ATCHAMADO_BEN-aug_act_text

Eta 16

¹ ́Lǝ ŋgbǝ́si ǝ́ yi Derbe kidǝ́ Lystre. Í kpɔ́, Adǝ̀kplɔ̀vi dǝ́ká lǝǝ́nan í wó yɔ́ɛ bǝ́ Timótè, yùúdà nyɔ́run xɔ̀sǝ̀tɔ́ yǝ vi í yǝ́ dádá nyin hǝ́là tɔ́. ² Nɔnvíó lǝ Lystre kidǝ́ Icone wó nunyɔn nyɔ̀nŋ́gbín có ŋún. ³ Pɔ́lù ji bǝ́ yǝá kprɔɛ sǝ́ yi, í, kǝ ì kprɔɛá, ǝ́ còvònɛ́ɛn, càgbǝ yùudàtɔ́wó lǝ lǝ tohó inaawóá, dó amɛnsíamɛn nyán bǝ́ yǝ́ dadá nyín hélàtɔ́ ó. ⁴ Kǝ wó lǝ tó ǝ̀dugànwó mɛn án, wó lǝ núnɛ́n nɔnvíwó bǝ́ wóá wɔ dǝ́ yǝ̀rusale; yǝ́ mɛndɔdɔwó jí. ⁵ Ǝ̀hamɛn wó lǝ xɔ ŋúnsɛ́n dódó lǝ xɔ̀sǝ̀ mɛn, í wó lǝ sùgbɔ kpée ŋkǝkǝ yi ŋkǝkǝ ji. ⁶ Kǝ gbɔ̀ngbɔ̀n kɔ̀kɔ̀ xǝ́ǝmɔn nǝ́ wó bǝ́ wó ŋ́káa nú mawu nyɔn lǝ Àsià mɛn án, wó tó Phrygie kídǝ́ Gàlátì duamɛn dí. ⁷ Kǝ wó vá tǝbɔ Mysie a, wó wɔ dòdó bǝ́ yoá dó Bithýnìàn mɛn, vɔ̀à Yesu yǝ́ gbɔngbɔn ŋ dǝmɔn nǝ́wó ò. ⁸ Wó tó Mysiɛ í yi Toas yǝ́ du gán mɛn. ⁹ Pɔ́lù kpɔ́ ŋtǝgan lǝ̀ zanmɛn, Màsèdónìtɔ́ dǝ́ka lǝǝ́nan, yɔ́ɛ í nubǝ́:<< Va Màcèdónì nɛ́n nàn kpǝ́dǝ́ mián ŋún.>> ¹⁰ Kǝ Pɔ́lù kpɔ́ ŋtègàn an, ǝ̀káǝ̀ká mí cɛ́ɛn bǝ míán yi Màcèdonì nǝ́ míán xòtanɛɛ́n bǝ́ Mawu í yɔ́mí váyi bǝ́ míán mú yǝǝ́ nyɔn. ¹¹ Kǝ mí dó tɔjihún có kǝ́kǝ́ troási, mí wɔ nɔ́n zɔnzɔn tútú yi Samothrace, í ŋkǝkǝ vààtɔ́á mi vá Néapolis. ¹² Có lǝǝ́nan án, mí yi Philipo kǝ í nyín Màcedonìà gán, kǝ lǝ vǝ̀vǝ́ wú lǝ núto mɛn yǝ́ dugán mɛn, kǝ i nyin Rómàntɔ́wó du xɔxɔ í mí nɔn dù ŋunan mɛn nɛ́n ŋkǝkǝ dǝ́wó. ¹³ Sábáti yǝ́ ŋkǝkǝa jíá mí yi ǝ̀hɔ̀n àn yǝ́ Kpáánuxó lǝ ǝ̀tɔa yǝ́ kpádǝ́ká fí mí lǝ bui lǝ dǝ̀xò xó dǝ́ká lɛ. Mí kanrɛn í xonu nɛ́n nyɔ́nrun kǝ bɔ dǝ́ lǝŋun naan wó. ¹⁴ Nyɔ́nrun dǝ́ká kǝ tɔbǝ́ Lýdì, àvɔ̀n jɛn vùn satɔ́ lǝ Thyatire duamɛn, kǝ súbɔ́nɛ́n Mawu, lǝ dóòtó mí. Axótɔ́ hun yǝ ji nɛ́n à cɔ́ɔ̀dǝ lǝ ǝnyɔn kǝ Pɔ́lù lǝ núnɛn wó mɛn. ¹⁵ Kǝ wó lǝ mawuci nɛɛn án, kidǝ́ yǝ́ xómɛn tɔ́wóá, ǝ́ wɔ bìɔ̀bíɔ́ ilá nǝ́ mí í lǝ nú bǝ́:< mi kpɔ́ɛ bǝ́ ŋ nyin ǝnú dodó wɔtɔ́á nǝ́ Axótɔ́á, mi vá tiŋ xómɛn í nɛn kidǝ́ ŋ?