¹ K job bia ŋamm gaal maan, k piak ya: ² N sun man k n binbenŋ na bo ŋmat k tie nan yennu nba din guun biaŋnba nae. ³ Yuo nba k u fit din di n jul paak; k tien ninyentu yuo nba k n somm bunbɔnn ni na. ⁴ L din tie sakl nba k n mɔktile; k yennu suolin na sinyuat; k tie piisin n ŋaak paak. ⁵ L yuo; k yennu daa din be nanin; k n waat kul be n buol k lintin. ⁶ L yuo; n taa din puak kpan ninŋe; k n kpan tiinii pia nan tananinŋ a. ⁷ Lii tie k n nyii k saa duo tanmɔb ni; lii tie k n baal ma n ŋamm senn kok kinkal buol; ⁸ Nasimm tuo siet k fɔkit nani me; k nikpela n fiil k set b taa paak. ⁹ Niib na yuann danm tuu ŋmin b fuute; ¹⁰ Binba tie canbanba na mɔnŋ tuo ŋmine. ¹¹ K wunba kul gbat n danmit b tuo pak ma ŋana ku kuae tienin k wunba lan tuo piak linba k n tun a poe. ¹² K maan n din sonmit talii nan kpiebi nba din fabin k luon sonmil nae. ¹³ K l talat danm dinsaatl mɔsonŋannae k tienin; k n pal man yuokul. ¹⁴ K b palpienn binbenŋ; ninbinne; k tuun linba ŋan. ¹⁵ N din ŋman tie juanii ninbinne; k bia tie wabii taal. ¹⁶ N daan ŋman kpiebii bae; k nyint sonm b dammit ni. ¹⁷ K biil nitont yiikuo; k fial binba k b diinm na k nyintib b nuu ni. ¹⁸ K din tuo dukii nan ; n saa wei; n manfuol nie; k tan kpo n ŋaak ni. ¹⁹ N daan tuo tie nan tiik nba jiina be nyun ni nae; k bia tie nan tiik nba yiinii mei nan malin na. ²⁰ K niib piak k dontilin; k n mɔk panŋ yuo kul. ²¹ K mi tanŋi piak yuo nba suo kul din tuo ŋmine k gbiin n kpannii nba k n tienm na suona. ²² Mii pak n maan gbenn; sua k jiinti; k maan din tuo mei b kul palaa. ²³ B din tuo paak nan kpala nba tuo daan saak baalu nae. ²⁴ K n tuo laa mɔmiin yuo nba k b din tuo kua daami ni, k cie b pala. ²⁵ N din taa luon min saan b ŋei nie; k kaal di nanm b janm. n din tie nan kpanbal nae b sunsuuk nin; k maant binba be palbiil ni na pala.