¹ Annabo Habaku adduwa neeya! ² Ya Rabbi, ay maa ni jinda, ay hamburu mo. Ya Rabbi ma ni goyey tajandi jiirey bindi ra, Ni m'i bayrandi mo jiirey bindi ra. Futay ra mo ni ma fongu ni suujo. ³ Irkoy kaa ka fun Theman, Hannanta kaa ka fun Paran tondey bon. - (wa dangey) A hinno ga beena kulu daabu a daarza mo ga gaanda laabo kulu toonandi. ⁴ A kambey nyalawu-yano ga hima da wayna kaari yano, no din mo no a hinno go. ⁵ A jine mo Almaney balaawa goono ga koy, konni balaawa mo goono ga ce banda gaana. ⁶ A kay mo ga ndunya neesi da nga moyey, a ma guna, a ma dumey kulu jiijirandi, tondi daarey mo ma tuutubu, za don-don tondi kuukey mo ma ye ganda. Za gayan fondey mo a wone yan no. ⁷ I di Etiyopia kuuru fuwey kulu tuusu, Madian woney mo kulu go jiijiriyan ra. ⁸ Rabbi dukur isey se no wala? Ni futa go isey do harey. Wala mo ni bine tuna go teeko do harey? Ni na bariyey kaaru kan ga ti ni wangu torkey kan ga kande faaba. ⁹ Ni laaliyan fondey kan ga kundey gooji ya sanni tabbate no. Ni na ndunya kortu ka fondo no isey se. ¹⁰ Tondi beerey din i jiijiri mo. Beene hiriyaney bisa, hariguusuyaney mo na jinde tunandi ka salan ka ngey bondayey sambu beene ¹¹ Wayna da hando kay ngey nongey ra, ni hangawey kaariyan kan i ga dira nda, da ni yaajo nyalawuyano walay yan no i jine. ¹² Ni na ndunya windi ni dukuro ra, ni na dumi cindey tuutubu ni futa ra mo. ¹³ Ni fatta ni jaama fabayan se, Ni wone subaananta faabayan sabbey se no. Ni na fuwo beena bagu boro laalo windo ra, Ni n'a feeri-feeri mo za ganda ga kaa kala bono ga. ¹⁴ A yaajey no ni wangarey boney hay da, I kaa sanda almahaw cine, zama ngey ma ir say-say, Ir farhan hari ga hima ngey kan yan ga alfukarey nwa tuguray ra. ¹⁵ Ni na teeko taamu nda ni bariyey, hari banbatey kulu. ¹⁶ Ay maa ay gundara jijiri, ay me-kuurey jijiri mo a jinda maayanon se. Londibunay nay di. Ay kangey mo ga jijiri, zama ay ga hima ka dangay ka Rabbi zaro battu. Watinkan kankamkwa ga kande iri kunda gaa wongu. ¹⁷ Amma ba jeejey nya si boosi te, reyzin nya si ize hay, zeytun nya taabo ciya yaamo, farey si te nwari mo. Baa feejey darey ka fey da ngey kaley, i ma si hawey gar mo ngey kangayey gaa. ¹⁸ Kulunda yaadin ay ga farhan Rabbi do, ay farhan i faabakwa Irkoyo do. ¹⁹ Rabbi, koy beero no ga ti ay gaabo, A ga ay cey bare ga himandi danga jeeri wone yan cine, A ga nan ay sobay ga dira nangu kuukey bon. Doonikoy Jina bora se: I ma te da moolo.