¹ Hilikiya bijua, Jeremi, yua n den tie Benjamina diema nni, Anatoti dogu nni salga yidkaaba nni yendo, maama n ne. ² O Diedo den maadi yeni Jeremi, Amoni bijua, Josiyasi, bali, piiga n bintaali binli nni. ³ O Diedo go den maadi yeni Jeremi, Josiyasi bijua, Jowakimi ń den kaa ti gbandi po, ki tie Juda bado, ki ban pundi, Josiyasi bijua goga, Sedesiyasi ń den tie Juda diema bado, ya yognu, o bali piiga n binyenli, ŋmaamu nni, ke bi den cuo Jerusalema yaaba, ki gedi yeni ba ti yonbdi. ⁴ O Diedo den maadi yeni nni, mi naa maama, ⁵ "N den gandi a, ki dá ki tagi a, a naá tugu nni; ki fidi ŋan ña n naá tugu nni, n den tuodi ki gagdi a, ki ŋanbi a, ke a baa tie sawalpualo i nibuoli siiga" ⁶ N den yedi o, "Hain, O Diedo, n Diedo!" "N nan ki bani maama, kelima, n dá tie bonwaaga i." ⁷ Ama O Diedo den yedi nni, "Da yedi ke a dá tie bonwaaga ka. 'N ya sɔni a, ke ŋan gedi naani, a ba gedi, Min sɔni a, ke ŋan ban yedi yaali mo, a ba yedi lanya maama i! ⁸ Da jie ba, kelima, N ye yeni a, yognu kuli, ki ba faabi a; O Diedo maama n yeni." ⁹ Lanwani ii, O Diedo den yugdi o nuu, ki sii n ñɔbu, ki yedi nni, "Mɔla wani ii, N tieni n maama a ñɔbu nni. ¹⁰ N kaani a dinne i nibuoli yeni mi diema siiga, ke ŋan ŋabi ba, ki tudi ki lulu ba, ki mumudi ba, ki fiini ba, bi bali kaani po, ki guani ki maa, ki go ŋuu ba." ¹¹ Lanwani ii, O Diedo den maadi yeni nni, ki yedi, "A nua be i, Jeremi?" N den yedi o, "N nua Amandie benu." ¹² O Diedo den yedi nni, "A la bonŋanla, kelima, n mɔko ba tuodi ki tieni n maama ń yedi yaali." ¹³ O Diedo den maadi yeni nni, mi liema, ki yedi, "A nua be i?" N den yedi o, "N nua bobli, nijienu po, ke li tuadi lɔblɔblɔb." ¹⁴ O Diedo den yedi nni, "Mi yebiadma janjanma ba pudi nijienu po i, mi diama yaaba kuli po. ¹⁵ Kelima, n ba yini ya nibuoli n kua nijienu po diema nni, ban cua, yuakuli ba caani o balkalkaanu, Jerusalema bulñɔcianbu kani, ki kali ki lindi mi diema bilinguonli, ki gedi ki kali Juda dogu nintuali dociami nni kuli. ¹⁶ N ba jia ba ti buudi, ki cuo ba, kelima ban tieni ya tuonbiadi ya po; bi ñɔli, ki ŋa nni, ki juugi li ŋubli yeni tulaale kuli i buli po, ki gbaandi ki pugi li buli, bi nui ń tagi yaali. ¹⁷ Amo ń fii, ki bobni aba! ŋan ñagni a ciaga ku gbanñagdigu. Fii ki yedi ba min ba puogi a, ke ŋan yedi ba ya maama kuli. ŋan da ŋɔa bi nintuali, lanyaaka n ba ti cedi ŋan ya ŋɔa bi nintuali yeni ti jawaandi! ¹⁸ Diidi! Dinne, N puni a u paalu, nani ya dopaalu n pia a bilinguona, ti kudidaadi yeni ti kumɔndi daasieda yeni; ŋan fii ki yie Juda badtieba po, bi yudanba po yeni bi salga yidkaaba po, yeni mi diema nni yaaba kuli po. ¹⁹ Bikuli ba fii, ki sedi apo, ama, bi kan fidi, ki paadi ŋa, kelima n baa ye yeni a, yognu kuli, ki faabi ŋa; O Diedo ñɔmaama n yeni."