¹ Josuwe den yini ki taani Israyeli buoli nitaanli kuli Cikemi dogu nni, o den yini Israyeli cuga diedanba, bi yudanba, bi buudi yudanba, yeni a jakɔnda yudanba, bikuli den taani O Diedo nintuali. ² Josuwe den yedi li nitaanli kuli, "O Diedo, Israyeli Tienu ń maadi ya maama n ne, 'Hali ya yogu n fagi, i yaajanba bo kua Efrati kpenpuoli po i, Terha, Abrahama báa yeni Nahɔri báa den pugi i buli i. ³ Ama n den ñani i yaaja Abrahama Efrati diema nni, ke o gedi Kanana diema nni, ke n puni o puolŋuani, ki cili Isaaka, ki yaa caa. ⁴ N den puni Isaaka Jakɔbo yeni Esawu. N den kaani Esawu Seyiri juana nni, ama Jakɔbo yeni o bila den gedi Ejipti. ⁵ N den sɔni Moyiisi yeni Haarɔn, ki luni falabiadbuoli kuli Ejipti yaaba po, Lani ń pendi ii, n den ñani i yaajanba Ejipti diema nni. ⁶ Min den ñani i yaajanba Ejipti diema nni, ke bi pundi mi ñincianmɔnma kani, Ejipti yaaba den ŋɔdi ki ba woli ba yeni bi tandanba yeni ti tɔturdi. ⁷ I yaajanba den yigni ki mia O Diedo, ke o bili li biigli i yaajanba yeni Ejipti yaaba siiga. O den cedi ki mi ñincianma milni Ejipti yaaba, ki dini bikuli. I den la min den tieni Ejipti maama. Lani n pendi, i den waagi ki ye mi fanpienma nni. ⁸ N den ciani yi,ki gedi yeni yi Amori yaaba, yaaba n kua Jurden kpenjaali puoli yeni diema nni. Bani yeni yinba den tuogi bu tɔbu, ke n taa ba, ki tieni ba i nuu nni. Nden deli ki yaani ba, ke i gedi ki kali, ki diedi bi diema. ⁹ Lani n pendi, ke Sippɔri bijua, Balaki, Mowabi diema bado den fii, ki tuogi Israyeli yaaba. O sɔni, ki yini Bewori bijua, Balaama, ke ban tuogi ki soli yi. ¹⁰ Ama n den ki cengi Balaama maama. O den juodi ki gaali yi i. Yeni i, ke n den faabi yi Balaka nuu nni. ¹¹ I den puodi Jurden kpenu, ki gedi Jeriko. Jeriko jakɔnda den tuogi yeni yi, bi den taani yeni Amori, Perusiti, Kanana, Hititi, Girgaciti, Hifiti, yeni Jibusiti yaaba. N den puni yinba i, li seli, ki cedi ke i paadi ba. ¹² N den cedi ke a bonyugdibiada kua i liiga, ki deli Amori badtieliedba yeni bi niba, ki yaani ba, ke i dá ki pundi. I jugsiemu yeni i dabanpiemi ka den paadi ba ki deli ba. ¹³ N puni ya kuani ke yii koni, yeni ya dociami ke yii maa, ama ki nan ji kua i niinni. I di ku daamɔngu tiidi yeni olifie tiidi ñuadi, ki nan ki ŋuu bá tiiyenga.' ¹⁴ Mɔlane, yin fangi O Diedo, ki pugi o yeni i dudugdi kuli yeni i yantiali kuli, ki sundi i yaajanba ń den pugi ya buli Efrati diema yeni Ejipti diema nni, ki ya ŋua, ki pugi O Diedo baba. ¹⁵ Li ya ki tiegi ipo ke yin ya pugi O Diedo, lanwani ii, dinne, yinba mɔno ń gandi yin bua yua, ki baa pugi o, li ya tie i yaajanba ń den pugi ya buli Efrati kpenjaali po yo oo, Amori niba yaaba n ye i siiga nni ń pugi ya buli yo oo, ama mini wani ii, yeni n diegu