¹ Amoci bijua Esaayi ń den la yaali, ke li ba ti cua Juda diema yeni Jerusalema po, ya yognu ke Usiya, Jotami, Ahasi yeni Hesekiasi den tie Juda diema baditieba. ² Tanpoli, cengi, ki tinga mo ń diadi li tubli, kelima, O Diedo yedi ya maama ne: "N dini, ki go wubi a bila, ama, fiini mi yenyiema npo. ³ O nua bani o daano, ke o ŋunbo mo bani o daano ń dingi o ya tiagu nni, ama, Israyeli ki bani libakuli, N buolu Israyeli ki pia yama." ⁴ Hain! Ti tuonbiadi nibuolu, mi biadma nitaanli, i tagli ji kandi, ya nibuolu n tudi u sanu, ki togdi bi tugtondanba! Bi sani ki ŋa O Diedo, ki fali Israyeli, o gagdiŋamo, ki buli o bi nunga. ⁵ Be ya po i, ke bi go pua yi? Be n cedi ke i yenyiema biagdi ki pugdi ii? Li yuli kuli yiadi baba, li pali mo kuli yia i. ⁶ Ki cili ku taapangu nni, ki ban tuoni li yuli po, li ki pia yigu ń ki ye naani; ti yiadi, a binbila yeni a nala i kaani kuli; bi naa fiadi ki ŋanbi, baa fini, baa dingi li yiadi kpama mo. ⁷ Bi pua ki mudi i dogu, ki juu i dociami; Bi canba pua ki biidi i kuani, i nunbu nni; bi canba n di i kuani nni bonluonkaali, lanya pabɔnli tie nani yibalinba ń pua ki mudi ya dogu yeni i. ⁸ Siyɔn o poŋamo dogu baba n sieni, ki see nani ya jonli n see ku daamɔngu tiidi kuanu nni yeni, nani ya sogli n see i nɔli kuanu nni yeni, nani yibalinba ń lindi ki cebni ya dogu yeni. ⁹ O Diedo, ki pia gbenma Tienu ya bi ki cedi ke ti siiga nni, bi tianba sani ki ciadi, ti bi baa tie nani Sodomi yeni i, li bi baa tie tipo nani Gomori yeni i ¹⁰ Yinba Jerusalema yudanba, yaaba n jugi bi yula nani Sodomi yaaba yeni, Cengi mani O Diedo maama; yinba, Jerusalema yaaba, yaaba n biidi bi yula nani Gomori yaaba yeni, diadi mani i tuba ki cengi O Diedo maama: ¹¹ O Diedo buali yi: "N ba tieni be i, yeni i padbuoli ne kuli ii?" "N guo yeni i patona padjuukaana yeni i yankpanba kpama; N ji ki bua i naatona, i patona yeni i ŋuabuana sɔma. ¹² I ya cua n kani ya yognu, ŋma n yi puni yi u sanu, yin ŋmaa n luolu nni? ¹³ Ji da kpendi mani yeni i paabu yeni i pada yaa n ki pia mayuli yeni, yeni i ŋuba yeni i tulaale yaali n jɔgni npo yeni; Yinba bi nibiadba buolu ne, N ji ki bua i ŋmaapaani jaanma pada yeni mi fuodma yeni i badi kuli ya pada, lankuli ji falgi npo i. ¹⁴ N nani i ŋmaapaani yeni i jaanma kuli ya pada; lankuli tie cɔgli i npo. N ji cɔgi, lankuli ji miadi nni. ¹⁵ Lani n cedi, i ya tandi i nui, ki bua jaandi ya yognu, n yi legi n nuga, ki buli yi i; I ya bua yin jaandi maama kuli, N kan cengi yi; i nui gbie yeni sɔma baba i. ¹⁶ ŋuudi mani ki ŋanbi i yula; ñani mani yaali n tie tuonbiadi i tuada nni, n nintuali; cedi mani mi biadma; ¹⁷ Bangi mani mi ŋanma tienma; lingi mani mi teginma. ŋmagdi mani o tugmɔndaano, wan tɔgni u sanŋamu, Bu mani ki kpienbiga buudi yeni mi teginma, ki maadi ki faabi li kpepuoli." ¹⁸ O Diedo yedi, "Cua mani tin taani ki juogi"; "I tuonbiadi ya mɔni nani mi sɔma yeni, kase tin pendi nani ti kunkundi yeni; Ti ya mɔni colcoli, ti ba pendi nani cabipienli yeni. ¹⁹ Li ya tie ke i tuo ki ga n maama kuli, i ba di mi diema manu, ²⁰ ama, i ya yie n maama, ki fiini mi yenyiema, bu tɔbu n ba biani yi," Kelima, O Diedo ñɔbu n yaadi ki yedi lanya maama. ²¹ Li tieni ledi i, ke ti dudugdi dogu kpandi, ki tua nani poconconli yeni! Ya dogu n den gbie yeni ti mɔnkundi, ki gbie yeni mi teginma, ama mɔla wani ii, u ji gbie yeni nikpaba baba i. ²² Fini Jerusalema, a ŋanjilfa ji jɔgni i, ke mi ñima mo cuugi a daamɔngu nni mo. ²³ A yudanba tie yenyieda i, ki go juogi yeni a suura; yuakuli tiini, ki lingi li suuli yeni jodi ń ye naani i. Baa tieni kpienbiga mɔni, bi naa go cengi ban tudi ya kpepuoli po ń cua ki ba waani ba yaali n tie o fala mo. ²⁴ Lani n cedi ke n Diedo, O Diedo, u paaciamu kuli daano, Israyeli Tienu yua ye yeni ti kpiagdi yedi ya maama ne: "Li bia boncianla yibalinba po! N ba tuu n yibalinba li panli. N ba tuu n yibalinba po n panli; ²⁵ N ba pegdi n nuu, ki fii ki sedi ipo. N ba duadi a yeni u mu, ki juu ki buodi a jɔgindi, ki ŋuudi a yeni bu ciebu, ki ñani a jɔgindi kuli. ²⁶ N ba cedi ti buudi yudanba ń guani ki baa mi teginma nani kpiama yeni, ki cedi a ceglikaaba ń guani ki tua nani kpiama yeni; lani ya pendi, bi ba yini a mi teginma dogu, ti dudugdi dogu." ²⁷ Ti mɔnkundi bujiali n ba faabi Siyɔn, u dogu nni niba yaaba n ba lebdi bi tuada, ki ŋɔdi mi teginma mo ba baa mi faabma. ²⁸ Bi yenyieba yeni ti tuonbiadi danba kuli ba baa mi yebiadma nni, yaaba n buli O Diedo bi nunga mo ba bodi cain. ²⁹ Kelima, i fee ba di yi yeni yin den gandi ya tiidi, ki padi i pada ikani, i pala ba biidi bonianla yeni yin den gandi ya tiidi, ki bua yi bonŋanla yeni. ³⁰ Kelima i ba tua nani ya tiicianbu faadi n waadi yeni, nani ya gɔgdigu n luo mi ñima, ke ku tinga kuodi yeni. ³¹ O gbanmandaano ba tua nitadmo, o tuonli mo ń tua fantanjiangu; bi ba taani ki juu bani bilie kuli, hali ke nilo ki ye ki ba gbindi, ki faabi ba."