¹ N yennu, n yenn be k a nyikinmii? k n mɔ fabin k luon a sonmil k a k tulin sonmili. ² Yennu, n bui yonnu nan nyiɔk kul, kk fuoi ŋaan k a k tulin jiinu. ³ ŋaan fine kal a naangbuonŋ paak k tie kasii, k Islael tieb dontila. ⁴ T yejanm din tien fine yada b din tiena yada, k a fielb. ⁵ B din yi a sann, k laat fielu, k tiena yada k k kɔnŋit a sonmil. ⁶ N ji k tie nisaalik kaa, n tie nanwubile. k niib piak k butinin, k bia salikitin. ⁷ Bin nba kul laatin, k b salikitin, k sukiin, k laan, ⁸ K yeen a, u tien yennu yadae, ŋant yennu manŋ n fielɔ; yennu manŋ i luonɔ, bee k u kan sonmɔ? ⁹ Fine din t k n saa naa malin sonna, k t k n tiena yada, n sanpantik ninŋa. ¹⁰ N ma a pake dal nba k n naa malin nawa, k a tie n yennu nba guu yuo kul. ¹¹ A daa fɔkitl nanin; wahala baala, k sua kaa k saa sonmin. ¹² Datai bonciann lintima, k tie nan najai na, k naan nan naajanyitii nba nyii Basaan tinŋ ni na. ¹³ K b yatl b mɔi a bin patin, k l naan nan yanbɔl nba tuu yaatu mɔb na. ¹⁴ N panŋ gbenna, k n tie nan baa tuu kpaal nyun, k lin yat tinŋ ni na, k n kpaba tukit k nyi dukina ni, k wuub tie nan kpam nba tuu nann na. ¹⁵ K n kunkɔl kol nan tankoont na, k n lanm tab dindak ni, k a nyikin tant ni nan n kpoe na. ¹⁶ K nibiit lintin k tie nan bɔjuote tan k linkin na, k lont lont n niipant nan taapant. ¹⁷ K n kpaba kul nyuaan, k n datai goliin k kpanm; ¹⁸ K b bil suka k bil n liant. ¹⁹ Yennu, a daa fɔk nanin, baat yian k tan fatin. ²⁰ A fatin k man nyi kuun ni; a nyinnin bɔi na ni. ²¹ A fatin yanbɔla na ni n panŋ gbenna, k a nyuinin naajanyiati na ni. ²² K n saa wann n niib faa tun ŋanm nba k tulin, k n saa dont a sann b tintaanu ni. ²³ Yinm nba tiin yennu jaaŋmanii, ii dont u sann; yinm nba tie Islael tieb, ii jiantɔ. ²⁴ U k yeen talas danm nba be mukil ni, u k nyɔl nyikkib b wahala ni; u lekin u nunm b paak, ŋaan gbiintil k tienm, yuo nba k b fabin k tukɔ. ²⁵ Nibul tintaanu niŋe k n saa paak, k jiin n pinii nba k n senn mɔsonn na k mann malunŋ niib nba jiantila na tuann. ²⁶ K talas danm sa di k gboo b yamani, k bin nba bal yennu buol saa pak u sann, bin mɔkt nan yuo nba kaa gbennu. ²⁷ Digbana na kul saa tial yennu po, k buolu kul saa jiantɔ. ²⁸ Yennue tie kpanbal, k dia digbana kul. ²⁹ Kalinbaan danm kul saa gbaan u tuaan; k jiantɔ. ³⁰ M aal paanu nba tan saa fiil saa jiantɔ, k b tan saa pak tul maal paanu nba saa fiil na k jiin yennu po. ³¹ B tan saa yet niib nba k b saa malb na a, yennu fiel u niiba.