¹ Lanyognu, Josuwe den yini ki taani Rubeni, Gada, yeni Manase buolu bɔgdima. ² O den yedi ba, "I tieni O Diedo naaciemo Moyiisi ń den waani yi ke yin tieni yaali kuli. I cengi, ki go cɔlni n ñɔmaama nani min waani yi ke yin tieni maama kuli. ³ Hali lan cili ya dana, ki ban tuoni dinne, I ki sani ki ñɔli i kpiiba, i tieni ki dudi O Diedo i Tienu ń puogi yi ya tuona. ⁴ Mɔlane, O Diedo I Tienu puni i kpiiba wan den niani ba ya yanduanma. Lanwani ii, yin lebdi ki guani ki ban kali i denpo, O Diedo naaciemo Moyiisi ń den bɔgdi yi ya diema Jurden kpenjaali puodma po. ⁵ Yin fangi i yula, ki cɔlni O Diedo naaciemo, Moyiisi ń bili yi ya ñɔmaama yeni ya yikodi, ke yi buadi O Diedo i Tienu, ki ya ŋua o sanu i tuona nni kuli, ke yin cɔlni o yikodi, ki ya taabi o, ki dondi o, ki pugi o yeni i pala kuli yeni i yantiana kuli." ⁶ Lanwani ii, Josuwe den yadi mi yedŋanma bi po, ki cabi ba ke bi guani ki kuni bi denpo. ⁷ Josuwe den teni Manase buolu bɔgdima bi tinbiinu Bacihan, ke ya buolu bɔgdima n sieni, ke o teni ba bi tinbiinu bi kpiiba kani, Jurden kpenu nintuali. Josuwe den yadi mi yedŋanma bi po, ki cabi ba ke bi kuni bi denpo. ⁸ O den yedi ba, "Yi taa mani yin baa ya ŋalmancianma kuli, ki lebdi ki kuni i denpo; i ligi, ti yandi, ti kumɔndi, wula, ti kubɔndi, yeni ti tiayiekaadi kuli. Yin ban bɔgdi i kpiiba yin baa ya tiafagikaadi i yibalinba kani." ⁹ Lanwani ii, Rubeni buolu, Gada yeni Manase buolu bɔgdima den guani ki kuni bi denpo, ki ŋa Israyeli nitaanli Sihilo dogu nni, Kanana diema nni. Bi den guani ki lebdi Gileyadi diema nni, bi diecema nni, ban den kɔni ki paadi yaama nani O Diedo ń den bili li ñɔbonli, ki waani Moyiisi maama yeni. ¹⁰ Ban den lebdi Jurden kpenpuoli, Kanana diema nni, Rubeni buolu yaaba, Gada buolu yaaba yeni Manase buolu bɔgdima den maa padbinbindli ki kpiani Jurden kpenu, ya padbinbindli n yabi boncianla. ¹¹ Israyeli nitaanli den gbadi li maama, ki yedi, "Diidi mani, Rubeni buolu yaaba,Gadi yeni Manase buolu bɔgdima maa padbinbindli Kanana diema nni, Galile dogu nni, ki kpiani Jurden kpenu, Israyeli yaaba diema nni," ¹² Israyeli nitaanli ń gbadi li binbindli maama, bikuli den taani Sihilo dogu nni, ki bua gedi ki ban tuogi yeni ba bu tɔbu. ¹³ Israyeli nitaanli den sɔni u tondu Rubeni, Gada yeni Manase buolu bɔgdima kani Gieyadi diema nni. Bi go den sɔni salga yidkaciamo, Eleyasari bijua Finehasi mo, ¹⁴ Israyeli yudanba piiga, buolu kuli yudanyendo, den yegi yeni o, bi den gandi buolu kuli yua n tie o yudaano i, ke o yegi yeni ba. ¹⁵ Bi den pundi Rubeni, Gada yeni Manase buolu bɔgdima kani, Gileyadi diema nni, ki maadi yeni ba. ¹⁶ "Israyeli nitaanli kuli yedi ne, 'Be n cedi ke i tieni ya tudbiadma ne Israyeli Tienu po, mɔlane, i ji fali O Diedo maama, ki maa i padbinbindli ki baa pugi li, ki sundi o yikodi, ki fiindi mi yenyiema aa? ¹⁷ Ti den tieni ya tudbiadma Pewori dogu nni daa dagdi ii? Ti dá ki fidi ki piini lanya tuonbiadi ti yula po. Kelima li tudbiadma fiini O Diedo pabiencianli ti yula po. ¹⁸ I go ba pegdi ki ŋa O Diedo ya yognu ne ee? I mo ya fiini O Diedo po mi yenyiema, saala o ba fiini o pabiencianli Israyeli nitaanli kuli po i. ¹⁹ Yin kaa ya diema nni ya jɔgni ki kandi ke i kan fidi ki ya ye mi niinni, yin guani ki kua ya diema nni ke O Diedo gbandieli ye, ki kali ti siiga