ATCHAMADO_BEN-aug_1co_text

Ǝta 7

¹ I fiá kúdə́ wə̀mán kə́ mí ŋrɔn nə mìán wó ŋú, "ənyɔ́n nə amə bə́ ŋ́ká tálɔ́ yɔ́nrún ò." ² Vɔa càgbə tə́tə́kpɔ́ kə́ lá wɛ̀ bə́ mìán wɔ́ ənú kə́ ŋ́jə́á, húcú ɖə́síàɖə́ ɖólá ɖó yə́ ŋ́tá yə́ yɔ́nrún í húcú ɖə́siàɖə́ ɖó lá ɖó yə́ ŋ́tá yə̀ húcú. ³ Húcú dólá cɔ́ yɔ́nrún yə́ cúxó jənán nə yɔ́nrún í nənə kə́ yɔ́nrún cá ɖólá wɔ́ɛ́ ɖiɖá àcùágbɔ́. ⁴ Ŋ́nyín yɔ́nrún í kpácɛ̀ də́ yə́ ŋtá ɖə́kíá yə́ gótó jí ò húcú í. Nənə kə́ húcú ŋ́dó àcɛkpákpá də́ yə́ ŋ́tá yə́ gótó jí ò vɔa yɔ́nrúnɛn. ⁵ Mí ŋ́ká tə́ míán ɖə́kíwó, tóvó nə gɔ̀mə sə́sə́ ɖə́ká í nə gàmə ɖə́ tútuí mì wɔ ŋ́nánwó nə amə ɖə́kii cɔ́cɔ́ nə ɖə́xóxó. Səŋyíjiá, mìán tə́ŋ́ trɔ́ yí ɖə́dú, nə fútɔ́ ŋ́ká tə́ mí kpɔ́ nə́ ənú húétə́ d'amə nə amə ɖə́kijí dúɖú. ⁶ Əlɔ́ nú ənyə́n ŋ́ nánwó nə mì nə àfɔ́ də́ afɔ́ ɖóxó, í nyin sigbə əsé də́də́ ənə́ ò. ⁷ Ŋ́lə biɔ́ bə́ mìán dómətɔ́ ɖə́siàɖə́ mìán nɔ́n sigbə ŋ́cá ənə́ vɔa aməsiamə xɔ́ Mawu yə́ nú nánán. Aməɖə́ nə ənú nanan əlá, í aməbú nə əbúwó. ⁸ Nə trə́nɔ́nwó kidə́ kpósùwó, ŋ́nú bə́ ənyɔ́n bə́ wóá nɔ́n trə́ sigbə ŋ́cá ənə́. ⁹ Vɔa nə wó ŋ́ká tə́ŋ́ ɖú wóɖókíwó jíá, wó ɖóla ɖə́ yɔ́nrun, ənúkədɔ́á á nyɔ́n nə wó wú bə́ wóá ɖə́ yɔ́nrun sə́ŋ wú bə́ wóá vá lə kpɔ́ i lə jró. ¹⁰ I fíá, nə àcùtɔ́wó man nán əsé əlá mì (vɔa ŋ́nyin ənyə í ò vɔa àxótɔ́a): "yɔ́nrún ŋú ɖólá mán có àcúá gbɔ́ ò. ¹¹ Vɔa nə i wɔ́ɛ́ á, əɖólá cin ŋ́cú mánɖə́manɖə́ nə í gbə́ ənə́ ədólá gbə́ wɔ́ ɖə́ká kídə́ àcúá. Í húcú ŋú ɖólá gbə́ asiá ò." ¹² Vɔa nə kə kpɔ́tɔ́àwó, ŋ́nú bə́ (ənyə, ŋ́nyin àxótɔ́a í ò) nə nɔnvidə́ wɔ́ yɔ́nrún ɖɛ̀ kə ŋ́trɔ́ jíməán, í nə i lɛ̀ɖɛ̀ kídə́á, ŋú ɖólá gbə́ ò. ¹³ Nə yɔ́nrún ɖə́ ɖə́ húcú kə́ ŋ́trɔ́ jiməán i nə i lɛ̀ɖɛ̀ kídə́a ŋú ɖólá gbə́ ò. ¹⁴ Ənúkədɔ́á húcú kə́ ŋ́trɔ́ jíməán ə́kɔ́ càgbə́ yɔ́nrú nán tɔ́, í yɔ́nrún kə́ ŋ́trɔ́ jiməán ə́kɔ́ càgbə́ húcúa tə́ də́bùá, míán viwó lá nɔ́n makɔmakɔ, vɔa ifiá, wó cɔ́wó də́ àkpáɖə́ká. ¹⁵ Vɔa