¹ Sosuwe fiil sannya pob ni, k saan sitinm ŋɔa nan Islael tieb kul k b baal suldan mɔkl buol, lenŋe k b din dual nyiɔk k tan füt puot. ² Daa ŋanta sinsuuk ni, k tuann danm na lint bi buol na kul, ³ ŋaan yet niib na a! yuonba k i saa la kaagbennu yennu mɔlol lakl na, k mann tieb nba tie lefiit nba na jii, yin fül yaa be sian ki waa l puolpo. ⁴ I ŋaan k yinm nan mɔlol lakl na daa naaki k fɔk nan taakabi kobi ŋanle na. I ban yin nakin. L saa wanni sɔjok nba ki sa tɔkin k maa i ki ban tɔkin e l sɔnjoku. ⁵ K sosuwe yet niib na a: ŋanmit i mɔnŋ, k l maan wonn yennu won sa tien yaal lutik tuona i sinsuuk ni. ⁶ K sosuwe yet mann tieb na a: jiin mɔlol laakl na, k gaal nüb na tuann k b jii mɔlol lakl na k gaal sonm niib na tuann. ⁷ K kaagbennu yennu yet sosuwe a! dinna n saa piin k donna Islael tieb buol ni, k fiit k bin bann nan n be naana nan maa din be nan Muois bianŋnba na. ⁸ A wann manntieb nba jii mɔlol laakl na a: yuonba k i baal suldan mɔkl gbianu, yin set suldan mɔkl kpinŋ. ⁹ K sosuwe yet Islael tieb a: Naakint man k gbiint maan nba k kaagbennu yennu pak k tieni. ¹⁰ K sosuwe yet a: I saa bann nan yennu nba fo be i sinsuuk ni, k saa bel kananean nba i tuann po, Hetit tieb, Efian, Pelesian, Gilgasian Amolian nba, nan sebusian nba: ¹¹ Gotl, mɔlol lakl nba tie tingbong na kul yonmdaanɔ na saa gaal i tuann po suldan mɔkl na ni. ¹² Mɔtaana, i gann jab piik nan banle Islael tieb buolu ni, jɔa yennɔkuo buolu kul ni. ¹³ Yuonba k mann tieb saa jii molol lakl nba tie t yonmdaanɔ yal na, yennu nba tie tingbonŋ na kul yonmdaanɔ, baa saa jii b taa k ŋma suldan mɔkl nyun yuonba, suldan mɔkl nyun na sa bɔkit, k nyun nba nyi paapo k baat sa set nan jual na. ¹⁴ K niib na nyi b lanbont ninŋ a bin puot suldan mɔkl na, k manntieb nba jii mɔlol lakl gal sonm niib na numpo. ¹⁵ Yuonba k mann tieb nba jii mɔlol lakl baal suldan mɔkl na buol, k b taa sii nyun na kpengbianu, mɔkl na din tuu gbie k paat diijaanyuo. ¹⁶ K nyun nba nyi paapo na din set, k tie nan jual na din set banfokla k ki fɔk nan Adam digbann nba din kpia nan saltan, k nyun nba siik mɔk kpienn po na mun set. K niib na puot k sa Seliko. ¹⁷ Manntieb nba din jii mɔlol lakl na na din set suldan mɔkl sinsuuk ni konmn me, ŋaan k niib sonm tinkuonŋ k puot k tan gbenn suldan mɔkl.