¹ Kaagbennu maan nba k u lin pak k tul u sɔkini selemi k jiin duo nba k yi Babilonn nan u niib ne po a: ² Pakin maan manŋ k tul digbana, a muantl ! Dont falinŋ k muant ! a laa te l tie bunbɔl maami. Babilonn baa wa. U tingbanna nba k yi Bel nan Metodac ne kul biila. Babilonn tingbana dii fei wa? U bonninnanbit ne kul yiala. ³ K maan digbann gann jab nyii ganŋ po k baal a bin lek'ɔ, k kpantil kunkuok, sua kan kal l duo ni; niib nan bonkobt kul saa cial k yaat. ⁵ K kaagbennu yet a: L daa ni, l yuo ni, Juda nan Islael niib kul saa taan ki mɔ ki baat, k luonn min nba tie b kaagbennu yennu ne. ⁴ B saa boi Siyon sɔnu po. B saa ŋmant monŋ k tɔkin l po. B saa lol molol nba kaa gbennu na ni n, k kan ban k tanm l molol po. ⁶ N niib tie nan pei nba bot nie; b kpaalik buom k b j yat k lin kunkonna paak. B lin nan pei nba tu nyi kunkon yenn paak k tuat kunkon liel paak nie. K tanm b binbebuol. ⁷ Wunba lab kul tuu suolibe k kpib, k b datai ji yien a taa tiem linba ne k biil. B tun k biil tennue. B yaajanm din tien yennu e yada, k b mun bo si waau n nie. ⁸ Islael tieb, ii tin k nyi Babilonn man , i cial man k nyi tinŋ manŋ ni nan bujai nba tu sint k gaal liik po bonkobt ni ne. ⁹ K maan n saa fiin digbanpaala nba be ganŋ po k te bin kɔn nan Babilonn. B saa set jatuk k tuok Babilonn duo ne k nyannɔ. B tie waala nba ban waaluko. B tɔ b pienii k k nɔli. ¹⁰ B saa jii u faal kul . Binba saa jii ne saa jii k janŋ linba kul k b luonn. ¹¹ Ii pala i man k yii kpann, yinm nba fat n niib bona ne. Yii laa ki cibt, kii yuuk nan bonkobuk nba tu be u yan ni muuk ni ne, ii yikin man nan taami nba tu jelin k yiki ne . ¹² I tiɔnŋ digbann ne saa di fei. Ŋua e saa juont digbana kul ni. L du tan sii tie paankuonŋo. ¹³ Sua kan kal Babilonn kaagbennu wutuol paak l duo si tie langbente. L saa yaalk lit niib kul nba gaal l duo ne ni. ¹⁴ Talbantuala, i set man cuncuuntuk, k tien siil nan tɔb, ii tɔ man Babilonn i pienii kul, k k laa tent baa pienu. K maan u tun bonbiil k biil min kaagbennu a. ¹⁵ II yikin man yɔb wuyikini duo ne kul po man. Babilonn fiaka, u butima. U fiakl ne baa wa, u juonpaala kul bit k sik tinŋ ni wa. Kaagbennu pa Babilonn u biit panna. Yin mun tienm nan baa mun laa tie liebbienu nba ne. ¹⁶ I laa te k sua buul jiet tinŋ manŋ ni kuo k jaan jieti. Jaŋmaani saa suol saam nba kul bel duo ni k dukin bɔnbiil nba saa baal l duo ne paak, k sua kul n ŋmat k kun u duo ni. ¹⁷ Islael tieb tie nan pei nba bɔt k yanbɔl weib k yatib nie. Asili kpanbale lekib sinsin; k Babilonn kpanbal Nabukodonosal kɔn kɔn b kpaba. ¹⁸ L paak kaagbennu jakonpaalɔ yet a: min nba tie Islael yennu ne n saa dat Babilonn kpanbal nan u nib tubl, nan maa lin dat Asili kpanbal tubl bianŋinba ne. ¹⁹ N saa jen nan Islael tieb b tinŋ ni; B saa di jiet nba pia kunkonn nba k b kamel ne nan Basan yent nu ne. B saa di di k gbuo jiet nba kul k b luon Eflaim nan Galaad jual paak. ²⁰ Kaagbennu yet a: yuo manŋi baal b saa lɔn yanbonm nan biit Islael nan Suda tieb ni ŋaan b kan la. K maan n nyik cab binba tenn k n nyikib ne waa. ²¹ Yennu yet a: lekin man duo nba mantik kɔ kunkɔnn, leki man l doi niib. II kpib, k biilib, k belib! ii tun linba kul k min kaagbennu wanni. ²² Tɔb yikini gbia tinŋ manŋ ni, k bɔna biil lenŋ bonciann. ²³ Babilonn niib tuol ŋanduna kul k bit bit, k mɔlane l