nə wó dómətɔ́ɖə́ ŋ́gbə́ vá lɛ̀á í gbə́ ə́xráɖɛ̀á lə àkpá ŋ́ nán məán húcúa àlo yɔ́nrún əsə́ɖə́ ŋ́gbə́ brɛ̀ lə wó kpə́ dódó ənú jí ò, Mawu yɔ́mi bə́ míán nɔ́n agbə́ lə fáfá mə. ¹⁶ Ənúkədóá nə ə́wɔ́ mɔ́n í nyán, yɔ́nrún, nə àtə́ŋ́ ɖə́ àcúwó? àlo húcú nə ə́nyán mɔ́n nə àtə́ŋ ɖə́ àsiwó?. ¹⁷ Ɖə́ɖə́, bə́ aməsiamə nán àgbə kə àxótɔ́a ŋrɔ́n nɛnán, àgbə kə àxótɔ́a ŋrɔ́n Mawu yɔɛ̀a əlá nyin tìŋ ɖóɖó lə əhá ɖə́síàɖə́ mə. ¹⁸ Aməɖə́ lɛ̀ɖɛ̀ əvo cócó kə́ wó yɔ́ɛ̀ bə́ nán xɔ́seà? bə́ ŋ́ká tə́ə́kpɔ nən àgbə trɔ́va əvo macómacó bə́ nə aməɖə́ lɛ̀ɖɛ̀ əvo macomaco kə́ wó yɔ́ɛ̀ nə xɔ́seà? Bə́ ŋ́ká nyín əvo cótɔ́ ò. ¹⁹ Ənúkədɔ́á ŋ́nyín əvo cócó, àlo əvo macómacó i lə və́və́ɖə́ ò, ənú kə lə və́və́ɖə́á í nyín wóá bú Mawu yə̀ sə̀ də́də́wó. ²⁰ Aməsiamə ɖólá nɔn yɔ̀yɔ́ mə yɔ̀yɔ́ kə́ mə í lə í Mawu yɔ́ɛá nə àxɔ́seá. ²¹ Mì gbə́ nə ənú lə aməxəxrə gbɔ́ gàkəmə mawu yɔ́ mìán? mì ŋ́ká cí jí nə ŋ́ nán ò. Vɔa nə mìán tə́ŋ́ nyin vovo məwó, mì wɔ́ɛ̀ zə́ɖə́ká. ²² Ənúkədɔ́á amə kə́ wó yɔ́ sigbə aməxəxre ənə́ tó àxótɔ́á jíá ənyín mawu yə́ mə vovo. Nənə kə́, amə kə́ vóɖɛ̀ gàkəmə wó bə́ nán xɔ́seá ətrɔ́ zù aməxexre nə Kristo. ²³ Wó xré mì kidə́ əhó, mì ŋ'ká trɔ́ zù amexexre nə aməwó ò. ²⁴ Nɔnviwó, nə əgbə nyin agbə kə́ mə mí lə́ míán dómətɔ́ ɖə́siàɖə́á kə́ wó yɔ́ mí bə́ mián xɔ́séá, míán nɔ̀n mə ənə́. ²⁵ Mì kpɔ́ kə́ ŋ́kán amə kə́ ŋ́ɖə́ yɔ́nrún kpɔ́ gbə́ɖəàwó, nyə ŋ́trɔ́ ẹnyɔ́n də́ àxótɔ́ ŋú lə ŋ́ɖə́ mə ò vɔa má nán ti ij́ nú kpɔ́kpɔ́ sigbə aməɖə́ tó Mawu yə dɔnukpɔkpɔ mə əjə́ kákádə́jí yə́ mə. ²⁶ Ŋ́buí nənə bə́ gàgbə́ nɔnɔnmə kə́ vá ɖɛ̀átɔ́á, ànyɔ́n bə́ nán sigbə́ i lɛ̀ ɖɛ̀á. ²⁷ Əká brá mì kidə́ yɔ́nrún ɖə́á? mì ŋ́ká ji bə́ mìán gbə́ɖɛ̀ ò mì lɛ̀ kə́ mì ŋ́ɖə́ yɔ́nrúnán? Mì ŋ́ká ji yɔ́nrún ɖə́də́ ò. ²⁸ Vɔa nə mì ɖə́ yɔ́nrúnán, mì ŋ́ wɔ́ ənúvɔɛn ò. Í nə yə́nrún mánɖə́ húcú ɖə́ húcciá, ŋú wɔ́ ənúvɔɛn ɖə́kin ò. Vɔa amə kə wó ɖə́wó ɖə́kiwóá wóá dógó rereré sùgbɔ́ lə wó