¹ ŋa da tabi obakuli totabgu. Da taani nibiado ki tieni tofaama kasiedi. ² A kan ŋɔdi niwulgu yin tieni tuonbiadi, ŋan go da ŋɔdi niwulgu ti buudi yognu, ki tieni yaali n ki tiegi. ³ Yin da jia tonanbuudi obakuli po, bá o ya tie luodo. ⁴ A ya kadi yeni a yibali nua, bii o ŋunbo, ke o bua bia, ŋan gɔgdi o, ki ŋmiani o yandaano. ⁵ A ya la yua n nani a ŋunbo yeni o tugli, ke o baá, da ñɔli o ke a nandi o daano; ŋan todi ki fiini o. ⁶ ŋan da tieni janbi ti buudi yognu, ki fie o luodo mɔni. ⁷ Da taani niba yin tieni tofaama kasiedi, ki tabi nilo totabgu, ŋan da kpa yua n ki pia tagli, bii o niteginka, kelima N kan di sugli o nibiado po. ⁸ ŋan da tuo ki ga suuli, kelima, li suuli juandi bi nundanba, ki go fanbidi bi niteginkaaba maama. ⁹ Da cagni, ki wangi caano fala, kelima i bani o caano yema, kelima i den tie canba i Ejipti diema nni. ¹⁰ I ba buli i kuanu nni a bonbuola, ki taa ku kpaangu bina luoba. ¹¹ Ama li binleleli, li buali ke yin ŋa mi tinfanma, ki da buli, yeni, man fuodi; a luoda yaaba n ye i siiga nni ba liegi a bonliala bi jiema po. I go ba tieni yeni i, i daamɔngu tiidi yeni i Olifie tiidi kuli po mo. ¹² Aŋada nni, i ba sɔni dana luoba, li daaleleli, yin fuodi. yin ya tie yeni, i nee yeni i ŋunbi mo ń la mi fuoma li daali, li go tie yeni i jatuadba, i potuadba yeni i bila yeni i canba po mo, ban fuodi, ki guani ki baa u paalu. ¹³ Yin fangi i yula yeni min maadi yi yaali kuli. Yin da tiadi bulitiani yela po, ban da gbadi ke i taa i yela mo i ñɔbu nni. ¹⁴ I ba cuo li cenli, ki ban bobni u badu, ki pugi nni, taalma taa, binli kuli. ¹⁵ Yin ŋanbi ki cɔlni ya kpanu n ki tieni dabinli bogdili bonŋanla. Nani min bili yi li ñɔbonli maama yeni, i ba ŋmani ya kpanu n ki pia dabinli dana lele. Lan yognu, i ba cua N nintuali Abiba ŋmaalo nni, ban lugdi yua li bogdili po. Li tie yin den ñani Ejipti diema nni ya ŋmaalo i. Ama li ki buali ke yin cua N nintuali yeni nuukuomu. ¹⁶ Yin ya cɔlni ku kpaangu ( u jietaadu) bogdili mo, yin buli i kuani nni ya bonbuola bonluonkpiala. Yin go ya tiani Ku kpaangu jaanma, ya yognu ke i tieni u jietaagu i kuani nni kuli, li binli juodma. ¹⁷ I buolu jaba kuli ba taani taalma taa O Diedo nintuali binli kuli. ¹⁸ I kan yidi n po salga yeni sɔma yeni ya kpanu n tieni dabinli , Yin padi N po ya yanga kpama kan bili ñiagu hali yeni ku siŋaagu. ¹⁹ I ba lugdi i kuani nni bonluankpiala n ŋani, ki cua yeni a N dieli nni, Mini O Diedo, i Tienu dieli nni. Yin da ŋaani yanbiga nandi ki naá biima nni. ²⁰ N ba sɔni Maleki, wan ya ye i liiga, ki guu yi u sanu nni, wani n ba ciani yi hali mi bobni ya kaanu i po. ²¹ Yin fangi i yula ki ya cengi o, ki go cɔlni o. Yin da kpaani o kɔnli, kelima o kan di sugli i tudma po. N cabi wani i, N paalu yeni N dudugdi kuli. ²² I ya tuo ki cɔlni o ñɔmaama, ki tieni Min waani yi yaali kuli, lanwani ii, n ba tu i yibalinba ya yibalo, ki tua i kɔngintieba ya kɔngintua. ²³ N Maleki ba ga i liiga, ki ciani yi Amoriti yaaba, Hititi yaaba, Perisiti yaaba, Kanana yaaba, ifiti yaaba yeni Jibusiti yaaba diema nni. N ba bolni bikuli. ²⁴ I kan gbaani ki pugi bi buli, ki gbaani bi nintuali, bii ki ya togdi bi tuada (ban tie maama). Ama, i ba pua ki mumudi bi buli nannana yeni bi butana i, yom yom yom. ²⁵ I ba gbaandi ki pugi O Diedo, i Tienu, yeni, o ba yadi mi yediŋanma i kpanu yeni i ñima po. N ba ñani u yianu i siiga nni. ²⁶ I buolu nni, pua kan ya ye, ki tie ŋɔlga bii ki punbi o tugu ń biidi. N ba puni yi ti madi yeni li manfagli. ²⁷ N ba cedi ti jawaandi ń kua yin ba gedi yaaba ya diema nni. N ba kpa yin ba tuogi yaaba kuli. N ba cedi ti jawaanciadi ń kua yin ba tuogi yaaba, ban lebdi ki sani. ²⁸ N ba sɔni i sii, ban ga i liiga ki deli ki yaani Hifiti yaaba, Kanana yaaba, Hititi yaaba, ke i da ki pundi. ²⁹ N kan deli ki ñani yaaba n ye i liiga binyenli nni ka, lanyaaka mi diema ba kpadi fanpienma, ti muayandi ń kua ki yabdi i po. ³⁰ Ama, N baa ñangi ba waamu waamu i,i liiga, yin fidi ki yabdi ki pugni, ki fidi ki di mi diema faali. ³¹ N ba bili i diema biani, un ña li mɔgmɔnli, ki gedi hali Filisitini mɔgli, ki ña mi fanpienma nni, ki gedi hali yeni Efrati kpenu. N ba cedi yin kɔni ki paadi yaaba n den kua li diema nni yeni ti kpiagdi. I ba deliki ñani ba yo ki fidi ki kua mi diema nni. ³² I kan juogi ki loli dɔnlguba kuli yeni ba bii yeni b buli. ³³ Bi kan ya kua i diema nni lanyaaka bi ba cedi yin ya tie ti tuonbiadi n nituali. I ya gbaani ki pugi bi buli, li waani ke i baa diagu nni n yeni.'"