¹ Mɔtana, Islael gbintl senni nan yiikuot nba k n tumii na. i jiil k yun nann tuonn, k fiit k ji fo, k bia kua duo nba k kagbennu nba tie i yiejanm yomdanɔ tieni na ni k yent. ² I daa puki sial linba k n tieni na ni, k bia daa nyint sial biaki: ŋaan jii cɔlin kagbennu nba tie i yomdanɔ na senni nan ma wanni biaŋba na. ³ I ninbina laa linba k kagbennu tun Baal Peol buol na waa: kagbennu nba tie a yomdanɔ na biil i sinsuuk ni binba kul din saan Baal Peol buol na. ⁴ K yinm nba din jii i mɔnŋ k gaan nan kagbennu nba tie i yomdanɔ, i kul mɔk manfuol dinna. ⁵ Gotl, n din tumii senni nan jiikuot nan kagbennu nba tie n yomdanɔ na nba wannin biaŋbae, k fit yin jiil k sonm nann fanu duo nba k i saa gaal k yent na ni. ⁶ I cɔlin k bia ki sonm l paak fanu; k maan ŋanne si tie i yanfuon nan i miinu buol ŋanu, binba gbat k b piak senni na maan sa yet a: niibuolu na tie daansiab nba tie yanfuon danme k bia mɔk miinu e! ⁷ Niibuolu gannu lanne poe be k mɔk yennu k u naakib nan kagbennu nba tie tiyomdanɔ nba tie biaŋba yuonba kul k t yiinɔ na? ⁸ K niib buolu be mɔk senni nan yiikuot k l tie fanu, nan senni nba kul k n tieni dinna na? ⁹ I mi k tie suon na ŋnaan suol a mɔnŋ, ki goli a siek, daal n tu daal kul a manfuol kul ni, k daa tanmit linba k a ninbina la na k l daa nyi n paal ni; a tumi a waas k bin tumi yomdanɔ. ¹⁰ I tian daal nba k a din set kagbennu a yomdanɔ tuann Holeb na, l yuo k kagbennu yet ma: taant niib na kul n buol! n luon bin gbat n maan me, k fit k bi ŋmamin yuokul bi manfuol kul ni tingbonŋ na ni; k fit k bin tumi b waas. ¹¹ I din cat k nakin jual na buole. i din lint jual nae k muyelu din nyi jual na sinsuk ni k do sanpaapo. Bunbonn din be, nan muunyuk nan bunbon ciaɔnŋ k l tie nan nyiaɔk na. ¹² K kagbennu din paak naani muu na sinsuk ni, i din gbat kunkɔl k l paak, ŋaan i din k la niluo, i din gbat kinkɔl yenn kuae. ¹³ U din waani u senni k bia waani nan yin saak u senni piik nba k u din dian taanpot lai ŋanle paak na. ¹⁴ L yuo na, k kagbennu din betin nan man tumii u sennu nan u yikuot k fit k yin jiil k tun nann tuonn duo nba k i saa gaal na ni. ¹⁵ Daal nba k kagbennu din paak naani muu sisnsuk ni Holeb jual buol k i din k la sua na, i suol i mɔnŋ nan i sei man, ¹⁶ K tan daa bil i monŋ k kpiel sial k l tie patl ki nan jua n nae k puo, ¹⁷ Bonkobk ninnauŋ nba be tingbonŋ na ni, naunŋ ninnauŋ nba yuuk sanpaapo, ¹⁸ Bonkobk nba fulin u paak tinŋ ni janŋ ninnauŋ nba be nuyn ni ko kpingbann tinŋ ni. ¹⁹ Suot a mɔnŋ, k tan daa goktl a ninbina sanpaapo k laa yennu, ŋmaalik nan ŋmaabila, sanpaapo nauŋ kul k a tan saa maan k gbaan b tuann k jiantb, l tie bona nba k kagbennu a yomdanɔ bɔkt buolu kul nie, nan sanpaapo kul. ²⁰ ŋaan yinm ŋaalin kagbennu jiie, k nyini wahala dinu ni egipt a yii tie buolu nba k u yennu nan yaa tie dina na. ²¹ Kagbennu paal din bil n paak i paake, k u din pol k yeta n kan puot suuldain k n bia kan kua digbanŋann nba k kagbennu nba tie a yomdanɔ nba tula a fan yent na ni. ²² N saa kpo duo nba k t be na nie, n kan gaal suuldain, ŋaan yinn saa gaale k yent digbanŋann manŋ. ^{23 24} Suot i mɔnŋ k daatanmit kagbennu i yomdanɔ mɔlol nba k u lol nan ni na k daaa tie bonnankal sial nba k kagbennu a yomdanɔ yeta aa da tie na. K maan kagbennu a yomdanɔ tie muu nba die k tie yennu nba mɔk jawuuk. ²⁵ Yuonba k a tan