¹ Nilo ya suni nua bii pia, ki kpaá bii ki kuadi, o ba pa nua kuli po nee mu, ki pa pia kuli po pee na. ² Bi ya pibdi suudo, bu subu yognu, ki pua o, ke o kpe, bi kan jalgi obakuli lanya kuuma po. ³ Ama, li ya sua ke u yienu pudi i ke o kua bu subu, yua n kpa o yeni baa pia i tagli. Li buali ke o suudo ǹ pa bu subu panli i. O yaa pia libakuli, bi ba kuadi o o subu po. ⁴ Bi ya la wan suni ya yanga ke ki da pia miali, kan tie nua yo oo, ŋunbo yo oo bii pia yo oo, o ba pa yandi lie i. ⁵ Nilo ya ŋa ke o yandi kua ki mua tiano kpaangu bii o daamɔngu tiidi luana, li buali ke wan pa li panli yeni o kuanu nni yeni o daamɔngu tiidi luanŋana i. ⁶ Nilo ya cuoni mu, ke u sia nitiano kpaangu bii o kuanu, ki buodi, yua n cuoni u mu yeni ba pa lan buali maama i. ⁷ Nilo ya piani o kuantalielo ligi bii piama bá, ke wan wuoni o po, bi ya suni li ligi bii li piama, ke bi fidi ki cuo li suudo, o ba pa wan suni yaali taalma lie i. ⁸ Ama, bi ya ki cuo o suudo, li buali ke o diedaano ba gedi ti buudi yudanba kani, ban diidi o yaa tuuni o nuu o kuantalielo piama nni. ⁹ Bi ya gagi yaali ya po kuli, lan tie nua yo oo, ŋunbo yo oo, pia yo oo, tialakaadi, bii lan li tie yaali n bia kuli, ke nilo ba fidi ki yedi, "Li tie n ya bonli i," li buali ke bani bilie kuli ń pundi ti buudi yudanba kani i. Ti buudi ya cuo yua, o ba pa o lielo yaali n bia taalma lie i. ¹⁰ Nilo ya piani o lielo ŋunbo, nua, pia, bii yanga bakuli, li yanga ya kpe, bii bi duoli ga lanyaaka ke ki bia, ke obakuli ki la ga, ¹¹ Bani bilie kuli ba gedi ki poli O Diedo yeli po, ke obakuli ki tuuni o nuu ki yanga yeni po. O yandaano ba tuo li poli, ki panli ki ye o lielo po. ¹² Ama bi ya suni li yanga o kani i, o ba pa o yandaano ki po. ¹³ Li ya tie ke yanbiadga n cuo lanya yanga, o taa yaali n sieni ki waani o yandaano, lanwani ii, o kan pa libakuli yanbiadga ń ŋmani ya yanga po. ¹⁴ Nilo ya ledi o kuatalielo yanga, ke bi duoli ga, bii ke ki kpe, ke o yandaano ki bani li po, li buali ke yua n ledi yeni ń pa i. ¹⁵ Ama o yandaano ya bi bani li po, yua n ledi ki yanga kan pa li yanga po, o ba pa mi ledima ligi baba i. ¹⁶ Nilo ya bondi powandiali, ki dua o, li buali ke wan pa li cuadli nani lan buali maama i, ki kuani o i. ¹⁷ O báa ya yie ke o kan puni o u sanu wan kuani o, li buali ke wan pa ti wandiadi biidma pani i. ¹⁸ Yin da ŋa suamo yeni miali. ¹⁹ Yua taani yeni yanga kuli, dagdi yeni mi kuum. ²⁰ Yua n padi ki mia bulo bakuli, ke laa tie O Diedo, yin biani o fanma. ²¹ Yin da janbi bii ki fali caano, kelima i mo den tie canba i Ejipti diema nni. ²² Yin da cagni bi ki wangi pakuali bii kpiebiga fala. ²³ I ya cagni ba, ke bi buudi ki mia nni, N ba gbadi bi maama ke laa pia tama. ²⁴ N mutuoli ba do, min kpa yi yeni ki jugsiega; i puoba ba tua pakuana, i bila ń tua kpiebmu. ²⁵ A ya ledi N buolu nni yua, ke o tie luodo, li ki buali ke ŋan ya tie nani ligkpendo yeni, bii ki bili o ya maadi n yabi. ²⁶ A ya ga a kuantalielo gbagdigu, ki bua tuu li panli, li buali ke ŋan ŋmiani o ke u yienu da ki baá, ²⁷ Kelima lanya gbagdili baba i, ke o pia, ki ŋagindi o gbanu, bontɔli ji ki ye, a yedi ke wan tieni ledi i? O ya buudi ki mia nni, N ba gbadi o maama, kelima N tie niñinpadi daano i. ²⁸ ŋan da soli Mini U Tienu, ki da fanbi a buolu yikodi. ²⁹ A kan muni nni a kpaangu bii a daamɔngu tiidi paabu. A ba puni nni a bonjala siiga, ki bonjakpiaga. ³⁰ A go ba tieni yeni i, li ya tie i nee bii i pee. ki yanbiga baa ye yeni ki naá dana lele, li daaniili daali, ŋan taa ga ki puni nni. ³¹ I baa tie ya buolu n gagdi Mini ya po. Lanwani ii, i kan ŋmani yanbiadga ń cuo ya yanga ku muagu nni bii u kuanu nni, ki tɔtɔdi ya nandi. Li buali ke yin teni lanya nandi i sangbanli i.