¹ Kpanbal david yanŋ. Yanŋ nba k kpanbal David din yin k dont yennu. N donta n yonmdanɔ a daa ŋmini! ² K maan b yaatl b mɔtɔnt nan b faak mɔi nae n paak. B piak nanin b faak jelma nae, ³ B piak mɔbonbiit n paak. K kɔn naanin k l ka paak. ⁴ Ma lek luonm na kul, ŋaan b tie n datai e ŋaan min ŋaanin mei n yondanse. ⁵ Mii tien ŋanm k tulb, b tun jiinin bonbil, nan manŋ n lonm paak. ⁶ Sentua balbulua nba tɔn tuonn, k te u daatak n set u nüditu po k paak bilua. ⁷ Yuonba k b saa bu u buut, k bin jetɔ a u tie biit daanua e, k u yenmialu i tie biit. ⁸ K daa te k u daa i tie waamiina, k sua n gaal u tuonn! ⁹ K u waas n kpant kpiebi, k u ŋaapuo n tien paakuak! ¹⁰ K u waas n tien boncunconna ki li ki mei, ki kpaan b jiet langbent nba fɔk ni! ¹¹ K pandaanua n gaal linba kul tie u yaal, k buolganu n biil u tunna! ¹² K sua daa tentua ŋaant, k bia daa tiin u kpiebi ninbaɔku! ¹³ K u yaabuona n buont, k b saana n bot buolu nba baat na ni! ¹⁴ K kaagbennu yennu daa ban tanmit b jiejanm biiti, k b naa biit daa ban piinti! ¹⁵ Ki tun ki be kaagbennu yennu tuann, k wun nyinn u dudukit b buolu ni, ¹⁶ K maan b k tiat yennu ninkpabɔnŋ po, k dinn taali nan nan danm waahala k sa kpi ninbaatinɔa! ¹⁷ U luon mɔtɔnt n ba u paak e k u pal k man k u pal k man yeteŋanm paak k l fɔkit nanɔ! ¹⁸ K mɔtɔnt i be u paak nan liatl na, ki tie nan nyun na k kua u gbanant ni nan kpan nba be u kpaaba ni na! ¹⁹ Ki tie nan liatl na k wuu lia, ki tie gbann ki buol u siak ni yuokul. ²⁰ Linba nae si tie n datai paaut k nyi kaagbennu yennu buol k tienm nan danm nba piak mɔtɔnt maan k tienin! ²¹ Fin nba tie kaagbennu yennu! tinimin ninbaɔk a sann paak, k faatin k maan ŋaant yaab bonciann! ²² N tie naandanɔ nan talas danɔ e k n pal la dann n ni. ²³ N tie nan maasu yinunŋ juontu na, k b bielin nan ŋmaan n na. ²⁴ Mɔlol te k n duuna banŋ, k n gbaanu cɔk k n waab. ²⁵ N tie nan b jiet nae, k b goliin, k ŋmaat n yul. ²⁶ Kaagbennu yennu nba tie n yonmdanɔ, sonmitin, fatlin a ninbaatinu paak! ²⁷ K bin bann nan a yiki nuu na tun na. ²⁸ Bii puolin mɔpola k fi tienin pusin; bi fülin n paak k fan ŋmatib k a tuotunnɔ pal n maak. ²⁹ K te k n datai n di fei bonciann ki lii tie nan b lia liatfuok e na. ³⁰ N saa dont n yonmdanɔ nan kunkɔl paalib sanpaapo, k dontɔ nü bul sinsuk ni; ³¹ K maan u sie taa tinm puolpo, k saa tinnib b datai nuu ni.