¹ Moyiisi ń den see li gbandieli bulñɔbu kani, O Diedo den yini o li gbandieli nni. O den yedi Moyiisi, ² Ke wan yedi Israyeli yaaba ya maama ne: "I siiga nni, nilo ya cua yeni paabu O Diedo po, wan taa nua, bii pia, bii ŋuabo. ³ ŋin cua yeni ya yanga bu paabu po, ya tie naatonli, ki tie padjuukaali, o baa tie ya nua n ki pia pɔdi. I ba dadi ki cua yeni o li gbandieli bulñɔbu kani, ki diidi o ya dagdi O Diedo po. ⁴ Li buali ke ŋan maani a nuu li naatonli yuli po. A ya tieni yeni, O Diedo ba ga li yanga padli, ki di sugliŋan tieni ya tuonbiadi kuli po. ⁵ Yin padi li padyanga O Diedo nintuali. Haarɔn bijaba yaaba n tie salga yidkaaba ba nagni yeni mi sɔma, ki miimii ki lindi li padbinbindli li gbandieli bulñ̃ɔbu kani. ⁶ I ba sidi ki ñani ki yanga gbangu, ki jiajia ga nanjena. Ki yuandi ki ŋuudi tugu nni nandi, yeni a taabiana. ⁷ Haarɔn bijaba ba maani ti daadi li binbindli po, ki cuoni u mu. ⁸ Lanwani ii, bi ba maani a nanjena, yeni li yuli, yeni mi kpama ya daadi n co yeni po. ⁹ Salga yidkaaaba, yendo n ba juu a nanjena yeni ń buodi li padbinbindli po cain. Yeni, u nuulmanu ba mangi O Diedo pali. ¹⁰ A paabu ya tie pia bii ŋuabo, wan ya tie bontonga yua n ki pia pɔdi. ¹¹ I ba padi ga O Diedo nintuali, li padbinbindli jienu po, ki ga mi sɔma kuli tadkga nni. Haarɔn bijaba ba miimii li sɔma, ki lindi li padbinbindli. ¹² I ba sidi ki yanga, ki jiajia ga nanjena. I ba ŋuudi tugu nni nandi yeni a taabiana. Salga yidka ba maani a nanjena ki taani yeni li yuli yeni mi kpama kuli ya daadi n co li binbindli po yeni. ¹³ Salga yidkaaba nni, yendo n ba juu li nanjena ŋan buodi li padbinbindli po cain. Yeni, li padjuukaali nuulmanu ba mangi O Diedo po. ¹⁴ A ya pia ya paabu n tie bonyugdili O Diedo po, a ba cua yeni kpajiega bii lanjenaawuungu. ¹⁵ Salga yidka ba taa li ki nagni li padbinbindli kani, ki jia li yuli. O ba juu li yuli, li padbinbindli po. O ba ŋmiani, ki ñani li bonyugdili sɔma, ki miimii li padbinbindli po. ¹⁶ O ba yuadi ki gudi li, ki ñani ku fiagu yeni tugu nni nandi, ki lu li padbinbindli puoli po, ban faagi mi fantanma naani. ¹⁷ O ba padi li bonyugdili fiabi, ki ŋa yin ya cuani, ki da tugdi. O ba yuandi ki juu lan buodi li padbinbindli po cain. Li nuulmanu ba mangi O Diedo pali.