¹ Yennu din pak ki tul seelemi ki jiin digbana bocian po. ² Ki piin Ejipt waa paak linbae na, ki jiin Ejipt kpanbaal ki babilonn kpanbaal Nabukanesal din nyannib kalkenis duo ni, ki li kpia nan yuflat mɔkil na. Juda kpanbaal yehoyakim naan bina ŋanna nie, yennu din yeta: ³ Ejipt jab saakab yet a: tient siil nan i naagbankɔŋa man, ki saan taab. ⁴ Baant i taanii ki Jakib setil caabu ki yil i kut fokilii ŋatil i kpana man. lian i jatiat. ⁵ Ki yennu boi a n laat bee? Bi ŋmat puol nan yanputuko bi paak bi jabe, ki Jaŋmaanii yentib, ki bi cial nan bi paŋ kul, ki ki jiant puolpo. ⁶ Binba leŋ cial nan paŋ na, ŋaan bi kan paaki job na kan boti. Gaŋ po nba kpianyuflat mɔkil na nie, ki bi kpiatil baa. ⁷ Ŋmee gbiet nan nail nan nail Monkil na nan mɔkil nba tuu gbeki do mɔkigbiaɔŋ na? ⁸ Ejipt tiŋ naan nail mɔkil na e, nan mɔkil nba tuu gbie ki do mɔkigbiaoŋ na. Ejipt yeta n saa fiile ki leken dulinya ki biil doi nan niib nba be doi maŋ ni na. ⁹ A te ki taanii naii saa, ki tolit na ii somm ki te ki Jab na-ii saa: Jab nba nyi Libi nan Sudan ki dia naagbankɔŋa na. Nan talibaiila nba nyi lidi na. ¹⁰ Yabint daanɔ yennu nba tie yomdaanɔ na daale na. Dinnae ki u saa dat u datai tuba. Dinnae ki u saa pa jiin niib. U banjiak saa ŋmamm nan baa tan saa gbuoki nyu bi sɔn nan ti nan ti pal nba tan saa maak. Donnae ki yabin daanɔ yennu saa mann maluŋ nba si be gaŋ po, tiŋ nba na yuflat mɔkil na. ¹¹ Ejipt tieb i saa gaalat tiŋ ni ki saa lonn tebuk. I tebuk na kpann kul tie yanne, sial kaa ki saa tuli laafia. ¹² Sua kut gbat ki i mɔ, digbana gbat i fei dinupowa. Jayennɔ tuu gbiat u luae, ki bi banlee n kpab baa. ¹³ Yuo nba ki Babilonn kpanbaal Nabukanesal baal a wun leŋ Ejipt na, e, ki yennu paak tulin a. ¹⁴ A muant maan maŋ Ejipt doi ni kul, ŋanne tie Migdol nan nof nan tapane. Ki yet a tient sii man ki kɔn fat i mɔŋ. Yaa mɔk linba kul, bi saa biilil taab niwa. ¹⁵ Bee kii nijaanna nba mɔk panni na baa, ki kan fit fiiti? Yennu e faa lub tiŋ ni. ¹⁶ I jab na gbiatile, ki baa, yennu tuu paak utua a kakitil, ŋaant tin kun ti uiib buol ki nyi ti datai (nuuni) taakuobini. ¹⁷ I lebbit Ejipt kpanbaal, sanpann, man ki lii tie fuut daanɔ nbal ŋaan ki u yiikuo galɔ. ¹⁸ Min yabint yennue tie kpanbaal, mine tie yennu nbafo na. Tabol jual nba fɔk ki gal jua kul na, ki kamel kunkonn nba kpia mɔkigbeŋil ki fɔk biaŋinba na. N nae ki wunba saa leka ne paŋ siitie. ¹⁹ Yimm Ejipt tieb, tient siil man ki bin suoli ki saan nani digbangann. Nof saa kpant kpant kunkuot, ki tie langbent nba ki sua kaa leŋi. ²⁰ Ejipt tiŋ ŋan na naasal ŋann nae, ŋaan ki kabik nyii ŋaŋ po ki baal lekɔ. ²¹ U jab nba ki u poib na gbal nan naabit nae. Bi ki set ki kɔni, bi kul ŋmat ciale bi biilu daal baala, bi buontu yuo baala. ²² Ejipt jab tiine ki gan jat nan waɔk nba tuu foina. Yuo nba ki datai na baat bi saa lekib nan pajalaenan jab nba tu cua tiini na. ²³ Ki biil fuoa na. Bi Jab na yab ki kaa kanni, bi yab cie naasuut nan. ²⁴ Ejipt tieb dii feiwa. Gaŋ po tieb nyanniba. Minn yennu paak na. ²⁵ Yennu nba tie Islael tieb yanbint daanɔ na yeta, n saa dat Amonn nba tie Tebes tingbannu na tubil, ki kpab nan Ejipt tingbanna nan li kpanbaala. N saa jii Ejipt kpanbaale nan bin nba duu u po na kul. ²⁶ Ki kubin binba luon bin kpib na ŋamme tie Babilonn kpanbaal Nabukanesal, nan u jab. Ŋaan li puol po niib bia tan saa kua kal Ejiipt, nan baa din kal biaŋinbana min yennu e pak na. ²⁷ N niib i daa tiin Jaŋmaani nan Islael tieb, i daa te ki yan puti. N saa nyinni tingban banfɔkil maŋ ni sianinba ki tie yommina. I saa jen gun ki sibe i yan ni i sii be fannu ki suakan te ki Jaŋmaani n suoli. ²⁸ N saa baal i buol ki tan fati n saa biil digbana nbakul ki n yati kiisaan leŋ na. Ŋaan n kan biil i mɔŋi. Ŋ saa dat i tubawa, ŋan mii daal yuo nba n sii daal nan lomme, min yennue pak na.