¹ Josuwe ń den kpe, I sraeli ni taanli den buali O Diedo ya buali ne, "U laa buolu n ba ga liiga tin tuogi Kanana yaaba bu tɔbu?" ² O Diedo den yedi, "Juda buolu n ba ga liiga. Diidi mani, N taa li diema niba ki tieni bi nuu nni." ³ Juda buolu yaaba den yedi bi kpiiba Simeyɔn buolu yaaba, "Cua mani ti diema nni, ki todi ti, tin tuogi Kanana yaaba bu tɔbu. Ti mo ba ti todi yi i diema nni, yin ga ya biinu nni." Lanwani ii, Simeyɔn buolu yaaba den todi, ki ciani ba. ⁴ Juda buolu yaaba den gedi bu tɔbu, ke O Diedo taa Kanana yaaba yeni Prusi yaaba, ki tieni bi nuu nni. Bi den kpa niba tuda piiga Beseki dogu nni. ⁵ Bi den la o bado Adoni Beseki, Beseki dogu nni, ki tuogi yeni o bu tɔbu, ki paadi Kanana yaaba yeni Perusi yaaba. ⁶ Ama, o bado Adoni Beseki den sani, ke bi ŋɔdi ki deli o, ki cuo o, ki jia o nibijala yeni o taabijala. ⁷ O bado Adoni Beseki den yedi, "Min den jia ya badtieba nibijala yeni bi taabijala den tie badtieba piilele i, bi den gaani ya jiejɔgdi n baali n jiedikaanu i, ki di. Nani min den sɔni ba maama yeni, U Tienu cedi ke bi sɔni nmo yeni i. Bi den gedi yeni o Jerusalema, ke o ban kpe lipo. ⁸ Juda buolu jakɔnda den tuogi yeni Jerusalema yaaba mo, ki paadi ba. Bi den woli ba yeni mu jugsiemu i, ki pua ki juu bi dociamu. ⁹ Lani ń pendi, Juda buolu yaaba den jiidi ki tuogi yeni Kanana yaaba, ya niba n kua a juana nni yeni yeni yaaba n kua niganu po yeni u tialu nni. ¹⁰ Juda yaaba den gedi ki baa Kanana yaaba yaaba n kua Hebrɔn (Kiriyati Ariba), ki baa Cihecihayi, Ayimani yeni Talmayi dociami. ¹¹ Juda yaaba den ñani likani, ki gedi ki tuogi Debiri (Kiriyati Seferi) yaaba. ¹² Kalebi den yedi, "Yua n tuogi yeni Kiriyati Seferi yaaba ki paadi ba, n ba teni o n bisalo Acihisa wan tua o denpua." ¹³ Kalebi ninjawaaga bijua Otiniyeli n den tuogi, ki baa Debiri, lanwani ii, Kalebi den puni o o bisalo Acihisa ke o kuani o. ¹⁴ Lan den yanwaamu, Acihisa den gedi ki gadi Otiniyeli, ke wan mia o báa, wan teni o u kuanu. Wan den jiidi o ŋunbo po, o báa den buali o, "A bua nni ke li mani ii?" ¹⁵ O den jiini o báa, "N cua miabu i, nani ŋan puni nni niganu po tinga yeni, ŋan go puni nni ya tinga n pia a ñinbuna bu kuanu po." Lanwani ii, Kalebi den teni o polu yeni tinga po ya ñinbuna. ¹⁶ Moyiisi cuadtieba, Kena yaaba puolŋuani, den fii, Jeriko, i kpakpa tiidi dogu, ki yegi yeni Juda buolu yaaba, ki gedi ki kali ki kuli Aradi niganu po fanpienma nni, Amaleki yaaba siiga. ¹⁷ Juda buolu yaaba den taani yeni bi kpiiba Simeyɔn buolu yaaba kiban tuogi Kanana yaaba yaaba n kua Sefati, ki pua ki bolni li dogu. li dogu ji den yii Hɔrima, lani n tie Ti diegbendi. ¹⁸ Juda buolu yaaba go den tuogi Gasa yaaba yeni li tinkuni, Acikelɔn yeni li tinkuni,yeni Ekrɔn yeni li tinkuni. ¹⁹ O Diedo den ye yeni Juda ybuolu yaaba, ke bi gedi tuogi a juana nni dogu, ki baa u, ama bi den ki