nni. Ama yin da fiini mi yenyiema O Diedo po bii mi paadma tinba ya po, ki guani ki maa i yuli po padbinbindli, ki nan ŋa O Diedo ya padbinbindli. ²⁰ Sera bijua Acihan den ki miidi li kuali, ki taa ya bona n dagdi yeni O Diedo oo? O Diedo pabienli den ki baa Israyeli nitaanli kuli po ka aa? Wani yua den tieni mi tudma yeni den ki kpe o baba ka o tuonbiadi po oo.'" ²¹ Lanwani ii, Rubeni, Gada yeni Manase buolu bɔgdima den guani ki jiini Israyeli buoli yudanba, ki yedi : ²² Ti kpiagdi kuli daano, O Diedo, U Tienu! Ti kpiagdi daano O Diedo U Tienu! O bani, ki ba cedi Israyeli yaaba ń bandi! Li ya bi tie yenyiema bii dudugdi pɔdma O Diedo po, yin da juogi ti dinne, ²³ ke ti maa ti yuli po padbinbindli ki bua tin yaadi ki buli O Diedo. Ti ya maa ya padbinbindli ne, ki bua tin ya padi a padjuukaana, a bonkpiala paabu yeni mi taanyenma salga, ke laa tie O Diedo po, Wani O Diedo mɔno ń buu ki cuo ti, tin paa li pani. ²⁴ Laa tie yeni ka! Ti tieni yeni, ki jie ke saala po, i yaabila ń da ti yedi ti ya yaabila, "Tinba yeni yinba, ti pia be ya ŋantaado i yeni Israyeli Tienu uu? ²⁵ Kelima O Diedo mɔno n bili ti siiga nni Jurden kpenu, ke u tie u bianu, Yinba Rubeni buolu yaaba yeni Gada yaaba, i ki pia ŋantaadobakuli yeni O Diedo.' Lanyapo, i yaabila ba tulni ti yaabila ban buli ki ji da pugi O Diedo. ²⁶ Lani ncedi ke ti jagi ke tin maa padbinbindli, ama li ki tie tin ya yidi salga ka, ²⁷ Ama lan tua kasiedi tinba yeni yinba siiga, yeni i puolŋuani yini ti ya puolŋuani siiga ke ti baa yidi salga O Diedo nintuali i, yeni ti padjuukaana, yeni ti salga yidma yeni ti taanyenma salga, yeni, saala po, i yaabila ń da ti yedi ti ya yaabila, "Yii pia biinubakuli yeni O Diedo.'" ²⁸ Lanwani ii, ti den yedi, 'Li ya tie ke bi ti maadi ti, bii ti yaabila saala po lanya maama, ti ba jiini, "Diidi mani! Ne tie O Diedo binbindli kasiedi i, ti yaajanba n maa li, ke laa tie padjuukaana po, kaa tie salga yidma po, ama ki tie kasiedi tinba yeni yinba siiga." ²⁹ Lanwani ii, tii jagi ke tin fiini yenyiema, ki yaadi ki fagdi yeni O Diedo ka, ki maa ya padbinbindli ne, ki bua tin ya yidi a padjuukaana, tiiluana salga yeni taanyenma salga. Ti kan tieni lani, ki kandi O Diedo, ti Tienu ya padbinbindli yaali n ye o gbandieli kani.'" ³⁰ Salga yidka, Fenehasi yeni Israyeli buoli yudanba, a cuga diedanba ń gbadi Rubeni, Gada yeni Manase buoli yaaba ń yedi yaali, ki sua ki li maama tiegi, bi pali den mangi. ³¹ Salga yidkaciamo Eleyasari bijua Finehasi den yedi Rubeni, Gada yeni Manase buoli yaaba, "Dinne, ti bandi ke O Diedo ye ti siiga, kelima i ki miidi li kuali ki luo ti dudugdi O Diedo po. Lanwani ii, i faabi Israyeli buolu yeni O Diedo pabiencianli." ³² Lanwani ii, salga yidkaciamo bijua, Finehasi den cabi Rubeni, Gada yeni Manase buoli yaaba, Gileyadi diema nni, ki guani ki kuni Kanana diema nni, Israyeli nitaanli kani, ki togdi ba u tondu laabaali. ³³ Ban togdi ya laabaali den mangi Israyeli nitaanli. Israyeli nitaanli den tieni U Tienu balga, ki dondi o, bi ji den ki maadi ya tɔbu ke bi den bobindi, ki ba tuogi Rubeni, Gada yeni Manase buoli yaaba, ki mudi ban kali ya diema nni. ³⁴ Rubeni buolu yaaba yeni Gada buolu yaaba den puni li padbinbindli li yeli, "Kasiedi" Kelima bi den yedi, "Li tiendi kasiedi ti siiga nni ke O Diedo n tie U Tienu."