>> Í ǝ́ nán mí kàká ¹⁶ Ǝ́ vámɛn bǝ́, kǝ mí yikɔ ǝ̀dǝ̀xoxóá, nyɔ́nrunvi dǝ́ká kǝ mɛn ǝ̀fán kaka gbɔngbɔn lǝ á va dóògo mi. Ǝ́ kpɔ́nɛn ǝ̀ho sùgbɔ lǝ ǝ̀fán kaka mɛn nɛn yǝ́ kɔta mɛnwó. ¹⁷ Nyɔnrunví ilá jǝ mián wó kidǝ́ Pɔ́lu yomɛn í lǝ nú kidǝ́ àxá sínsín bǝ́:< iláwóá, Jìŋkori yǝ́ dɔláwó í wó nyín. Wó lǝ xonu nɛ́n mi co dǝ̀dǝ̀kpɔ́kpɔ́ yǝ́ mɔ́n án ŋún í.>> ¹⁸ Ǝ́ wɔnɛ́n ŋkǝkǝ sùgbɔ. Vɔ̀à Pɔ́lù, kǝ wɔ xomɛnfíɛ́n sùgbɔá trɔ́ í lǝ núnɛ́n gbɔ̀ngbɔ̀n àn bǝ:<<ŋ dǝgbǝ̀ noo lǝ Yesu Kristò yǝ́ ŋ́kɔ́ mɛn dò lǝ mɛn>> í ì do zǝ̀dǝká. ¹⁹ Kǝ amɛn kǝ tɔ nyin nyɔnru an wó kpɔ́bǝ́ yoó hó kpɔ́kpɔ́ mɔ́nnu búá, wó lǝ́ Pɔ́lù kídǝ́ Sílàs í kprɔwó yí àfimɛn gbaŋgba lǝ ǝ̀dù mɛngánwó ŋkɔ. ²⁰ Kǝ wó cɔ́wó díisá nɛ́n kójódótɔwó, wó nú bǝ́:<<Ŋúncu inan wó nyín yùúdàtɔ́wó í wó lǝ hɛn càkàcáká vá míán dumɛn. ²¹ Wó lǝ kpráanú kǝ wó ŋ́ jǝ bǝ́ mián wó Ròomàntɔ́wó miàn zɔn dǝjí ò.>> ²² Amɛn háwó có dǝ́ Pɔ́lù kídǝ́ Sílàs ŋun, kojódótɔ́wó zɛn wó wuwó í wó dǝgbǝ̀ bǝ́ wáxowó kidǝ́ átí. ²³ Kǝ wó xoó jrɔ lǝ xòxò sùgbɔ nuán, wó cɔwó dǝ́ gàkpá mɛn. Wó nú nɛ́n gàkpájikpɔ́tɔ́ bǝ́ ná túwó kidǝ́ kàká dǝ́jí. ²⁴ Kǝ ì xɔ gbǝ̀daà ŋunnan án, gàkpájí kpɔ́tɔ́á dáwó dǝ́ gàkpáá yǝ́ doŋdomɛn. Í cɔ́ ǝ̀hunkpowó dǝ́ àfɔ nóó. ²⁵ Sǝ́ yikɔ ǝ̀zan gànvivǝ̀à, Pɔ́lù kidǝ́ Silàs lǝ xodǝ̀ í lǝ jihà í lǝ káfú Mawu, í gàkpámɛn nɔntɔ́ dǝ̀áwó lǝ dóòtówó. ²⁶ Zǝ̀dǝ̀káá annyingbán húnhún jìguìjigui, zǝ̀dǝ̀káá, ǝ̀hɔ̀nwò séé hun í gàkpámɛn nɔntɔ́ dǝ̀síàdǝ yǝ́ gawɔrɔwó tú. ²⁷ Gàkpá jí kpɔ́tɔ́ fɔ́n có arɔnmɛn