fidi ki ba deli ki yaani yaaba n den kaa li diema nni, kelima bi den pia ti kudi tɔturdi. ²⁰ Bi den taa Hebrɔn dogu, ki teni Kalebi nani Moyiisi ń den yedi maama yeni, o den deli ki yaani Anaki bijataadba. ²¹ Ama Benjamini buolu yaaba den ki fidi ki deli ki yaani Jebusi niba yaaba n den kua Jerusalema. Lanwani ii Jebusi yaaba li kua yeni Benjamini buolu yaaba hali yeni mɔlane. ²² Josefi cugli nni yaaba den bobni ki ba tuogi yeni Beteli yaaba, bu tɔbu, ke O Diedo den ñii bi ciaga. ²³ Bi den sɔni bi jaba, ke ban ban kpaagi ki diidi li dogu (yuu n go yii Lusi) ń tie maama. ²⁴ A tonda den tuogi ja, ke o ña u dogu nni, ke bi yedi o, "Waani ti tin ba tɔgni maama ki kua u dogu nni, timo ba ti ŋanbi apo." ²⁵ O den waani ba ban ba tieni maama ki kua u dogu nni, bi den woli li dogu yeni mu jugsiemu, ama bi den ki cedi ke li nilo yeni o diegu ñani ki yaadi. ²⁶ Lanwani ii, li nilo den gedi ki maa Jebusi dogu nni, ki kua, ki yini likani Lusi, li doguyeli n yeni hali yeni mɔlane. ²⁷ Manase buolu yaaba den ki fidi ki deli ki yaani ya nibuolu n den kua Beti Cihani yeni li tinkuni, yeni Taanaci yeni li tinkuni, yeni yaaba n den kua Dori yeni li tinkuni, yeni yaaba n den kua Ibleyami yeni li tinkuni, yeni yaaba n den kua Magido yeni li tinkuni, kelima Kanana yaaba den den yie ke bi kan ña li dogou nni. ²⁸ Israyeli yaaba ń den baa u paalu ki pugni, bi den niini Kanana yaaba, ki cedi ke bi tuuni bipo a tuonpaala, ama bi den ki fidi ki ba deli ki yaani ba. ²⁹ Efrayima buolu yaaba den ki fidi ki ba deli ki yaani Kanana niba yaaba n den kua Geseri, lanwani ii, Kanana yaaba taani ki kua yeni ba hali yeni mɔlane. ³⁰ Sebulɔn buolu yaaba den ki fidi ki deli ki yaani ya nibuolu n de kua Kitrɔn, yeni yaaba n den kua Nahalili, lanwani ii, likani Kanana yaaba taani ki kua yeni ba, ama Sebulɔn yaaba niini ba ke bi tuuni bipo a tuonpaala. ³¹ Aciheri buolu yaaba den ki fidi ki deli ki yaani ya nibuoli n den kua Ako, yeni yaaba n den kua Sidoni yeni yaaba n den kua Hahalabi, Acisipi, Helbahi, Afiki, yeni Rehobi dogi nni kuli. ³² Lanwani ii, Aciheri buolu yaaba taani ki kua yeni Kanana nibuoli, ban den ki fidi ki deli ki yaani yaaba yeni. ³³ Neftali buolu yaaba den ki fidi ki deli ki yaani ya nibuoli n den kua Beti Cemesi yeni yaaba n den kua Beti Anati. Lanwani ii, Neftali buolu yaaba taani ki kua yeni ban den kua ki tuu ya Kanana nibuoli niba i. Ama, bi den niini Beti Cemesi yeni Beti Anati yaaba ke bi tuuni bipo a tuonpaala. ³⁴ Amori buolu yaaba den ki tuo ke Dani buolu yaaba jiidi u tialu nni, bi den cedi ke bi ye a gbangbana po i. ³⁵ Lanwani ii, Amori yaaba den kua Heresi, Ayijalɔn yeni Caalibima gbangbana po i, ama, Josefi puolŋuani jakɔnda den woli ba, ki diedi ba, ki niini ba ke bi tuuni bipo a tuonpaala. ³⁶ Amori diema bianu den cili Akrabima gbangbana po, ki ban caa hali a juana dogu nni.