¹ Yeriko kwaara, kwaara daabante no kan sinda furo yan do Israyla izey se. Boro kulu si fatta, boro kulu si furo. ² kala, Rabbi Irkoy ne Yasuwa se : guna, ay na Yeriko da nga bonkono nda nga sooje yaarukoy no ni kamba ra. ³ Wa kwaara windi, aran wongu alborey kulu, wa kwaara windi soro follon. Aran ma woddin te jirbi iddu nda care game ra. ⁴ Alfaga iyye ma furo Irkoy sundurka jine da hilli iyye kan yan ga hẽ gumo; zaari iyyanta ra, aran ma kwaara windi soro iyye ; alfagey mo ma hilley hẽnandi. ⁵ Waato kan i ga hillo funsu, aran ga maa hillo hẽno, jama kulu ga kuwa nda binde beri. Sahadin, birno cinaro ga kan, jama ma furo, boro ma guna nga jina. ⁶ Nun izo Yasuwa, na alfagey ce ga ne i se: wa alkawali sundurko sambu, aran a Alfaga iyye ma hilli iyye yan kan ga hẽ gumo sambu ga furo Rabbi sundurko jine. ⁷ A ne mo jama se: wo dira ga kwaara windi, alborey kan yan gonda wongu jiney mo ma furo Rabbi sundurko jine ⁸ Alwaato kan Yasuwa sallan jama se, alfaga iyya kan yan go ga dira Rabbi sundurko jine, wo kan yan gonda hilley, sintin ga dira, ga ngey hilley funsu mo. Rabbi alkawalo sundurko go i bande. ⁹ Alborey kan yan gonda wongu jiney go ga dira alfagey kan yan go ga hilley funsu jine, bande borey go ga dake sundurka ga; dirrawo waate i go ga hilley funsu. ¹⁰ Yasuwa na lordi wonne no jama se: aran ma si kuwa i ma si maa aran jindey , ba sanni ize fo ma si fatta aran meyey ra, kala zaaro kan ay ga ne aran se: Wa kuwa ! Ga no aran ga kuwa. ¹¹ I na Rabbi sundurko sambu ga kwaara windi, i na windi soro fo, ga i ye ngey gorey_nango do, nan kan i koy ga ciino te. ¹² Yasuwa tun za da hinnay, alfagey mo na Rabbi sundurko jare. ¹³ Alfaga iyya kan yan go ga hilli iyyey kan ga hẽ jare Rabbi sundurko jine, sintin ga dira, ga ngey hilley funsu. Alborey kan yan gonda wongu jiney go ga dira i jine, jama bero mo go ga Rabbi sundurko gana; dirrawo waate, i go ga hilley funsu. ¹⁴ Zari hinkanta, i na zarro windi soro fo; ga i ye ngey gorey_nango do. Yaddin mo no i te jirbi iddu nda care game ra. ¹⁵ Zaari iyyanta ga, i tun za da hinnay, za mo-boyan waato, ga kwaara windi soro iyye; zarro din hin no i na kwaara windi soro iyye. ¹⁶ Soro iyyanta ga, waato kan alfagey go ga hilley funsu, Yasuwa ne jama se : Wo kuwa, zama Rabbi Irkoy na kwaara no aran se ! ¹⁷ Kwaara ga ciya Rabbi Irkoy wane, yaadin ga laali hari aran wo se, kwaara nda ay kulu kan go a ra; amma weykuro Rahab nda borey kulu kan yan go a fuwo ra, aran si lamba i ga, zama, a na dontonkey kan yan ir samba tugu. ¹⁸ Wa hagoy hinne da hayey kan i laali; zama da aran na hay kan i laali sambu, aran ga Israyla kunda dan laaliyan ra, aran ga lakkal-tuney dake a boŋ mo. ¹⁹ Nooro da ura kulu,guuru ciray da guuru bi jiney kulu, i ga i kaa waani Rabbi Irkoy se, i ga i dan mo Rabbi Irkoy arzaka sundurko ra. ²⁰ Jama kuwa, alfagey mo na hilley funsu. Waato kan jama maa hilley hẽno, i na kuwa yan berri te, sahadin birno cinaro kan; jama furo kwaara ra, boro kulu nga jine. I na kwaara ŋwa. ²¹ Hayey kulu kan yan go kwaara ra, i na'i dan laaliyan cire, alborey nda weyborey, zankey nda dotijey, kala'a ma koy hawey da feejey da mo farkayey gaa. ²² Yasuwa ne borey kan yan koy ga kwaara fintal se: wo furo weyboro weykuro kwaara, wa weybora nda borey kulu kan yan go a fuwo ra kaa taray, sanda mate kan aran ze a se. ²³ Furo-tajey; wo kan yan na kwaara fintal, furo ga Rahab kaa taray, baabo, ŋyaŋo, ŋya-izey d'a jama kulu; i na almayalo borey kulu kaa taray, gi'i jisi Israyla kunda banda. ²⁴ I na kwaara da hay kulu kan go ara ton, amma i na nooro, wura da ay kulu kan ga ti guuru cirey nda guru bi dan Rabbi Irkoy Sundurko ra ²⁵ Yasuwa na weykuro Rahab fundo faaba, nga da nga baabo windo, da mo borey kulu kan yan go a bande; a goro mo Israyla game ra hala hunkuna, zama a na dontonkey kan Yasuwa donton hala'i ma kwaara fintal din, tugu. ²⁶ Yasuwa binde ze ga ne : Rabbi Irkoy jine, laaliyan ma kan, boro kulu kan tun ga ye ga Yeriko kwaara wo cine, boy! Bora ga nga ize ay-jina noo ga du ga kwaara ganjey jisi, a ga nga ize-kayna no mo ga du ga kwaara meyey daŋ. ²⁷ Rabbi Irkoy ciya Yasuwa bande, hala a te maa laabo kulu ra.