maan a ya sann paak ki bi sukiin k dintin fei. 8 K n tie nan samɔna, n ninjamm buol. Ki bia tie nan buolganuu na n ŋaatieb buol . 9 Maa luon a ŋaak bianŋinba na, n pal di muu e. Ki sukit nba bo sii tie a yal na ki li baa n paak. 10 Ki n sikin n mɔnŋ, ki lol mɔb, ki niib skiin. 11 Ki n lia kunn fabini liant, ki bi laan. 12 Ki bi piak n paak sɔnjot ni, ki dayibila yinin yanii. 13 N yonmdaanɔ Yennu, min ŋalin saa miala waa. A tulin jinnu yuo nba ki a luon; gatil ki tulin ki maan a lonm paak nan faa gbient n mɔsonn ki tint niib na paak. 14 A tinnin k n daa kpii bakil na ni, ki tinnin ki min nyi n dati na nuu ni, ki bia nyinnin nyun sinsuuk na ni. 15 A daa te k nyunpana na piintin kuo k te k n di nyun , sinsuuk na ni kuo ki fel kpii bakil na ni. 16 Yennu, jiin aluonm nba ki gbent na ki tulin jiinnu, jiin a ninbanticiɔŋ na ki ŋmant n paak. 17 A daa lekin a numm a tuontunnɔ paak. N be ninmɔnbiuk niŋe , tulin gatu mɔtana. 18 Baat nbuol ki tan tinnin, ki nyinnin n datai nuu ni. 19 A mi baa sukiin, bianŋinba, ki mi ma di fei . Ki butim bianŋinba a laat n datai kul. 20 Sukit biil n pale, ki te ki n bial yann. Ki n kpaan wun nba saa maan , n pal , ŋaan n ki la sua. Ki kpaan wun nba saa koli min ki bia ki la sua. 21 Yuo nba ki kon mɔkin na, ki bi tulin lɔbii. Ki nyun nyunkilu suolin, ki bi tulin da miituk. 22 A te ki bin diina jaamm n kpant barit, ki te bi maluŋ jamm na n baanib. 23 A te ki bin juan, ki bi sai ni ii tun ki yial. 24 A donn wutuol bi paak, k te a wutuobiuk na n buontib. 25 Ki ŋaan bi kaaŋ na n bial yann. Ki daa te sua kua bi binbebuol na jikii. 26 Bi dint binba ki a dat bi tuba nae biak. Ki bia piak niib nba ki a tulib danii na falaa po. 27 Diant bi yanbɔmmn kul ki nbil a daa te ki bi laat tol a tinnu na ni. 28 A piin bi sanna manfuol gbounŋ na ni. A Daa te ki bi sana puki a niib na ni. 29 N be na gbanantont nan ninbatile. Yennu, ŋaant ki a tinnu na ii guun. 30 N saa yin yanŋe ki dont Yennu sann. Ki bia muant u yabint ki tulɔ niipuok. 31 Linba na saa maŋ Yennu ki cie mii tulɔ naab ki li tie piini. Ki bia cie mi jii najak nan yinna li mann mannu malunŋ. 32 Nan-damm nai la nna, bi sii mɔk palpienn e. 33 Yennu gbiintil nandamm mialu ki ki tammit u niib nba be dansalii ni na po. 34 Sanpaak nan tingbounŋ, nan mɔkigbenŋa, nan banfoa nba kul be lini, pakin Yennu man. 35 Ki maan u saa tinn Selusaalenm a, ki bia ŋamm maa Juda duolia. Ki niib saa kua kal lenŋ ki yent tinŋ na. Ki u tuontunna na yaabuonna saa yent tinŋna. 36 Ki niib nba luonɔ, ŋamme saa kua lenŋ ki kal nan pali mann.