gbə́ ŋ́kəkə wó mə, í ŋ́ ji bə́ má ɖə́ mì lə mə. ²⁹ Vɔa ŋ́lə nú əlá nɔnviwó: gàməán ŋú sùgbɔ́ ò. I fiá nə amə kə wɔ́ yɔ́nrún ɖɛàwóá wóá nɔ́n àgbə sigbə́ wó ŋú wɔ́ɖɛ̀ ənə́ ò. ³⁰ Amə kə́ lə fanviwó wóa nɔ́n sígbə́ wó ŋ́lə fanvi ənə́ ò, amə kə́ lə kpɔ́ jíjɔ́wó wóá nɔ́n sigbə́ wó ŋlə́ kpɔ́ jíjɔ́ ənə́ ò, í amə kə́ wó lə xrə́ŋɖə́á wóá nɔ́n sígbə́ wó ŋ́wɔ́ ŋ́ɖə́ ɖɛ̀ ənə́ ò. ³¹ Í amə kə́ wó lə súbɔ̀ xixə́àməán wó ŋ́ɖólá zə́n sigbə́ wó ŋ́lə súbɔ̀ɛ́ sééé ənə́ ò, ə̀núkədɔ́á xixə́ ə́lá yə́ nɔnɔməwó lə vɔ́. ³² Ŋ́jí bə́ mìán nɔ́n vɔ́nvɔ́n ŋ́ká lələ́ mì ò. Trə́nɔ́n nán ləbə ɖə́ àxótɔ́ yə́ núwó ŋ́ú, í lá jí sígbə́ àjə́ŋán. ³³ Vɔa amə ɖə́ yɔ́nrún, xíxəámə núwó bíánəŋ́nɛŋ sígbə́ àwɔ́mɔ́n í nyɔ́n nə àsíá. ³⁴ (Əmánɔ́n.) Yɔ́nrún kə́ ŋ́ɖə́ húcú ò àlo yɔ́nrún manyán húcú wó lənə́ bə nə àxótɔ́ núwó, í nə wóá tə́ŋ́ wɔ́mɔ́n í ɖə́ gótó kídə́ gbɔ́ngbɔ́n də́ vó. Vɔa yɔ́nrún kə ɖə́ àcúá, lə́nə bə nə xíxə́àmə núwó, í nə àwɔ́mɔ́n í nyɔ́n nə àcúá. ³⁵ Ŋ́lə nú əlá nə mìán ŋ́táwó nyɔnyɔ́n, í ŋ́ nyín bə́ má nú nyɔ́n àkpabùmətɔ́ də́ mìán ŋú í ò. Ələ nú ənyɔ́n əlá nə ə́nú kə lə jɔ́jɔ́á, nə mìán kprɔ́ àxótɔ́á ɖó nə mì ŋ́ká brə́ví ò. ³⁶ Vɔa, nə aməɖə́ kpɔ́ɛ́ bə́ yə́ ŋ́lə zán kídə́ yə́ gɔ́ə́ nyɔ́ŋ́gbíán (nə í dí lə húcú ɖə́ɖə́ yə́ gàməán yə́ í ŋ́ ná nán lá nyín ənə́) əɖólá wɔ́ ənú kə́ í jíá. Ŋ́wɔ́ ənúvɔɛn ó. Əɖólá ɖə́ yɔ́nrún. ³⁷ Vɔa nə í gbə trɔ́ nyin yɔ́ntún ɖɛ́ lə yə́ jíməán, nə í nyí bə́ wó lə zijí ò vɔa àtə́ŋ́ ɖú ɖə́kià jiá, í nə í cɛn lə yə́ ŋ́tá jímə bə́ yə́á wɔ́á, yə́álə kpɔ́ yə́ gɔ́ə́ húcú mayamanyán, àtə́ŋ́ wɔ́ɛ̀ fɛ̀ɛ. ³⁸ Nənə amə kə cɛn bə́ yə́á ɖə́ yə́ gɔ́ə́á əwɔ́ ənú nyɔ́ŋgbí ɖə́ yɔ́nrúnán əgbə wɔ́ɛé nyɔ́ŋ́gbí wú. ³⁹ Yɔ́nrún lə brábrámə nə àcú lə àgbə ɖɛ̀. Vɔa nə àcú kúá, əvó bə́ nán gbə́ ɖə́ húcú kídə́ amə kə í jíá, vɔa lə àxótɔ́amə. ⁴⁰ Tóvó nə ŋ́ nán, lə tìŋ kojo ɖóɖóməán, àvówú nə í nɔ́n àgbə sigbə í wɔ́ɖɛ̀á. Í ŋ́ búbə́ Mawu yə́ gbɔ́ngbɔ́nán lə́ jí nyə.