¹ Amba sɔlɔka, gʋbɔ gʋnyɩʋtaja nŋɔn na shee anyɩn. Abɔ ɩnyɩʋ ɖe ni, ntɩ kaka anyɩn na yɛɛ ɩŋəna anyɩna cɩrɩ cɩrɩ kagʋfaŋa nɩ. ² Naa ɩnaa lige alesʋra ɩ Amabi mana babʋŋa lə, atɩ nɖiyar n'atafʋraka agʋpɔ kaa lei ŋgaɖee. ³ Batəmka ba cere anyɩn ma, yɔma baamʋnʋ nɩ waa: Alʋwaatʋ akəŋja nɩ, mbaɖee ba na bɩlɛɛ ma, batɩ pɩ nalee saarɩ, na sana bagɩnyɩnfɔnɔ kaasa, ⁴ Naa Yeesu alə waa: aɖe taakɔɔ apɩ aa? ʋpɩʋ ɖe ʋɖaɩ? Aɖʋwaa: Doo ɖaa atɩbayaya ba ci ma, baamʋnʋ ɩɖa kaɖawa ɖoo ɖaa bashɩ leeɩ ma. ⁵ Banyɩr waa: Gaja kaaleijɩ ba lee na nɖəla na gatəna, bʋto nɩ na balaa gatəna, ⁶ N'alesʋraɩ ɩbʋŋa ɖa ɖoo kaɖulinya nɩ ma, bʋto bʋjɩka ɩŋunii, ⁷ Galei gaɖe nɔɔ na baɖʋ na saa ɩkəma kʋshile batɩʋ na gatəna na nɖɩla na bɛrɩbɔnɔ ʋtonu. ⁸ Ama, ambasɔlɔka gaɖɔŋkɔnɔ gaɖa ka, kɩ sim ɩnaa nyɩr, waa: Gaja kaŋyɩɩ, ʋshile ʋɖɔŋkɔnɔ ʋɖa ɖa ɖaa bʋja miilima, nabʋja miili bʋɖa ɖa ɖaa ʋshile ʋɖɔŋkɔnɔ na. ⁹ Nɖiyar kaapalka bʋkɔɩ alə waa ataa lee ma k'ʋleʋ na. Ɖaa baɖən basŋee ɩja ma na, ama, a na tɔɔ n'anyɩn pɩ suuru, ka yɛɛ ʋɖən a cii ɩnara na, ama atɩ yɛɛ waa: Baaŋa afʋba nɖawa. ¹⁰ Nɖiyar ʋshile ʋʋtɩpɩ ɖaa apɩtɩrɩ ma; kʋshile ɖe nɖəla ntɩŋwərə wərə, na bʋkɔɩ bʋshɩɖa ma, ɩŋaŋa naa gatəna na bʋkɔɩ bʋ ɖa alaŋ ma ɩshɩ ʋtonu. ¹¹ Ɖaa ayɔkɔɖe ɩnɩɩ ŋaŋa ma, Baɩ səmka anyɩngasana kaɖeiɖei kʋɖaʋ ʋɖa, ¹² Aɖʋwaa: ɩtɩ cee cee na Yɛɛ waa: Nɖiyar ʋshile ʋkpa were were, ɩshile ɩ ʋtonu ʋcam ashɩ aŋaŋa baamʋnʋ ma! ¹³ Ama gɩtɩ saa bʋkɔɩ aləɖʋ ma naɩ, nɖəla nfɔlɩ na gatəna gafɔlɩ, gaɖuu ɖeiɖei aɖa ma. ¹⁴ Galaŋ, naa aye kpa, atɩ basɔlɔka, baaŋa aɖʋ agʋlɔ gawaka nama gaɖən gapaa wəɖa anyɩn na, ɖa ma cɩrɩ cɩrɩ na fɛɛni halɩ akpa awəɖa anyɩn. ¹⁵ Shee ma ija waa: Atɩ ndiyar asuuru alee anyɩnʋɖoo na nɖi njɩ, ɖaa atasɔlɔka atʋwor pɔɔl aŋɔn ashee anyɩn ma, n'ʋyɔʋ n nɖee awəɖa ma. ¹⁶ Bʋkɔɩ ana ŋɔ abɔ ɩŋunii nɩ ma na gəŋ, kokoo atɩ lə alesʋra nɖee ɩɖən asɔm ʋrəŋu ma, na mbaɖee balee n yashɛshɛ baja na mbaɖee kətɩ kaashɩ gɩshɛbʋ na ma bana koɖo koɖoji ɖaa ʋŋɔn ʋsaa ka ma, na shee bagʋlɔdur ka. ¹⁷ Ama, anyɩn ambasɔlɔka, nlə anyɩn boŋo ri ma anyinalɔ naa ipaa tɩ tərə akʋn nbɔnɔ baja bɩnyɩŋca naa kɔɔ na ʋcine wəɖaka na Gaja abəɖa na. ¹⁸ Ama, naa ma na kpər n'atɩnɖiyar n'atafʋraka Yeesu-Kristo agʋjɔ n'ʋyɔʋ nɩ. Aɖʋwaa: Ajie ʋkʋmʋ, tɔɔ na n nyimə na ce na ce! Ami.