mɔk waas nan yabuona, k i be duo manŋ ni k l wei, k i tan tanm k nan bonnankal sial, li tie k i tien linba k ŋaan kagbennu nba tie i yomdanɔ na tuann, u saa donn wutuole naa ni, ²⁶ N jiikt dinna n siala i paak sanpaak nan tinŋe,i saa kpo k buont yian duo nba k i saa gaal k yent suuldain puotl po na! i daa ki yab, k maan u saa biil i kule. ²⁷ Kagbennu saa yaati buolu ganu sinsuk ni, k i saa tenn waamii na ki be buolu nba k kagbennu sa saan naani na sinsuk ni. ²⁸ Lenŋe k i si jiantl yenni nba k niib nann nan b nii k l tie daat nan taana na, b k laat, ki k gbia, ki k di, k bia k ban nan be nan b be na. ²⁹ Lenŋe biak k a bia sa lon kagbennu a yomdanɔ k sa lau, li tie k a lomɔ nan a paal kul nan a siek kul. ³⁰ Muksuk yuo nie k linba na kul sa baala. l yuo, nan yuonba baat na nie k a saa ŋmaat yen kagbennu a yomdanɔ k gbiint u kunkɔl; ³¹ k maan kagbennu a yomdanɔ tie ninkpaanbaunŋ yennu nba kan ban nyika k bia kan biila ni; u kan tanm mɔlol nba k u din lol i baa na. ³² I boi yuokpel nba din gaal na, laa nyi daal nba k yennu din nan nilɔ tingbonŋ na ni, laa nyi sanpak piinu nan l yuontu po: k loon bonjann na buolu na ban tuma a, ko k gbat l buolu waa? ³³ Buolu lane na poe ban gbat yomdanɔ kunkɔl k u piak muu sinsuk ninŋ, nan bikna, nan yinm na ŋaan be u manfuol ni? ³⁴ Yennu lannɔ poe ban bikin a wun gaal u buolu ŋaanu sinsuk ninŋ, nan bikna, nan nyina, nan baktnaunŋ tuona nan kunkon gbenŋle nan u panŋ nuu nba tant k tun jaaŋmaami tuona nan kagbennu nba tie yomdanɔ nba tun biaŋba Egipt i ninbina ni na? ³⁵ A din tie siala danɔ linba kul tun na ni, a fan fit bann nan kagbennu tie a yomdanɔ e, k jasua ka k tie nan ŋɔ na. ³⁶ A gbat a yomdanɔ kunkɔl sanpaapo a wun kpaamae, k tingbounŋ na ni k u te k a la u muu gnenŋl, k a gbat u kunkɔl muu na sinsuk ni; ³⁷ U din luon a baanba, k gann b puolpo binba wa n; k jii u mɔnŋ panŋ k nyini egipt; ³⁸ U bel buolu nba gala k bia yab k mɔk panŋ a tuonn po a wun te fan kua b duo ni, k jii tula a fan yent nan fa laa biaŋba dinna na. ³⁹ Bant dinna ki bia ki dia a pal ni nan kagbennue tie a yomdanɔ, l sanpagbouŋ ni nan tingbouŋ na ni yensua ka k tie nan ŋua na. ⁴⁰ K i cɔln u yiikuot nan u senni nba k n tieni dinna na, k fit k fi be a yaamani, fin nan a waas nan a yaabuona k a manfuol saa fɔkit duo nba k kakgbennu a yomdanɔ tiena na ni. ⁴¹ L yuo k muois ŋann duoi ŋanta suuldain puotl po yendopo, ⁴² k li be ki sinmit binba k ban k kpi nilɔ ŋaan k u tu k tie u dataak na, bin saan kua duoi manŋ ninŋ k faat b manfuol, li tie k b duoi manŋ ninŋ yenn. ⁴³ L din tie: Betsel nba be tinkuok paanu ninŋ lubinit jent ninŋe: nan lamot nba be Galaad, k tie Gadit yent, nan Galon nba be Basan k tie Manasit yent nae. ⁴⁴ Linba na din tie senni nba k Muois tul Islael waas . ⁴⁵ Gotl senni nan yikuot nba k Muois din nyi egipt na puolpo. ⁴⁶ L din tie suuldain puotl poe baauk nba k fɔk nan Bet Peol nae Sihon duo ni, k Amolen kpanbal din kua Hesbon k Muois nan Islael waas din kpiu ba din nyi Egipt na puolpo. ⁴⁷ B din gal u duo nan og nba din tie Basin kpanbal yale. l Amolen nba kpanbal banle na din be suuldain puotl poe yendopo. ⁴⁸ B yent din dian Aloel ki k fɔk nan tolen mɔgbann nae la nyi Almon jual k sa tu sion nba be Elmon na, ⁴⁹ K din ji paanu nba be suuldain puotl po yendopo k sa tu mɔkl nba be paanu manŋ ninŋ k be Pisga na.