¹ Paakin yennu man ! saanpaapo bona , paakin yennu ! paakimɔ man siannba fɔk paak ! ² Pakinmɔ man, yinm nba tie u malaka nba ! pakinmɔ man yinm nba kul tie kunkɔnkɔnna na ! ³ Pakinmɔ man, yennhu nan ŋmaalik ! ŋmaabila kul n paak dontɔ ! ⁴ Saanpaak nan linba kul be l liik po, nan nyun nba be tinŋ pual ni n paak dontɔ ! ⁵ Ŋaant k bin dont yennu sann, k maan u mɔmaan ne din nann. ⁶ U te k be bin binbeboa yaayuo siiyuo, u tulib sennii k b kan ban kpeti. ⁷ Binba be tingbonŋ na paak n pak dont yennu, nyuun ni bona nan linba kul be nyuun tinŋ kul, ⁸ Muu nan saakaana, sanpagbonŋ nan wunn, nan wonpaaluk nba saak u mɔb. ⁹ Juat nan kunkona, tilonti nan kpeki, ¹⁰ Bonkobit kul, nan li ŋaak ni yab, bonbubokit nan nuani nba juuk sanpaapo kul, ¹¹ Tingbonŋ na kpanbla nan b niib kul, kpanbaala ŋaaktieb nan balbulanba kul be tingbonŋ na ni, ¹² Naasinm nan saapaanm, jakpela nan waas ! ¹³ B kul n paak dont yennu sann ! k maan u sann yab gal saana kul, k u baakl yab gal sanpaak nan tinŋ. ¹⁴ U te u niib mɔk panŋ k l te k u niŋanm kul dontlɔ, Islaael tiebb nba tie u waas k ki fɔk naanɔ na. Paakin yennu man.