yaaba, tinba ŋua ki pugi O Diedo i." ¹⁶ Li nitaanli den jiini, ki yedi, "Ti kan yaadi ki ŋa O Diedo ki ya ŋua i buli, ¹⁷ Kelima O Diedo ti Tienu n ñani ti Ejipti diema nni, tin den ye naani ti yonbdi nni, wani n tieni yaalidgu bona boncianla, ke ti la yeni ti nuni, wan n ŋua ki guu ti, ki faabdi ti, tin tɔgni naani kuli, yeni tin pendi ya nibuoli siiga nni kuli. ¹⁸ Lanwani ii, O Diedo n deli ki yaani i nibuoli kuli yeni Amori buolu yaaba n ye ti diema nni ne. Lanwani ii, timo baa ŋua ki pugi O Diedo i, kelima wani n tie ti Tienu." ¹⁹ Ama Josuwe den yedi li nitaanli, "I kan fidi ki ya ŋua O Diedo bonŋanla, kelima, o tie ya Tienu n gagdi ki ŋani cain, ki go tie ya Tienu n pia li ponponli; O kan mia sugli i tudma yeni i tuonbiadi kuli po. ²⁰ I ya yaadi ki ŋa O Diedo, ki ŋua i buli, o mo ba lebdi ki tieni yi yaali n bia. O ba bolini ikuli bá yeni wan den tieni yi ya ŋanma kuli, ipo. ²¹ Ama li nitaanli den yedi Josuwe, "Yeni ka, ti baa ŋua, ki pugi O Diedo i." ²² Josuwe den yedi li nitaanli, "Yinba mɔno n tieni i yula po kasiedi, ke i gandi O Diedo, ki baa ŋua ki pugi wani baba i. Bi den jiini, "Ti tie kasiedinba." ²³ Mɔlane, yin ñani ya nilanba buli n ye i tiadi nni, ki lebdi i pala, ki ŋɔdi ki tabni O Diedo, Israyeli Tienu, ki ya pugi wani baba." ²⁴ Li nitaanli den yedi Josuwe, "Ti baa pugi O Diedo, ti Tienu. Ti baa cengi o maama." ²⁵ Josuwe den kuani li daali, o ŋantaado O Diedo yeni li nitaanli siiga. O den bili yiko yeni a ñɔbona Cekema dogu nni. ²⁶ Josuwe den diani li lanbona kuli U Tienu yiko tili nni. O den bigdi tanciangu, ki seni bu ticianbu sɔngu, ke buu fagi yeni O Diedo gbandieli. ²⁷ Josuwe den yedi li nitaanli kuli, "Diidi mani ya tangu ne baa tie kasiedi tipo. Kelima ku gbadi O Diedo ń maadi ti ya maama kuli. Lanwani ii, guni n baa tie kasiedi ipo, li ya tie ke i yaadi ki ŋa i Tienu." ²⁸ Josuwe den cabi li nitaanli, ke yuakuli guani ki kuni o diema nni. ²⁹ Lankuli ń pendi, Nuni bijua Josuwe, O Diedo naaciemo den kpe, ki pia bina kobga n piiga (110). ³⁰ Bi den piini o wan den baa ya tinbiinu nni, Timnati Serha dogu nni, Efrahimi diema juali nni, Gaaci juali nijienu po. ³¹ Israyeli yaaba den ŋua ki pugi O Diedo hali Josuwe miali bianu, yeni ya nikpela n den ye Josuwe kuuma puoli po, bani yaaba n den la O Diedo ŋanbli Israyeli yaaba po. ³² Li nitaanli den piidi Josefi kpaba Ejipti po, bi den piini li kpaba Cekema dogu nni, Jakɔbo ń den daa ya tinfanma Hamɔri bijaba, Cekema báa kani. O den daa li tingaligdibala kobga, ke li tinga guani ki tua Josefi puolŋuani ya tinbiinu. ³³ Salga yidka Eleyasari, Haarɔn bijua mo den kpe. Bi den piini o Gibeya dogu nni, ban den teni o bijua Finehasi ya dociamu yeni nni. U den ye Efrayima juana diema nni i.