¹ Alfaga berey wa hangan ! Wa lakkal dan Israyla jama, wa hanga jeeri bonkoono windi borey ! Zama aran no ciito wo ga guna, zama aran ciya kumsay noddin Mitspa, da taaru kaŋ i hirai Tabor boŋ. ² I sargayey da tooru gana koy mooru ngey ture yayo ra. Amma ay na gurzugay soola g'i batu. ³ Ay ga Efraymu bay, Israyla mo si ay se tugante, zama sohon Efraymu te weykuru, Israyla mo na nga boŋ zibandi. ⁴ I goy laaley si taa i ma bare ga ye ga ka ngey Irkoyo do, zama weykuru taray biya go i game ra, i si Rabbi Irkoy bay mo koyne. ⁵ Israyla boŋberra no g'a tuuma Irkoy jine. Israyla nda Efraymu kulu ga kaŋ i zunubey sabbay se, Yahuda mo ga kaŋ i bande. ⁶ I ga koy ga Rabbi Irkoy ceeci nda ngey feeji-ize yaŋ, nda ngey hawey , amma i si dia. Zama a fatta i bande. ⁷ I na Rabbi Irkoy zamba, ina ize yaŋ hay kaŋ manti halal ize yaŋ. Sohon binde handu follon ga wasa g'i halaci ngey nda ngey arzakay kulu. ⁸ Wa hilli funsu Gibeya ra , wa hilli funsu Rama ra ! Wa kuwa Bet Aven ra ga ne : Benyamin, hagoy ni banda ! ⁹ I ga Efraymu halaci ciiti zarro hane ; ay ga sanni taabanye ci Israyla borey se. ¹⁰ Yahuda jine borey ga hima sanda day borey kaŋ yaŋ ga hirri seeday ganandi. Ay g'ay futa zumandi i boŋ sanda hari zuru cine. ¹¹ Efraymu di gurzugay da kankami ciito do, zama a gana fondo kaŋ ga kanu nga bina se. ¹² Ay ga ciya bii Efraymu se, da gaw Yahuda se. ¹³ Efraymu ga dii nga dooro, Yahuda mo nga maray yaŋey. Efraymu koy ga faaba ceeci Assiriya bonkoono Yereb do . Ama bonkoono din si hin g'i no baani, yaddin mo no a si hin ga i dorey safar. ¹⁴ Ay ga ciya sanda muusu beeri Efraymu se, sanda muusu beeri ize Yahuda dumo se; Ay, oho ay bumbo no g'i tooru_tooru, ga dira ndey, ay ga kondey, boro kulu mo no si hin ga i taa ay ga. ¹⁵ Ay ga dira ga koy ay kwaara, kal han kan hane i na ngey taalo bay, ga ay moy dumo ceeci, waato kan i furo bine hasaraw ra, i ga ye ga kaa ay do.