¹ Kaagbennu mɔ maan pak mɔbona nae: ² Nisalik bija, nmantl a manunm Islael juat na po, k sɔkin mɔmaan k wannib! ³ A saa yeta: Islael juat, gbiintl yonmdaanɔ kaagbennu mɔmaan! Na e piak yonmdaanɔ, kaagbennuk tien juat, nan kunkona, nan buot sinsunŋ nan bat: Gotl, n saa t k jukbanjiak n biili k bia bit bit i malunt bin binta na. ⁴ I malunt binbinta na sa beta, i yonnu cicieli sa kɔnn kɔnn na, k n saa t k i kpo kii gbanan kpienna n dual i pata buol. ⁵ N saa t Islael waas gbanan kpienna dual b pata buol, k bia yat b kpaba b malunt binbinta buol. ⁶ Siannba kul k kua, b doi na bilee, k b malut bin binta yel, b malunt binbinta sa tien yann k b nyik, b pata sa but but k bot, b yonnu cicieli sa kɔnn kɔnn, b bona kul n tien yann. ⁷ Nikpienna saa dual l kula po, nanne sa t k yin bann nan mine tie kaagbennu. ⁸ Ŋaann saa t k siab n bial i nin, k b kan fit kpib nan juk banjiak, yuo nba ki yat tin saa digbangana na ni. ⁹ I niib nba bia be digbangana ni k tie kɔnsaana na saa tial nan mine t b yennu, k maan n sa lebt b pala cinconm nan kan gbat maan, k b ninbina nba t k b tuun jakt tuonna nba k b tuun b pata buol na nii b sii nan b mɔnŋ, k maan tuonbit nan yanbɔntona nba k b tuun na paak. ¹⁰ Ŋanne k b saa bann nan mine tie kaagbennu, k l k tie yann kan dal kan dal b tuba k bia tienm muksub. ¹¹ Nae piak yonmdaanɔ kaagbennu, poi a nii, cibin a taa k yet a: wuiwui a! k mann ninbatl, k maan tuonnu nan bonbilankant nba k Islael ŋaak tuun na paak, b saa kpo tab nie nan jukbanjiak, nan kon nan yial biit. ¹² Wun nba bann fuok, yial buko saa kpi'u, wun nba naak b saa kpi'u nan jukbanjiak, wun nba tenn k bial kal kon saa kpi'u, nae k b saa bann n wutuol panŋ nba tee. ¹³ K i saa bann nan mine tie kaagbennu, yuo nba ki la nikpienna dua dua b pata buol na, nan b malunt binbinta buol, nan jagbai nba doki paak, nan juant kul yula paak, nan tini masuu, nan banta kul ni nan siannba kul b mann tulali malunŋ k l nublu man k tien b pata na kul. ¹⁴ N saa tant n nuu k bilib, k bia t k duo n dual yann k ninbatl i be nan Diiblaa kunkouk na, siannba kul k b kua lenŋ. Ŋanne k b saa bann nan n tie kaagbennu.