¹ L pool po, k yennu din bikin Ablaham, k yetɔ a: Ablaham ! k u tuona: mine ne ! ² K yennu yet a: jiin a bija, a biyenmil Isaak, wunba k a luonɔ ne, kii saa Molija tinŋ ni, lenŋ n saa wanna kunkonn nba paak k a saa jiu k mann mujuonu malunŋ k tulin. ³ Sanŋapob ni k Ablaham fiil k jii malunŋ daat waan k lol bonŋ paak, k jii u bija Isaak nan u tuontunna banle k pukin k b gaal sɔnu k ji saa siaminba k yennu wannɔ ne. ⁴ Daa ŋantaa daal, k Ablaham ŋaant ninbina, k la l penŋ k l be banfakl a. ⁵ K Ablaham yet u tuontunna ne a: ii be nne nen bonŋ ne man, k min nan ŋaajua n saan sianninba ne k saa jiant yennu k jen. ⁶ K Ablaham jii malunŋ daat ne , k jiin u bija Isaak , ŋaan k u mɔnŋ dia jukbik nan musankuann. K b banle lakin tɔk k saa. ⁷ L yuo manŋe k Isaak boi u baa Ablaham a: N baa! k u jiin : n bik mine ne ! k Isaak boiɔ a: n la daat nan muuwa, ŋaan pieuk nba k a saa mann malunŋ be lia? ⁸ K Ablaham jiin a: n bik, yennu mɔnŋe saa tul malunŋ pieuk. K b banle ji tɔk k saa. ⁹ Baa saa baal siaminba k yennu wannɔ ne, k Ablaham maa malunŋ binbintl, k kɔnn daat ne k paan l paak. K suol u bik Isaak k lolu taa nan nii, k paanɔ daat nba k u bo paan binbintil paak ne. ¹⁰ K Ablaham ji nuat juk, k don nuu, a wun kɔtu bik. ¹¹ L yuo k kaagbennu malaka be sanpapo wa ŋaan tian nyiinɔ a: Ablaham ! Ablaham ! k u jiin a mine ne ! ¹² K malaka ne yetɔ : ii mi k a tun a nuu bik ne paaki, k bia daa siitua, k maan mɔla nee k n bann nan a tiin yennun k k wuunɔ a biyemil ne. ¹³ K Ablaham din ŋaant ninbina, k sua k pejak see, k jagotuk tɔk u yii na, k Ablaham saan lɔkitua, k baal nanɔ k tan mann malunŋ k l set u bija taabuok ni. ¹⁴ Ablaham din pul lenŋ Seeova siile. L paak e tien k dine niib yiena: kaagbennu kunkonn paak yennu saa tula. ¹⁵ K kaagbennu malaka ne ŋanm k yiin Ablaham taal muunle pak, ¹⁶ K yet a: faa tun linba ne, k k wuunin a biyemil ne, min kaagbennu, n pol nan n mɔnŋ paak , ¹⁷ N saa tien piisin yaabuona paak k bia saa te k a yaabuona n pɔt k cie sanpaapo ŋmaabola nan mɔkl paak tanbiini, a yaabuona tuu tan saa kɔn nyann b dataiye. ¹⁸ L saa nyi a yaabuanie, k n tien piisin dogbana kul paak, k maan faa sa n mob ne paak. ¹⁹ Ablaham nan Isaak nba ŋmat jen u tuontunna buol, k fiil k tɔk kun beelseba duo nii, k maan Ablaham din kua Beelseba nie. ²⁰ Linba ne puolpo k b baal kumi Ablaham nan u ninja Nahol ŋaapuo Milka mun malɔ bonjai. ²¹ U bikpelik sann din tie Us-e, k bus waa u paak, Kemel, wunba tie Alam baa ne waa u paak, ²² K pakin keesed, nan Aaso, nan Pildas nan Sidlaf nan Betuel. ²³ Betule mal Rebeka. Milka din mal bonjai banniin nee k tul Ablaham ninja Naahol. ²⁴ Naahol ŋaapuobik luuma mun din mal Teba nan Gaam, nan Taas nan Maaka.