¹ Bina ŋanlole kul yin tuo nyik cab b' mba dia i pana na kul. ² Gotl yaa tuo saa tien biaŋnba na: wunba kul kpent likilii k tul u ninja wun nyik k piin pann manŋ; k daa gaan likilii manŋ k maan yennu piin pann manŋ a. ³ A saa fit gaal ni ganm nba kpent linba na; ŋaan i daa gaan linba k i ninjanm kpeni na. ⁴ Sua tan kii tie nandanɔ a ŋaak ni k maan yennu saa tien pisin i paak; tinŋ nba k tieni na ni. ⁵ Lii tie k a saak; k bia waa linba k wanna na kul fannu. ⁶ Yennu saa tien piisin i paak nan ma senn mɔsonn na; k i tan sii kpentil likilii k tien digbana bonciann niib ŋaan i tan kan saan k kpent sua buol siali. T tan sii dia doi bonciann k ŋmakitilb; ŋaan do sau tan kan ŋa k ti nii. ⁷ Lii tie k nandaan sua be k tie a ninja k duo nba k a yonm daanɔ yennu tiena na ni; a daa mɔk nii juatu; k wuunɔ. ⁸ ŋaan a nuu i yaa; k a kpentɔ l'mba kul k u luon. ⁹ Suot a mɔnŋ k mantik mɔk tonu k dukii a: bina ŋanlole nba tie pan pannu binn na naki na, suot a mɔnŋ; k daa mɔk ninkuonii nan a ninja nba tie nandaanɔ na; k minnɔ. k u saa mann paak k biila jennu tuann; k a tien biit daanɔ. ¹⁰ Tulmɔ ŋaan daa pabii; k maan yennu saa tien piisin, a tuona kul paaka. ¹¹ Yuo kul nandaanm sii tun bee; l paak k n tiena sennu na: a nuu i yaa kii tien a ninja; nandaanɔ nan talas daanɔ a duo ninŋ. ¹² Lii tie a ninja kuo niipuo yenɔ nba tie Islael nilɔ; tien a daabil; u saa tun k tula bina ŋanluobo, ŋaan bina ŋanloole ni; k a nyikɔ wun kun. ¹³ K l yuo nba k a yaaa kunnɔ; a daa ŋaanɔ yanni. ¹⁴ ŋaan nyinn sial; l'nba k yennu tula na ni; k tulɔ; l pei; l jiet nan l daam kul. ¹⁵ A mun tial nan a din tie daabble Egipt tinŋ ni; k yonm daanɔ yennu din daa; l paak k n tiena sennu na. ¹⁶ L ii tie; k a daabl yet a; n k luon k n nyi a ŋaak ni, k maan u luona k a ŋaak binbenŋ man u po. ¹⁷ ŋann fan jiu k saa nanɔ a ŋaak tanmɔb ŋann buol, k fit u tubil; k u ji sii tun tie a daable, n nee mun k a saa tie a daab puo. ¹⁸ A daa to k l tona nan faa saa ŋaa a daable yann na paaki, k maan u tun tula bina ŋanluobo na; l baal nilɔ nba saa tun tula k a pau taa fuunu mun lie na wa; i tuun n na; k yennu saa tien piisin a tuona na kul paak a. ¹⁹ K a saa jii bonkob sinsinn nba k b malɔ; laa tie bonkob bit; kuo l bonkob saakat; k mann malunŋ k tul yennu. a kan jii a najak nba k b sint malɔ k kou kpaabu; ku k polii pei nba k b sint malib na kobiti. ²⁰ A tuo saa ŋman l bonkobite binn kul fin nan a ŋaa tieb kul; sian nba k yennu saa gann na. ²¹ Lii tie k bonkobt manŋ yenɔ mɔk dam siak; u tie taakpelik; kuo juanŋ; kuo daan sua; a daa mann malunŋ k tien a yonmdaanɔ yennu. ²² A saa kpiue a ŋaak ni k ŋman; i kul; munba tie biit daanɔ; kuo k k mɔk biit kul n ŋman nan yaaa tuo ŋman muuk ni bonkobuk biaŋnba na. ²³ Sɔn kukuae; k a kan di; a saa munne tinŋ ni nan nyun na.