¹ Fin, pakn fabni mɔbona, k tul Islaael kpanbala waas. ² A yet b a: A naa din tie ŋmee e? Yanbɔl naanŋ u din be yanbɔla ni e: yanbɔlbil sunsuuk ni k wabl u waas. ³ U din wubl u biyenŋ, k u tan kpaat, k bann nant suolu, k suol niib. ⁴ K doi gbat k b piak u po, k suolɔ b buotuk ni, k jii banŋ, k tuun miana ni, k saan nan'ɔ Egipt duo ni. ⁵ K yanbɔlnaaɔng din guul k tan baak, k bann wuu guu u kpaann u mɔnŋ e , k u bia jii biliek k tien yanbɔlja'nassimɔ. ⁶ U din tɔk nan yanbɔla, k tan kpaat, k bann nant suolu, k so niib. ⁷ U din maab kpanbalaŋei, k biil digbana. Duo, nan lin nba kul be lenŋ, u din tuu biete, k biil. ⁸ K doi nba lint'ɔ taan lieb, k kɔn nan'ɔ, k pii u tanbal, k u baa b buotuk ni. ⁹ K b tuun banŋ u miana ni, k tien'ɔ ŋmangɔnŋ ni, k saan nan'ɔ baabiilone duo ni. ¹⁰ A naa din tie nan fin na e, k tie fiinyi nan tiik nba k b bul'ɔ nyunkpinŋ na u din luon luona, k mɔk yiana bonciann, k maan nyun paak. ¹¹ U din mɔk yiana, k l bɔ lanbanŋana, k kpanbala jiikt k tie danma. Waa din kpaat bannu na, u din dɔkn tilei, niib tuu laat'ɔ banfɔkl a, l maan u mɔk yiana bonciann. ¹² Ŋaan b din tan fukt'ɔ e, k laa lu bankl a, k yendo po wɔunŋ daa k u luana kuol. K yiana patpat, k kuol, k muu dii. ¹³ K mɔtaana k b ji laa wuu'n paanpiennŋ ni, sian nba k tinŋ kuon, k taak k daa. ¹⁴ K muu nyii u yiana na ni, k dii u luana , u ji k mɔk yiana nba ŋan, k kpanbal saa tien daml. Na tie fabni, k i saa jii fabni.