¹ Sabatɩ kaajɩkʋɖaka, gajaka gajaka kutu kutu ɩɖe lee bɔkɔɩ kʋshile ʋsəbaka na gəŋ, Marii Magɩɖalaa kaja na Marii asaaka ba ce batɩ kiɖe ŋkufo. ² Na gatəna gatar nɩkastiɩ; Aɖʋwaa: ɩkoyar a malaɩka ɖən, argə n'alaŋ apɩ tɩ tine ntala n'asə nlaŋ. ³ Ayaashɩ aɖe tɩ ŋələ ŋələ ɖaa ʋshile ma, ɩtoko ɩɖe kərə pampam ɖaa ʋcitalfuro ma. ⁴ Na mbaɖee bana tʋŋa ŋkufo ma, asampəna ɩkpa pɩ bafəɖa atən atən acii ŋŋuro laŋ. ⁵ Ama Malaaɩka a lə basəmprə waa: Anyɩn, asampəna ɩpaa kpa nyɩn na; Aɖʋwaa: Ŋyɔ waa: Yeesu nɖee bakal ma, ʋni n'ɩna yɛɛ. ⁶ Ka kɔɔ aɖa atɩ ya na, anənə ɖaa abʋŋa alə anyɩn ma. Pɩ ma atɩ ŋə gaɖuɩ ba ɖʋ nɩ ma. ⁷ Kʋla ma were atɩ lə abakəŋja waa: Aŋənɔ aɖoo bakono nɩ, aɖa galilee na saa anyɩn, ntɩlə anyɩn waa: Ŋkəŋ na, ɩnɩɩ ŋə nɩ. ⁸ Ŋkəŋ na basəmprə bafəl acuu na ce asampəna ɩɖəkpa pɩ, ama bɩ cine ɩɖe kər baɖe ba tɩ yɔbɔ yɔbɔbɔ na ce ba tɩ lə ashee abakəŋja. ⁹ Na Yeesu amana wa na pɩ akur atən aŋyɩɩ na yɛɛ bari ɩkei. ¹⁰ Ŋkəŋ na Yeesu alə pɩ waa: Asampəna ɩpaa kpa anyɩn na; kʋla ma atɩ lə ambapal waa: Ba tɩ wa na'mʋ galilee ŋkəŋ na baŋə amʋ. ¹¹ Saa nɖee basəmprə ba tɔɔ ʋnyɩnca na ce ma, na mbaɖee baɖa nat ʋŋa ŋkufo ma, bakpa mpa ŋi, a lə basaraalaaja kaɖibaja bʋkɔɩ bʋ sara ma. ¹² Basaraalaaja na boŋono ba rəŋə gəŋ ma, na ba yɛe gʋfaŋa, naa ashee ɩsɔja mana ɩtanɩ tuutuuma. ¹³ Alə pɩ waa: Ba lə waa: Baɖa atən nafol ma n'abakəŋja ba pɩ atɩ nyim aŋkompa. ¹⁴ Gominantɩ ata rəŋə gəŋ, gɩtɩ gɩ yɔ ɖaa gɩ lee naa anana ʋcine na gɩ laa anyɩn gʋtɔ gʋbɔka nɩ. ¹⁵ N'ɩsɔja ba cam ɩtanɩ n'alee ɖaa ba lə pɩ ma na galei gaɖe kantogɩ nce baa ŋkana gaɖu ɩ Yuɖaa kəbaja baɖa ma halɩ n'ʋrɔn. ¹⁶ Nábakəŋja təb n'ʋɖən ɩ ba saa ma, ba ce Galilee gʋbʋnʋɩlaŋ Yeesu acee faŋa pɩ ma. ¹⁷ Saa nɖee baŋə nɩ ma, na ba kur atən baŋunii aŋyɩɩ. Ama bagɩcuca nɩ baɖən baɖe batilee sika nanɩ. ¹⁸ Yeesu akəm asəla na pɩ ma, na alə waa: bashee amʋ ɩko ɩŋunii alaŋ n'tən. ¹⁹ Kʋla ma a ce atɩ lee ɩsamaa baŋunii bapra ambakəŋja, məna ma pɩ bʋto na Gʋya, n'ʋpi, na ŋŋuro nsoŋsono ba ŋyɩɖa. ²⁰ Naa ɩcere pɩ bʋkɔɩ ŋŋɔn ashee anyɩn ma. Kɩɖe ma, nɖa anyɩnasul baaŋjeŋ, halɩ ɖulinya ʋbon kʋshile.