í kpɔ́ bǝ́ gàkpá hɔnwó lǝ hùnhùn dɛ. Ǝ́ cɔ́ yǝ́ wú í jí bǝ́ yaá wu yǝ dǝ́kiyǝ dó ǝ́ bu bǝ́ gàkpámɛn nɔntɔ́wó séé í sí. ²⁸ Vɔ̀à Pɔ́lù í lǝ nú bǝ́:< wɔ ǝ̀vɔɛn dǝ̀ǝkiwó ò, ǝnú kǝ jɔa míán séé mí lǝlá >>. ²⁹ Gàkpájí kpɔ́tɔ́ bíɔ́ ǝnúmɛn kɔkɔ, í dómɛn kpàtàkpàkpà, í lǝ kúkú nɛn vɔ̀nvɔ́n, í gǝ́jɛn dǝ́ ŋkɔ nɛn Pɔ́lù kidǝ́ Silàs. ³⁰ Ǝ́ dǝwó do có lǝǝ́nan í nú bǝ́:< nú kǝǝ́ màan wɔ nɛ́n mán kpɔ́ xɔ̀xɔ̀? >> ³¹ wó nú bǝ́:<< Xɔ́sǝ dǝ Áxótɔ́ Yesu ji í wo kídǝ́ tɔɔ́ xomɛn míán kpɔ́ xɔ́xɔ́.>> ³² Wó cɔ́ Axótɔ́á yǝ́ nyɔn vá yǝ́ kídǝ́ amɛn kǝ lǝ áxóámɛnwó. ³³ Í gákpájíkpɔ́tɔ́á kprɔwó lǝ ǝ́zan gáxóxó ŋunanmɛn,í í zin ábi nǝ wó í lǝ Mawuci nǝ́ yǝ́ kidǝ́ yǝ́ xómɛntɔ́wó akááká. ³⁴ Ǝ kpɔ Pɔ́lú kidǝ́ Silás yi yǝ́ xómɛn í nánwó ǝnúdudu. Ǝ́ lǝ táyǝ́ súgbɔ kidǝ́ yǝ́ xómɛntɔ́wó, dó wó xɔ Mawu ji sǝ. ³⁵ Kǝ ǝŋun kǝ́a, kojódótɔ́wó dɔ́ amɛn nɛ́n gákpamɛn nɔntɔ́wó ji kpɔ́tɔ́wó í nú nǝ́wó dɛ́ nɛ́n wóá yi.>> ³⁶ Gákpájíkpɔ́tɔ́á nunyɔn iláwonɛ́n Pɔ́lú bǝ́:<< Kójódótɔ́wó dɔŋ vá bǝ́ má tací mí dɛ́ nɛ́n mian gbɔyi, ífiaá, mi do í mian yi lǝ ŋúntí fáfá mɛn .>> ³⁷ Vɔa Pɔ́lú núnɛ́nwó bǝ́:<< Wó xo mí lǝ gbaŋgba lǝ amǝwó ŋkúvímɛn, mián wó Rómantɔ́wó, kǝ wó ŋ́ wɔ ǝnúdǝ́kɛ́n o. Wó cɔ́ mí dǝ́ gakpámɛn í ífiaá, wó vá lǝ dǝmído lǝ bǝbǝ mɛn an? óó! ŋ́ ká tǝŋ́ nyín ǝnɛ́n wo ŋtáwó wá vá dǝ mí do.>> ³⁸ Gakpájíkpɔ́tɔ́wó vɛ doŋɛn nɛ́n kojódótɔ́wó í vɔnvɔ́n jí wó kǝ wó sǝ bǝ́ Pɔ́lú kidǝ́ Silas wó nyín Rómántɔ́wóá. ³⁹ Kojódótɔ́wó vá dǝkúkú nǝ́wó í kǝ wó dǝwódo lǝ gakpámɛn án, wó bíɔ́ có Pɔ́lú kidǝ́ Sílás gbɔ́ bǝ́ wóá có lǝ ǝdúá mɛn. ⁴⁰ Pɔ́lu kidǝ́ Silas do nyawó lǝ gákpámɛn í yí Lydí yǝ́ xómɛn. Kǝ Pɔ́lú kídǝ́ Silas kpɔ́ nɔnviwóá, wó dó ŋúsɛ́n, wó í lǝ ŋunan yǝ́ ŋgbǝ́á, wó có lǝ ǝduá mɛn.