¹ Rabbi sanno kan kaa Mika Morsati bora do, Yahuda bonkooney Yotam da Ahaz da Hezeciya jirbey ra han kan a di samariya da Ursalima bon neeya: ² "Ya aran dumey kulu, wa maa. Ya ndunnya da han go a ra kulu, wa hanga jeeri. Rabbi, koybeero ma ciya seeda aran kulu bon, nga kan ga ti koy beero kan go nga sududuyan fu hananta ra. ³ Zama Rabbi ga fatta nga nango ra, A ga zumbu ka ndunya nangu kuukey taamu. ⁴ Tondi beerey ga gungurey a cey cire, harizuru gorey mo ga kortu bindi, sanda yuu-fantu kan go danji gande, sanda hari kan dooru kan ga gunguray ka koy ganda. ⁵ Yakuba taalo da Israyla dumo zunubey sabbay se no i ga woodin kulu te. I fo no ga ti Yakuba taalo? manti Samariya no? Yahuda tudey bon sududuyan nangey wo binde? Manti Ursalima no? ⁶ Woodin sabbay se no ay ga Samariya ciya sanda kwaara kan halaci kan ra fundikoni kulu si, sanda rezin tilamayan kali cine. Ay ga tondey gunguray gooro ra, ay ma tiksa mo fisi ka kaa taray. ⁷ I g'a jabuyan himandey kulu bagu-bagu, I ga i goyey baanando kulu tonne da danji mo. Ay ga toorey kulu ciya yaamo. Zama waykutarey banandi ra no a na kulu margu-margu. A ga ye ka ciya waykurutarey banandi mo. ⁸ Wodin sabbey se no ay ga hen ka baray, ay ma dira gaa-koonu, ce-koonu. Ay ma hen danga zonon cine, ay ma duray danga taatagey cine. ⁹ Zama a maray yaney si yaaye, zama a kaa hala Yahuda, A koy mo kala ay borey kwara meyyo gaa, sanda Ursalima no ya. ¹⁰ I ma si a baaru deede Gattu ra,I ma si heen Akko ra, ay ga bilinbilin Bayt-Lafra kusa ra. ¹¹ Ya nin safir goro kwa, ma koy ni koyan gaa-koonu nda hawi ra. Za nangorokwa mana fatta bo. Bayt-Ezel heeno ga nga haro hibandi ka kaa nga gaa. ¹² Marot bora go ga joote nga faaba se, zama balawu zumbu ka fun Rabbi do ka koy hala Ursalima meyo gaa. ¹³ Ya nin Lakis bora, ma ni wongu torkka soola, wodin no ga ti zunubi sintinay Siyona ize-wayo se. Zama ni ra no i di Israyla taaley. ¹⁴ Wodin se ni ga mooru Morset-gat, Akzib windey mo ga cia halliyan dabaa Israyla bonkoney se ¹⁵ Ay kande ni se koy tagi fo Meresa bora, Israyla darza maayo ga koy kala Adullam. ¹⁶ Ma ni bon cabu, ma ni bon hamno kaa ni izey kan ni ga baa se, Ma te toli danga kambu curo. Zama i ga mooru nin ka koy tamtaray ra.