¹ Yaali n dɔgdi Amoci bijua Esaayi po, ki nua Juda diema yeni Jerusalema. I nibuoli kuli ba taani ki kadi Jerusalema. ² Mi juodma yognu, O Diedo diegu ń ye ya juali po ba kpedi ki cie a juabila, hali ki cie a juaciama mo, O Diedo diegu ba do ki tuani li juali yuli po, i nilanbuoli kuli mo baa midbi ki caa lankani i. ³ Bi niba boncianla ba cua, ki yedi, "Cua mani tin do O Diedo juali po, tin gedi Jakɔbo Tienu diegu kani, lankani i, ke bi ba waani ti o sani, tin ya cuoni li ya sani nni." Kelima, ti yikodi ba ña Siyɔn i, O Diedo ñɔmaama mo ń ña Jerusalema. ⁴ O ba jia ti buudi, i nibuoli siiga, ki tua kɔnpaalo i nibuli siiga; Bi ba pua ki tadi bi jugsiemu, ki maa ti muaciedi, ki pua ki tadi bi kpaana, ki maa a kuuna. Buolu kan yugdi o jugsiega buotɔu po, bi ji kan ya bangi bi niba bu tɔbu nunfanbu. ⁵ Jakɔbo buolu yaaba, cua mani na tin ya cuoni O Diedo sanu yenyenma nni. ⁶ Kelima, yinba Jakɔbo cugli nni yaaba sani ki ŋa li nitaanli. Kelima, i nilanbuoli bogda ji yabdi bi yema nni; bi jabaaba ji yabdi bi dogu nni nani Filisitini yeni, bi taani ki loli ŋantaadi yeni bi nilanba. ⁷ ŋanjilfa yeni wula gbie bi diema nni, bi ŋalmani ki pia bianu; I taami gbie bi diema nni i, ti tɔturdi cɔli ki pia dugli. ⁸ Bi diema go gbie yeni i buli mo; bi gbaandi ki pugi bi tuonsɔnbanda nugi ń duadi yaali, bani bi nui ń tagi yaali i. ⁹ Bi ba cedi li nitaanli ń gbaani ki pugi, ama, bi baa baali yendo yendo; lanya po ike laa buali ke ŋan di bipo sugli. ¹⁰ Sani O Diedo pabiencianli, yeni o kpiagdi yabindi, ki wuoni mani ti jualɔndi nni, bii ki tinga tiipo. ¹¹ O nilo yeni o kafaama kuli, o ba tibni o yuli, bi niba japaaciandi kuli ba baa u bianu. O Diedo baba n ba baa ti kpiagdi yeni a donda. ¹² Kelima, O Diedo, u paaciamu kuli daano bili li daali, ki ba fii ki sedi, bi kafaadanba yeni bi japaadanba kuli po, bani yaaba n dongi bi yula, ki nan ba guani ki jiidi po. ¹³ O ba fii ki sedi Liban Sediri tiiciandi po, yaadi n kpedi boncianla yeni, yeni Bacani tiiciandi po. ¹⁴ O Diedo, u paaciamu kuli daano daali, o ba fii, ki sedi a juaciama kuli po yeni ya juabila n kpedi kuli po, ¹⁵ yeni ti tɔdiefagridi po yeni ya bilinguona n fagi ki pia u fidu kuli po, ¹⁶ yeni Tarisisi ñinbiaciandi po, yeni ya ñinbiadi n ŋani boncianla, ki pia mi ñuadma yeni po. ¹⁷ Bi niba japaaciandi ba wadi, bi jaba ń bili bi kafaama; li daali O Diedo baba n ba baa ti kpiagdi yeni a donda. ¹⁸ I buli ba bodi cain. ¹⁹ O Diedo ya jiini mi yebiadma ki tinga po ya daali, bi jaba ba sani ki wuoni ti jualɔndi nni yeni i tanfali nni, kelima O Diedo pabiencianli yeni o kpiagdi yeni o yabindi po. ²⁰ Li daali, bi niba ba lu ban den duadi ya buli yeni ŋanjilfa yeni wula, ki bua ya gbaandi ki pugi yeni; bi ba lu li buli kuli a dapola yeni ti janjandi po. ²¹ O Diedo ya fii ya daali ki ba jieni ki tinga, bi niba ba sani ki kua, ki wuoni ti jualɔndi tanlondi nni yeni i tanfali nni, O Diedo pabiencianli yeni o kpiagdi yeni o yabindi po. ²² Cedi mani ki da dugi o nisaalo po, kelima o yema kuli tie wan fuodi ki jiini baba i, o fuoma nan tie lile i?