¹ Yi va vamɛ le yo ŋgbedomɛ be eyi vɛto eduwo kuɖo kɔxoewo mɛ, yi le Mawufɔɖuxoe yo nya toɔ yi amɛ amɛwoeve le egbɔ. ² Yi kuɖo nyɔnu ɖewo, amɛtsiwo mɛ woɖe gbɔgbɔn le kuɖo amɛtsiwo lamɛgblewo: Maria, tsi woyɔnɔ be Maria Magdalene, amɛtsi mɛ gbɔngbɔn andrɛ to le ³ kuɖo yohana, kuza, tsi nyi Herodi yo nyɔnudjikpɔtɔ srɔ, ku susana ku amɛbuwo tsan tsiwo sɔ wo kɛsinɔnuwo sɔva kpeɖeŋtsi. ⁴ Tsi amɛ gbogbowo va xotɛ, yi wo so ɖu ɖekpekpe mɛ vagbɔ lɔ, exo nuxo le lododo mɛ be: ⁵ "nukuwutɔ yi yo nuku wugbe: yi esti ele ewɔɔ lɔ, eɖewo gɛndje mɔto yi wosɔ afɔ gbidjiwo, yi djifoxeviwo va tsan wo ɖu. ⁶ Yi eɖewo gɛnɖo anyigban tsi dji ekpe lea dji, emiɔn yi eku, ɖo nutsiŋtsia ŋɖe kpɔ anyigban o. ⁷ Ebuwo gɛndje aŋdja mɛ, yi aŋdjawo kuntsɔnwo dji. ⁸ Yi ebuwo gɛndje anyigban adodoe dji, yi yimiɔ, esɛn kavetakpɔ, tsi yinu nyɔtsɛ vɔlɔ edo axoa be: amɛtsi si eto le lɔ, nɛse. ⁹ Yo nusrɔnviwo biɛ be elo tsi wodo yɛ gɔmɛ ɖe? ¹⁰ Eɖoŋtsi nɔwo be miɔwo lɔ wosɔ enuna mi be mia djesi Mawu yo iɔɖuxoɛ mɛ nyɔ xlaxlawo vɔ amɛbuwo lɔ, wola da élo nɔwo, benɛ etsi wole nusɛɔ lɔ, nɛ wo ŋgbe senu gɔmɛɔn. ¹¹ Lododo lɔ gɔmɛ yike: nuku lɔ yinyi Mawu nyɔ. ¹² Etsiwo le mɔododji yinyi: amɛtsiwo senɔ enyɔ lɔ yi legba va ɖenɔn enya djo, sɔ xenɔ emɔ nɔwo be wo ŋgbe siŋ yi woakpɔ xoxo. ¹³ Etsiwo le ekpedji lɔ, woenyi, amɛtsiwo nɛ wose enyɔ lɔ, xɔ nii kuɖo djidjɔ; ganke wo ŋde do ekeo, ɖo wo shinɔn yi zanɖe lɔ, wo gɛnɔn le tetekpɔ mɛ. ¹⁴ Tsiwo kɔɖo ŋdja mɛ lɔ, woenyi amɛtsiwo senɔ enyɔ, yi wo djonɔn, vɔ sɔkuɖo xixeyɛ mɛ tukaɖawo ŋtsi, kɛsinɔnuwo kuɖo xixeyɛ mɛ yo vivisesewo tsɔnɔn wo dji benɛ ekusɛnsɛn wotɔ ŋgbe siŋ o. ¹⁵ Etsiwo dje anyigban adodoea dji, wo nyi amɛtsiwo senɔn enyɔ kudo edji nyui ku edji kɔkɔɛ, yi dɔnɔn vevenu. ¹⁶ Amɛɖe ŋde tɔnɔ ezo yi sɔnɔ akla tsɔnii o, alo la sɔɛ sɔdaɖo abatsi gɔmɛɔn; vɔla esɔ danɔn ɖo enudji, benɛ amɛtsiwo laɖo axoea mɛ nɛkpɔ kɛnklɛŋ. ¹⁷ Ɖoŋtsi enu wlawla ɖekpe ŋde le tsinɛ wo ŋda djesio, alo enu le bebemɛ tsinɛ ŋdava ze le gotao. ¹⁸ Mikpɔ nyuiɖe le letsi mile enyɔlɔ seɔ; ɖoŋtsi wolasɔ enu enu na amɛtsi si enu le, vɔ amɛtsi si enu ŋde le o lɔ, wola xɔ enutsi yi xɔse be ele ŋesi. ¹⁹ Enɔlɔ kudo nɔviɛwo va benɛ yewo akpɔ Yesu; vɔ wo ŋde tɛn kpeŋ tsio sɔkuɖo amɛhalɔ ŋtsi. ²⁰ Wo nu nii be: ɛnɔwo kudo nɔviwo le xogodo yi wole djidjiɔ be yewoakpɔ wo. ²¹ Vɔ eɖeŋtsi be: amɛtsiwo le Mawunyɔ seɔ yile wawaɔ ɖo dji woenyi enɔnyɛ kudo nɔvinyɛwo. ²² Gbeɖeka lɔ Yesu kuɖo yo nusɛɔnviwo ɖo tɔdjihun ɖe mɛ. Enu nɔwo be: mina be mioayi ɖo gbaga godo, yi wodjo. ²³ Tsi tɔdjihun lɔ yiyiɔ lɔ, Yesu dɔ alɔn. Huzuhuzu ɖe xo le gbaga dji, yi tɔdjihun lɔ esi nunu, be wodja tsrɔn. ²⁴ Wote gogui yi nu nii be: tsitsa, tsitsa, mile tsrɔntsrɔn kɔ! tsi yifɔn lɔn, eɖegbe ɖo aya kuɖo shifiɔ lɔ dji, yi yinɔ anyi kpoo yi xɔn fa. ²⁵ Yi yinu nɔwo be: fiŋde mia xose ɖe? Djika sowo yi wo tsaka, le nunuɔ nɛ wo nɔnɔɛwo be: mɛŋde yinyi amɛtsɛ, tsinɛ ɖenɔ egbe nɛ aya kuɖo etɔ, yi woɖonɔn etoi? ²⁶ Wo vayi djeɖo Guerazeniatɔwo gbɔ tsi kpaŋkɔ Galilea. ²⁷ Tsinɛ Yesu ɖiva anyigban lɔ, nusuɖe tsi gbɔngbɔn vɔn wo gbagboɖe lemɛ lɔ va ŋkɔ nii. Edjidji tsinɛ ŋde donɔn awuo, yi ŋde nɔnɔn axomɛɔn, vɔ nɔnɔn bɛnigla mɛ. T ²⁸ si yikpɔ Yesu lɔ, edo axua, yi zrodje afɔnu nii, yi yido gbe sɛŋsɛŋ be: enyɔn ŋde le nyɛ kuɖowo domɛ, Yesu dipo Mawu vi? ŋde kuku nɔwo, ŋgbe wɔ funyafunya kuoŋ o. ²⁹ Ɖoŋtsi Yesu le egbe ɖeɔ nɛ gbɔngbɔn vɔnlɔ be nɛto le mɛ, ɖo eli bla etexoe djidji; wosɔnɔn kɔsɔkɔsɔ kudo gakpo donɔn afɔ nii, ganke eŋɛnɔn wo, yi gbɔngbɔn vɔnlɔ dɔnii sɔyi zogbewo mɛ. ³⁰ Yesu biɔɛ be: Axo ŋkɔ ɖe? enu be legio, ɖoŋtsi gbɔgbɔn vɔn gbogboɖewo yi ɖo mɛ. ³¹ Yi wo ɖekuku nɛ Yesu zeɖeka be ŋgbe ɖegbe nɛ yewo nɛ yewo nɛ yewo ayi ahlumɛ o. ³² . Eha gbogbo ɖewo le etoa dji tsinɛ le enu ɖuɔ. Yi gbɔngbɔn vɔnwo ɖekuku nii benɛ nya yewo nɛ yewoayi ɖo ehawo mɛ. Eɖe emɔn nɔwo. ³³ Gbɔngbɔn vɔnwo tole amɛ mɛ, yiɖo ehawo mɛ, yi ehanwo kpata ɖiɖi le etoa tamɛ vadje gbaga mɛ, yi wonu esi. ³⁴ Amɛtsiwo le ha nyiɔ wokpɔ enu tsi djɔ lɔ, sidjo yi kankan enya ɖo duamɛ kuɖo nutoawo mɛ. ³⁵ Amɔnwo yi benɛ yewoakpɔ enu tsi djo. Wo va Yesu gbɔ, yi wokpɔ nusu tsinɛ gbɔngbɔn vɔwo tolemɛ nɔ anyi ɖo Yesu yo afɔwo gbɔ, yi yile nyuiɖe; yi vɔvɔn ɖo wo. ³⁶ Amɛtsiwo kpɔ enua texoe to aletsi gbɔgbɔn vɔntɔa kpɔ katutu nɔwo. ³⁷ Guerazeniatɔwo