jaal mun bia biila, Babilonn ji saa baa digbanlia sinsiikin ! ²⁴ Babilonn kon nan min kagbennu. K baluk nba ni k pii k guuna ŋaa k a k mi ne. ²⁵ Kaagbennu luot k yaan sian ninba k u jatiat be ne wa; U wutuol nie k u nyin u jakon tiat ne. K maan min yomdaanɔ nba tie kaagbennu jakonpala tuonn k yen tun Babionn duo ni. ²⁶ II kaan k lint man Babionn duo, luotl man b binbua kul, i taan taan linba be l ni k biil l kul. K sial laa tenn nan waa ma. ²⁷ II kpi b bonkobt na kul, k kɔt kɔtib ! yubonn baal b paaka, yuo baal nan bin dat b tuba wa. ²⁸ II gbiin man kunsantinna wuyikini, binba tiin k nyi Babilonn tieb pann bianŋinba, nan baa din tun linba k biil u ŋasakak ne. ²⁹ Yiint talbantuala ne, binba kul ban talban tɔnu saan man k kɔn nan Babilonn. Kokint man k lintduo manŋ k laa te k sua nyi, i tun man k jiinib nan baa tun bianŋinba k tien lieb ne. K maan b laa tuun k l tie wantin mɔnŋ tuonne k tien min kaagbennu nba Islael tieb kasi yennu ne. ³⁰ L paak b saa kpi b nasinm sɔni ni, k biil b Jakontieb kul daal, min kaagbennu e pak. ³¹ A mɔk japaat fin Babilonn ! l paak min yomdaan nba tie kaagbennu jakonpaalua ne kon naa. K maan a yuo baal nan man dat a tubla. ³² Japadaanɔ saa gbiat k baa, k sua kan fiinɔ, n saa juo muu u digbanbit ne kul, k lin di l yent kul. ³³ Kaagbennu yennu nba tie jakonpaalɔ yet a: Islael tieb nan Juda tieb kul taan k kua muksuk ninŋa, k binba kɔn k nyannib k fat'b k kun nanm sii diab, b kan tuo k ŋaabi. ³⁴ Ŋaan wunba saakon k fatib ne mɔk panŋ k paal, u sanne tie kaagbennu jakonpaalua. ŋua tiɔnŋɔ saa gaal b paak. K baal nan biak Babilonn duo ne ni. ³⁵ Kaagbennu yet a Babilonn tie kuume, u niib, nan kpanbal, nan u yanfodanm ne kul, juko saa kɔn nam. ³⁶ Juko saa kɔn nam faak sɔkini nba ne kul ! b tienan jatib nie ! Jukoo sa kɔn nam u jab nba cek ne kul b mɔk jaŋmaanciɔnŋ. ³⁷ Juko saa kɔn nan b taami nan b tantolit ne ! nan nibuolu nba kul be nam ne ! Bin kpant nan puob ne ! Juko saa kon nan ŋalman ne kul ! k l kul k tien yann. ³⁸ Yenkuonime saa set k b duo ne kul nyum n Fual. K l tie duo nba gbie nan tingbanae; k l tingbana. ³⁹ L paak muuk ni bɔnkob kinkata nan nuanbit kul saa baal gbie Babilonn; Niib ji kan ban k kua l duo ni. L duo ji kan ban k tant. ⁴⁰ Linba sa tun Babilonn ne tie nan linba din tun sodom nan Gomol yuo nba k n din biil k kpab nan doi nba kpiab nie, sua ji kan ban k kua lenŋi. Min kaagbennu pak. ⁴¹ Niib nyii ganŋ po digbann ne k baat digbanjaann nba be banfokil, k kpanbala tien sil nan tɔb. ⁴² B dia b talbana nan b takuobiwa, k tie nitont nba k tiin ninbaaɔk; B fuul tie nan mɔkgbenŋa fuul nie. Yuo nba k b jak b taami. B tien siil a bin faa tɔb nan fin Babilonn. ⁴³ Babilonn kpanbal gbat labaal ne wa, u nii banŋ k suanne, k jaŋmaan ciɔnŋ suolɔ k l tonu tie nan puo nba kpan laa gbaa nan matuk ne. ⁴⁴ Bianŋinba k yanbɔl tuu nyii fuol nba buak Suuldan mɔkil k do mɔpaaɔŋ ni ne, n nie k min yennu saa baal k te Babilonn tieb n cial k nyi b duo ni. K tuandaanɔ nba k n gann ne sii dia digbann ne. ŋme k b saa yekinɔ nan mini ? ⁴⁵ L paak gbiintil man min kaagbennu nba lol k suol bianŋinba Babilonn duo paak, nan maa luon man tun linba k tul l duo niib, b saa suolib k cakinm nan pebit nba k mɔk paalu ne b saa bit b binbibuol. ⁴⁶ Babilonn baa yuo nba, tinŋ saa nik k wiyikini saa gbat digbanlia ne ni.