¹ A buol e, yonmdaanɔ, k n luon sonmil, guutin n siknin mɔnŋ ni yuo kul. Nyintin, k maan a tie niŋaanɔ e . ² Gbintlin, k baal k tan fatin. Fine tie n sonmtua nba waki k guun, k tie ŋaak nba mɔk panŋ k fielin. ³ Fine tie n sonmtua, a nyinin ninbɔnŋ nan bonbil ni, a sann nba ŋan nan baakl na paak, fine ŋmaktlin k bia guun. ⁴ Fine fatin tanbal nba k b pii k guunin na ni, mɔnni, fine tie n sonmtua. ⁵ A nii nae k n jikt n siek k kubnt a fielin, yonmdaanɔ, yennu nba tie balmɔnni daanɔ. ⁶ N yiitin faak yennii jiat-tieb nae, ŋaan min ŋanln, n mi nan fine tie yonmdaanɔ. ⁷ A lonm paak t k n waa nan palmann, a laat n maba k a bia mi n ninbaatl nba tie. ⁸ A k nyinin datai nii nii, n nuunm ni, a lɔut gingaan ŋaanuue k tulin. ⁹ Tinimin ninbanŋ, yonmdaanɔ, k maan n b ninbaatlnie. N ninbina bak nan mɔni waa, n kinkɔl nan n nɔak cɔnka. ¹⁰ N manfuol juontl nan nyun-nyuute, k n bina juontl nan wahala. Biite t k n buon n panŋ, k n kpaba banŋ. ¹¹ K n datai kul nan lieb kul dian diabik, bin nba tie n yɔsin nba k b tiinin jaŋmaani yuo nba k b sɔnnu paak, k cial ŋaan nyikn. ¹² K sua kul tanm n po nan n kpoe na, k n j tie nan bont nba bit k b lu na. ¹³ N gbia k ni bul laan k biilin l kul po k suo suolu k jiin n po, k taat a bin nyinn n manfuol. ¹⁴ Yonmdaanɔ, n du fin kunkua paak e, k yet a: A tie n yennu ! ¹⁵ N daa kul be a nuu nie; fielin n datai nba waa a bin biilin na nii ni. ¹⁶ Ŋaant k a manuunm mi be a tuontunnɔ paak, k ji a lonm na k fielin. ¹⁷ Yonmdaanɔ, a daa t k n di fei, min nba mɔn k yia na. Ŋaan ŋaantk niibit manŋ n di fei, kaat ni. K kua kaat ni na kpienm na ŋmiŋminn ! ¹⁸ Fai danm, ŋaant k bin kpant nuui, k maan b piak k jiint niŋaanɔ po nan japaat kancɔlnt nan biilu. ¹⁹ A ŋant yab bonciann k a ji k tul bin nba tiin na , bin nba gul a buol tingbouŋ na kul po, a gbienn a ninkpabauŋ. ²⁰ A tuu bɔlbe sonna a nuunm po, k fɔkt nanm buuti-buuti danm buol. A tuu saan nanm siannba ŋaane k b fɔkt nan biit danm. ²¹ Pakin yonmdaanɔ, k maan u lonm nba k u tuun lin nba ŋan yuo nba k n be nibiit sunsuuk ni ! ²² K jaŋmaani bo suolin k n yet a: N ji k be u nuunm po nanɔ, ŋaan k a gbat n faabni yuo nba k n yikin k mei'a. ²³ I luon yonmdaanɔ man, yinm nba tie u niib na, yonmdaanɔ guu u niŋanm na, ŋaan daal kalbaandanm tuba nan laa kpaab bianŋ nba na. ²⁴ I waki man, ki mɔk gbankul, yinm nba kul mɔk dindann nan yonmdaanɔ na.