kpata ɖe kuku nɛ Yesu benɛ djo le yo gbɔ, ɖoŋtsi djika sowo ŋtɔ. Yesu ɖo tɔdjihun lɔ mɛ yi yitrɔ. ³⁸ Nusu tsimɛ yi gbɔgbon vɔnwo tolea biɔɛ egbe be yanɔ gbɔ. Vɔ Yesu nyɛɛ yi nu nii be: ³⁹ Trɔyi axomɛ, yi nanu enutsiwo kpata Mawu wɔ nɔwo. Edjo yi edua mɛ, yi kankan enu tsinɛ Yesu wɔ nii ɖo edua kpata mɛ. ⁴⁰ Le yo trɔtrɔmɛ lɔ, amɔnwo xo Yesu, ɖo wole ete nɔɔ kpɔɛ. ⁴¹ Yi nusuɖe tsinɛ woyɔnɔ be Jayirus, tsinɛ nyi gbeɖoxɔ tsinɛ woyɔnɔ be Synagɔgui yo amɛgan. Edje eklo ɖo yo akɔmɛ yi ɖe kuku nii benɛ va yo xomɛ, ɖeka koŋgo. ⁴² Ɖoŋtsi eviɛ nyɔnuvi ɖeka koŋgo exoe woeve vi le djidjiɔ be ya ku. Tsinɛ Yesu tuta lɔ, amɔwo bɔbɔ duiɔ yile tututuɔ. ⁴³ Ganke nyɔnu de tsi ehun nɔnɔ kɔkɔɔ le ŋtsi exoe woeve sɔŋ, yi yigble yo kɛsinɔnuwo domɛ le ɖɔkitawo gbɔ, tsi ŋde kpɔ edɔ ɖaɖa va. ⁴⁴ Ete gogo Yesu to ŋgbodomɛ, yi yitalɔ Yesu yo awu. Zeɖeka lɔ ehun djadja nɔte. ⁴⁵ Yi Yesu nu be: Mɛŋde tɔ alɔŋ? Tsinɛ amɛsiamɛ le gbegbeɔ lɔ, Piyɛ kudo ametsiwo le gbɔ nu be: Tsitsa, amɔnwo trɔɖowo, le zinzinkɔ yi wole biɔbiɔ be mɛŋde tɔ alɔŋ? ⁴⁶ Vɔ Yesu ɖoŋtsi be: Amɛɖe tɔ alɔŋ, ɖoŋtsi ŋse le mɛnyɛ be ŋsɛn ɖe to le ŋtsinyɛ. ⁴⁷ Tsi nyɔnua kpɔbe wole ye vɔlɔ, eva dje eklo ɖo Yesu yo kɔmɛ yile xoxooɔ tititi, yi yinu nɛ dukɔnlɔ kpata enutsi ŋtsi yitɔ alɔɛ ɖo, yi letsi yikpɔ dɔdada ɖo zeɖeka. ⁴⁸ Yesu nu nii be: Evinyɛ, axo xɔse ɖewo; djoyi axomɛ le ŋtsifafa mɛ. ⁴⁹ Tsinɛ yikpɔtɔ le nuxo xoɔ lɔ, amɛɖe vaso gbedoxɔ tsinɛ woyɔnɔ be Sinaguɔgui yo xoetɔ gbɔ to be: Evio ku, ŋgbe ɖefun nɛ tsitsaɔ. ⁵⁰ Vɔ tsi Yesu se enyɔ xɔn lɔ, enu nɛ amɛganlɔ be: ŋgbe vɔn, xose nɛnɔ asiwo kpo, yi eviwo la kpɔ gangan. ⁵¹ Tsinɛ woɖo axoeɛ mɛ lɔ, ŋde ɖemɔn nɛ amɛɖekpe benɛ, ɖo exɔa mɛ, nɛ ŋde nyi Piyɛ, Ejan kudo Jaki, ku ɖeniɛ yo tɔ kudo enɔlɔ. ⁵² Amɔwo kpata le avidji, yile koenyi fankɔ ɖo ɖeviɛ dji. Yi Yesu nu be: miŋgbe fan avi o; ŋde ku o, vɔ ele alɔn dɔnkɔ. ⁵³ Yi wole Yesu koɔ, ɖo wonya be nyɔnuviɛ ku. ⁵⁴ Vɔ ele alɔ nii, yi do axua sɛŋsɛŋɖe be: ɖevi, tsite. ⁵⁵ Yi yo gbɔngbɔn trɔgbɔva emɛ, yi zeɖeka lɔ, etsite; yi Yesu to nɔwo be wo nɛ na nuɖuɖui. ⁵⁶ Ekpatsa ɖeviɛ yo djilawo, yi yido ese nɔwo be wo ŋgbe nu enutsi djɔ nɛ amɛ ɖekpe o.