ATCHAMADO_BEN-aug_act_text

Ǝta 10

¹ Ŋúcu deká le Kaisarea ke wóyɔ́nǝ́ be Kornelio, enyi italia ye sojawo ŋkɔnɔtɔ́ le roman. ² Kornelio donǝ vǝvǝ́ Mawu sǝnsǝn i ye kiɖǝ ye xómǝtɔ́wó see vɔ́nǝ Mawu. Enánǝ enú ayamǝnɔwó, ixonǝ ɖǝ nǝ Mawu gasiagamǝ. ³ Gbeɖeka wetrɔ́mǝ sigbe gàtɔ̀n mǝ enǝé, Kornǝlio kpɔ́ Mawu ye ŋǝdótɔ́ ɖéká le ŋutǝgàn mǝ, mawuŋǝdótɔ́ á yɔ́ɛ bǝ́: Kornǝlio ! ⁴ Vɔnvɔ́n jíi íile kpɔ ŋǝɖotɔ́á le gààn. Kornǝlio le kasǝ bǝ́: Axótɔ́, nukǝi jɔ ? Mawu ŋuɖótɔ́á lǝ ɖóŋú nɛn bǝ́: sigbǝ nǝ́ exonǝɖǝ kiɖǝ sigbǝ nǝ́ enanǝ́ enú amǝwóa jǝ Mawu nu. ⁵ Dɔ amǝ ɖiɖà Yopa nǝ evávɛyɔ́ Petro ke wógbǝ yɔ́nǝ́ bǝ́ Simon à vá. ⁶ Ezin Simon ke wɔnǝ eranwó wemá i ye xomǝ lǝ axúa tóá gbɔ́. ⁷ Ke mawuŋǝdótɔa yià, Kornǝlio yɔ ye dɔvi amǝvǝ, i yɔ soja ke sena Mawua deka i seŋ kpówó ⁸ ke ìnu enú ke jɔawó nǝ wó jroa, edɔ́ wó ɖiɖá Yopa. ⁹ ke wózɔn ŋkeke amɛvɛ ye zɔnrin igógó Yopa duamǝà, Petro ra mawuxɔa yi jí sigbǝ nǝ nyidɔn gawivǝmǝ enǝ bǝ yǝávɛ xoɖǝ̀. ¹⁰ Fuƒǝ́ lǝ́ lǝ́ǝ i anúɖuɖu le jroǝ, kei tɔ́ enúdudu ɖadaà, ekpɔ ŋtǝgan. ¹¹ Ekpɔ jiŋkui hun ɖɛ, i enu gáŋgán ɖǝka divà anyigban ji sigbenǝ akpɔ́kpɔ enǝ iwɔ zogo amǝnǝ enǝ. ¹² Eran afɔ amǝnǝnɔn, eran ke canɔn awó kiɖe xevi ke le jiŋkuiawó lǝ mǝ ɖɛ́. ¹³ Ǝgbǝ ɖeká lǝ ɖi nɛn be: «Petro ! có nǝ́ nàwu enuláwó i ɖaɖu.» ¹⁴ Petro lǝ ɖóŋu bǝ: «Gbǝɖǝ, àxótɔ́, enúkǝ ŋú ekó lǝ alo enúkǝ xoɖuawó ŋyinǝ tiŋ numǝkpɔ o. ¹⁵ Egbǝ́à gbǝ ɖi nɛn zèvéàtɔ́ bǝ́: «Enúkǝ ŋú Mawu kɔa, ŋɖòláyɔ́ɛ be enu xodu o» ¹⁶ Wó wɔnuá enǝ kprɔdo kprodo zǝtɔn i wotrɔ́nua yi jiŋkúi. ¹⁷ Gakǝmǝ kǝ enúá kpácá Petro ɖɛ i ìle butamǝ kpɔ i cákáɖɛa, amǝkǝ Kornǝlio dɔawó lǝ biɔsǝ kǝkǝ i vá dɔ́ xɔxɔ́ánu. ¹⁸ Wókɔ́ gbǝ yiji ilǝ biɔ́se bé; Simon ke wó yɔ́ nǝ́ be Petroa lǝ axómǝà ? ¹⁹ Petro kpǝtɔ ile bu tamǝ kpɔ́ có enua ŋu i Axótɔ́á yɔ́ɛ ibǝ́: amǝ amǝntɔn lǝ tɔɔ́ xɔxɔ́nu ilǝ jiwò. ²⁰ Ló nǝ́ nàyi kiɖǝ́ wó, ká vɔnvɔn nǝ́ wó o, ɖobǝ enyǝ idɔ́wo ɖíɖáwò. ²¹ Petro ɖivá i le nú nǝ́ amǝawó be: enyǝ ínyi amǝkǝ mìlǝ jíá ! ²² Wóɖónú nɛn bǝ́: «Áhuà gan, Kornǝlio, amǝ dodó kiɖǝ Mawu sǝntɔ́, ke yudatɔ́wó see nú nǝ́ yǝ nyɔ nyɔŋgbia, xɔgbǝ có mawuŋǝdótɔ́ ɖǝ́ká gbɔ́ be ná kpǝ́woé vá ye xómǝ nǝ́ navá nu mawunyɔ nɛn. ²³ Petro kpǝwó be wácí yegbɔ́ yǝ dɔn ke eŋu kǝ nyidian, wóƒɔ́n í ɖǝdó, Yoppé ye nɔvi dǝkáwó cáwó kprɔɛ dó. ²⁴ Ye ŋkegbea mǝa, wó vɛ ɖó Ceraro, Kornǝlio kiɖǝ kpǝ ye mǝ vǝ́vǝ́wó i wóvá bɔɖɛ ile nǝntǝ kpɔ́ wó. ²⁵ Ke Petro ɖo xɔamǝà, Kornǝlio va dǝnú gú nɛn. ²⁶ Petro fɔɛn jetǝ ibǝ́: «Có, agbǝtɔ́ i nyǝcá ŋnyí». ²⁷ Wámǝvǝàwo kaseŋ ɖǝdó exɔamǝ i Petro kpɔ́ amǝwó bɔ ɖɛ́ gédégǝ́ɖǝ́. ²⁸ Petro le nú nǝ́ wó bǝ́: «Mìan ŋtawó minyá bǝ erä ŋɖǝmɔn nǝ yudatɔ́ be nádoha kiɖǝ edububumeetó, aló áɖisa yi gbɔ́ o, vɔ Mawu ná i ŋnyá bǝ ŋjǝbǝ́má bui bǝ́ amǝɖǝkaya xoɖu alɔ ŋwɔ i wá dóha kiɖǝ o. ²⁹ Ye ídɔ́ i ǝ edɔ́amǝ ɖiɖaŋan nyǝŋgbé vavá o. Xotɔn mà biɔ́ mi sǝ bǝ́: «Nukǝi dɔ́ i mì dɔ́ amǝŋ ? ³⁰ Kornǝlio be: ŋkǝkǝnǝa keà, ŋlexɔɖǝ le tiŋ xomǝ sigbǝnǝ fiɛnyigbɔ́ gàtɔ́n mǝ enǝ́, i ŋucu ɖeká dó awudazò ívá jǝtǝ dǝ ŋkǝŋ. ³¹ Ǝ́núŋ be: Kornǝlio, mawusǝntɔ̀ɔ́ ɖǝxowó i kpɔ́ sigbǝnǝ ewɔnǝ enyɔɛn nǝ amǝwóá, ³² Dɔ amǝ ɖíɖá Yopa nǝ wàvɛyɔ́ Simon ke wógbe yɔ́nǝ́ bǝ́ petroà, va. Ezǝn Simon, eranwo wemawɔwɔtɔ́ɔ́, ke ye xomǝ lǝ axua tó à gbɔ́ ? ³³ Iŋdɔ́ amǝ ɖiɖàwò zeɖeká. Enyɔ́n bǝ́ evá.Miáwó see mí bɔdǝ Mawu ye ŋkuvimǝ ɖɛ bǝ nàvá nu enyɔ, ke Mawu cɔ́ nǝ́ wòa nǝ mi. ³⁴ Zeɖǝkà Petro lǝ nú nǝ́ wó bǝ́: Nyawói ŋkpɛ bǝ, mawu ŋdǝ́nǝ́ vovototó amǝwó mǝ o. ³⁵ Le edu ́̀́ɖǝ̀siaɖǝ́ mǝà, amǝkɛ vɔnvɔn nɛn i wɔnǝ enúdodóa ijǝ nú i jǝ nǝ ji nɛn. ³⁶ Miményá enyɔn ke ìnu ɖiɖá israɛl dukɔ́ań. edǝ gbǝƒán bǝ enyɔ nyɔɛán la hǝn ŋtífáfá vá tó Yesu ke nyí amǝwó see wó xótɔ́á jí. ³⁷ Mìnyá be wo ɖǝgbǝfan enyɔ nyɔɛan le Yudea, wó jǝgɔmǝ co Galilea ke yohanes ɖǝgbǝfan nyɔnnyrɔàn jrɔ̀á. ³⁸ Mìnyá bǝ́ Mawu cɔ́ gbɔngbɔn kɔkɔ kiɖǝ́ ŋúsǝ́n si amì nǝ Yesu Nazarethtɔ́á. Ǝdisa tótoxó sugbɔ i dadɔ̀ nǝ amǝkǝ abosam brá ɖɛ́aawo ɖobe Mawu gbɔngbɔn lɛ kiɖǝǝ. ³⁹ Enuke iwɔ le Israɛl kiɖe Yerusalɛm dumǝawóà, míáwó ikpɔ toxó. Vɔ̀à wó krɛn dǝ atiŋú iwui. ⁴⁰ Gaŋke Mawu fɔɛn dǝ citrǝ yǝ nŋicɔa mǝ, i ɖǝǝdusa nǝ́ amǝwó. ⁴¹ Ŋnyi amǝsiamǝ ikpɔɛ o, míawó ke Mawu cán bǝ míá nyí kunuɖǝtɔ́áwó ikpɔ́ɛ. Kǝ ifɔn có yɔmǝà, míawó i dunú í nunú kiɖǝǝ. ⁴² Enú nǝ́ mi bǝ mia ɖǝ gbǝfan enyɔn nyɔɛan nǝ amǝwoă, nǝ mia ɖǝkúnu be Kristo ínyi amǝ kǝ Mawu cán be nává ɖó kojó amǝ ágbéàgb̀wó kiɖǝ amǝkúkúwó see. ⁴³ Yéŋú i Mawu gbefanɖǝláwó see ɖǝnǝ kúnu lǝ cagbǝ ŋúsǝn kǝ lǝ sia tà, amǝsiamǝ ke xɔ jisǝ̀a, wácɔ yǝ núvɔ́nwó a seŋ kǝǝ. ⁴⁴ Petro ŋurí nyɔan nu gbɔxɔ́i gbɔgbɔn kɔkɔa divá amǝkǝ le xɔamǝa wó see jí o. ⁴⁵ Xɔsǝtɔ́ yuɖatɔ ɖǝkáwo kprɔ Petro do yi Yopa, ke wókpɔ be Mawu cɔ́ yi gbɔngbɔan kɔ dɔ amǝbulɔmǝ kǝ ŋnyi yudatɔwó á o ji a, ekpácá wó i enu kú nǝ́ wó. ⁴⁶ Dobe wósǝ i wólǝ do&gbee vovovo wó ilǝ kafú Mawu, Petro be: ⁴⁷ «Amǝláwó cáwó xɔ gbɔngbɔn kɔkɔa sigbǝn mí̀àwo kǝ nǝ enǝ́, Amǝ ɖǝ atǝŋ xǝmɔn bǝ́ wóŋká nyrɔnwó oa ? ⁴⁸ Edǝgbǝ bǝ wá nyrɔnwó lǝ yesu Kristo yo ŋkɔ́ mǝ. Lǝ ŋna ye ŋgbea, amǝawó biɔ́ có Petro gbɔ be na nɔn yoó gbɔ ixɔ azan.