¹ Cedi min yini bu yanbu n buado po, n buado yanbu, ke bu nua ku daamɔngu tiidi kuanu. N dɔnlibuado pia ku daamɔngu tiidi kuanu ya tinga n kpiagi, ki pia ku dulgu. ² O den ŋanbi ki fidi, ki ñani a tana, ki baa ya bonbuoli n ŋani, ki buli. O den maa diefagdili u kuanu siiga, ki bobni u daatuodkaanu. O ji den guu ke ku daamɔngu tiidi ń loni ya luana n ŋani, ama ke i ti loni luanbedma. ³ Lanwani ii, Jerusalema yaaba yeni Juda diema nni yaaba, Jia mani tu buudi mini yeni n daamɔngu tiidi kuanu siiga. ⁴ Li bi buali ke min tieni be i, ke li ŋani u kuanu ne po, ke mii tieni ii? Ama, min den daani ke u ba loni ya luanŋama, u ti loni be i, luanbedma ka aa? ⁵ Mɔla, n ba waani yi, min ba tieni n daamɔngu tiidi kuanu maama: N ba pua ki febi ya gɔngɔndi n gɔgdi ki lindi u kuanu, ki cebi un tua yankpaamuagu. N ba pua ki mudi a guona kuli, a sanpenda ń tɔgni ki ya ŋmaadi. ⁶ N ba ñɔli, ki diani li kuanu, obakuli kan gbadi li tiidi, nilo kan ko ki lindi li kuanu mo. I konkoni yeni a kongɔba n ba yendi li kuanu. N ba tuodi ki waani u taayiinu mo, taaga ń da nii li kuanu nni. ⁷ Kelima O Diedo, u paaciamu kuli daano daamɔngu tiidi kuanu n tie Israyeli buolu yaaba, Juda diema yaaba mo n tie wan den ŋanbi ki bua ya tiidi; O Diedo den daani ti mɔnkundi i, ama ki ti sua biadma yeni nikpali baba; o den daani mi teginma i, ama, o ti sua i kaani kuli janda yeni cacagma baba. ⁸ Sola yaaba n daa ti diedi ki naagi tiyadi po, yaaba n daa i kuani ki pugdi bi kuani po, hali ke dieli ji ki sieni, ke o ji ye o baba dogmunu nni! ⁹ O Diedo, u paaciamu kuli daano yedi nni ya maama ne, ti diedi boncianla baa ti see diekuondi, Bá ya dieciama n ŋani, ba ti tua diegbendi, nilo ń ki ye naani. ¹⁰ Kelima, ku daamɔngu kuanu, baabi piiga a lie (Ba 12) kan tuodi ya daama n ba pundi liira piimu (li 50), yua mo n bigni bonbuoli kilo kobga (kg 100) o ba ti yendi kilo piiga i (kg 10). ¹¹ Sola yaaba n yi yagdi ki fii, ki ban ñu mi daapaama, yaaba n waa ku yɔgsiigu, ki yi ñu mi daama ki guo, kaa ji pia mayuli. ¹² Bi yi pua ti kogridi yeni mu lonmu, ki piebi mu yelmu yeni mu naagbaamu, ki ñu mi daama boncianla, ama, bi naa faami O Diedo ń tie yaali, bi naa fiini O Diedo nui tuona po mo. ¹³ Lanya po i ke n buolu yaaba ba gedi ti yonbidi, kelima baa pia yama; mi koma ń kpa bi bulcindanba, u ñuñuunu mo ń kpa ya niba n sieni. ¹⁴ Lani n cedi ke bi tinkpiba diema diadi u nialu, ki yaadi bu ñɔbu bagbagbag; bi bulcindanba, bi yudanba bi nifanba, bi japaadanba yeni bi yuondanba ba jiidi ki taani bi tinkpiba diema. ¹⁵ Bi japaadanba ba tibni bi yula, bi nisaalba ń miini bi yula; bi kafaadanba mo ń ńuani ki dabni bi nuni. ¹⁶ O Diedo, u paaciamu kuli daano ba baa a donda kelima, o mɔnkundi po, U Tienu yua n gagdi ki ŋani ba dɔgdi yeni o teginma ki waani ke o gagdi ki ŋani. ¹⁷ I pee ba kua a diegbena nni, ki ŋmani nani bi yankpaakaanu yeni, bi canba mo ń cua ki diedi a piada bonpiakaali. ¹⁸ Sola yaaba ya tuonbiadi yeni bi tagli kpiagu ñagi ba, ke bi kan fidi ki fii, bi tagli kpali ba nani naakpakuoda yeni. ¹⁹ Sola yaaba n tua, "U tienu ń tieni tonma, wan sɔni o tuonli tonma, tin diidi lan ba juodi maama; Israyeli Tienu yua n gagdi ki ŋani ń tieni wan jagi yaali, tin diidi lan tie maama." ²⁰ Sola yaaba n taa yaali n bia, ki yini li bonŋanla, ki taa li bonńŋanla, ki yini li yaali n bia; yaaba n yini li bɔnbɔnbiigli yenyenma, ki yini mi yenyenma li biigli; yaaba taa ti bontontondi ke ti mani, ki taa li bonmanli ke li to bagbagbag! ²¹ Sola yaaba n yi bi yula yanfodanba, ki maali yeni bi bancema, ke bi cegi! ²² Sola yaaba n tie a daañubiema, yeni yaaba n tagi mi daapaama, ki bani ban ŋmadi mi dapaama buoli maama; ²³ Yaaba n puuni o nibiado i mɔni, li suuli po, ki mundi o niteginka o mɔni! ²⁴ Lanya po i, ke nani u mu ń yi juu ku muapiengu maama, bii, nani u mu ń yi sia ti muakuondi maama yeni, bi jiina ba bedi, bi puuma mo ń suodi nani ku tangungu yeni. lani n ba tieni, kelima, bi luni kaa cɔlni O Diedo, u paaciamu kuli daano yiko, ki fali, ki yie ke bi kan cengi Israyeli Tienu yua n gagdi ki ŋani ñɔmaama. ²⁵ Lanya po i, ke O Diedo fiini o pabienli, o buolu po. O yugdi o nuu, ki pua ba. A juana wudi ki baa baa, ke bi kpienba bibili i sani nni. Yeni lankuli, o pali da ki sɔngi, o nuu mo da li tiegi poli po i. ²⁶ O sɔni ki yini yaaba n ye hali banfagli, ki piebi, ki yini hali u tinbianu niba. Diidi, bi ba tieni tontoni, ki cua, ki kan biani yaama ba waamu. ²⁷ Bi siiga nni, oba ki tuudi, obakuli ki cɔgi bii ki tigindi. Obakuli ki ñagdi o gbanñagdigu, oba ya taacaagbanli ki cie. ²⁸ Bi luani bi piemi ke i mani polpolpol, ki kpali bi dabana bonŋanla; bi taami taawoga tie nani tana yeni i, bi tɔturdi taana mo fu nani taafaaciangu yeni. ²⁹ O dunli tie nani o yangbanñua yeni i; bi duni nani a yangbanpana yeni i, bi pia u fidu. Bi yi cuo bi bondikaali, ki ya caa, niloba ki ye ki ba tiani ban ŋa. ³⁰ Lanya daali, ku fuugu ba tieni Jerusalema nni nani mi ñincianma fuugu yeni. yua n nuali ki tinga, li kpejaali po, ki la biigli yeni pabɔnli baba i. Ti talwadi mo ba legni mi yenyenma, ki tieni li biigli.