¹ Yesu kɔ ŋmɛn yidji, yi kpɔ nunɔn amɛnshitɔwo sɔ wo nunana nɔn dadawɔ dɔ ega yio dakaviɛ lɔ mɛn. ² Ekpɔ ahosi wamennɔn detsan tsi sɔ, ega tsi wodunɔn vitsukui amɛnve sɔ va domɛn. ³ Yesu to be: ŋle totoɔ nɔn mi le nyɔn texue mɛn be ahosi womɛn nɔn yɛ na nu wu amɛn shiamɛn. ⁴ Ŋoŋtsiŋtsia amɛnbuwo sɔ numadota na, nu gbɔgbo tsi le woshi lɔ ede kpɔ yio va na. Eyɛ sɔ nutsiwo kpata ŋtsiyile agbe dɔ lɔ va na. ⁵ Amɛndewo nɔn asɛnŋ kanwɔ sɔkudo letsi yi wo doatsan nɔn mawu yio xɔ lɔ kudo ekpe xɔashi kudo nu nana nyuiɛ lɔ woŋtsi, ⁶ Yesu tɔ be:< nuyɛwo kpɔ wɔa? ŋkeke le gbɔnnɔn tsi dji wola kankanwo kéŋkéŋ, ekpedodo dekpekpi ŋdatsi ebudji le fiɛ o.>> ⁷ Wobiɔbe:Nukplantɔ, Gaŋdemɛm nuyɛ ladjɔ?ŋde la nyi dje si be egogo? ⁸ Yesu do ŋti be:<< Mikpɔ nyuide be woŋ gbe kplomi sɔ yio o. Amɛn gbɔgbɔ dewo la sɔ nyikɔ tsinyɛn do nu ava nɔn totoɔ be: Enyɛ a. Alo wolatɔbe: Gamɛna sun vɔ. Miŋ gbé kplɔ wodo. ⁹ Nɔn mise awawɔwɔ kudo zikiti yio gbé lɔ, miŋgbé Vɔn doŋtsiŋtsi edjé be enuyɛ wo la djɔ egbɛ, ganke eyɛwo ŋdefiɔnbe enuwuwu lɔ va do.>> ¹⁰ Fifie eyi dodji to be: Eduɔ lɔ lawa ahua kudo wo nɔn nuiwo, yi fiɔduxuéwo lashite do wonɔn nuiwoztsi. ¹¹ Anyi gban lahunhun vɔnvɔn ta le texuéwo, adɔ la to yi edɔ bada lava texoetexoe wo. Vɔnvɔn donuwo kudo ŋdanŋdonu ganganwo la to so djipo. ¹² Ganke do nyikɔ nɔn enuyɛwo keŋkeŋ, alɔ la su mia dji, wo la tsi yomɛn nɔn nɔn mi wo la kpɔmi yi gbedodaxue be wado kodjo nɔn mi, watsu mi do gakpamɛn. Wo ladɔn mi sɔ yi efiɔ wo kudo dumɛn gawo gbɔ do tanyɛn. ¹³ Eyɛ lanami mɔnu kpɔkpɔ be miandi dase. ¹⁴ Milé do tamɛn be: ŋde hian be mia bu tamɛn kudo ŋtsi yi gbɔnnɔn lɔ ŋtsi doŋkɔ o. ¹⁵ Ɗoŋtsiŋtsia nyɛ ŋtɔ nana mi nunya kudo ade, kususu be nɔn mixonuxo lɔ, nyɔn tsi wo yi latoso nu mɛn nɔn mi lɔ la na be amǝn dekpǝkpi ŋdatɛnz tɔ te do mian ŋtsio, alo ashite do mianŋtsi o. ¹⁶ Mia djilawo kudo mian nɔnviwo, xomɛntɔ tɔwo wo kudo mian xɔlɔnwo ŋtotsan ladomi asi, yi wo la wu miandomɛntɔ dewo. ¹⁷ Amɔwo kpata la le ké mi do tanyɛ. ¹⁸ Ganké miɔ da kuideka ŋda suŋ o. ¹⁹ Nɔn mido dji sɛnde lɔ mi la tsi agbe. ²⁰ Nɔn amɔwo tole Yerusalem lɔ, kexɔn a mian nyan yio gbangban gamɛn gogo. ²¹ Mina amɛntsiwo yi le Yudea lɔ wasi ayi etɔ wo dji, amɛntsiwo yi le eduɔ dada mɛnlɔ wa to adjo, yi miŋ gbena nɔn mɛntsiwo yi le wogbe mɛnwo lɔ wato dje mɛn o. ²² Ɗoŋtsiŋtsia hlɔnbiɔbiɔ yio gamɛn sun be wakpa nutsiwo kpata wo ŋlɔn dade lɔ. ²³ Baba nɔn efunɔnwo kudo amɛntsiwo yi denɔn nɔn woviwo le gaxoxo xɔnmɛn! Fukpekpe sɛnŋde lava anyigbandji,yi eto dɔndɔn dovɔnvɔn la va du yɛ dji. ²⁴ Amɛn dewo ŋde nyi Yudatɔwo lɔ latsu afɔ Yerusalem dji va dashi nɔn gatsimɛn wogamɛn la sun. ²⁵ Djesi la to so we, wetri kudo wetriviwo mɛn. Le anyigban dji, eduɔ mɛntɔ wo la vɔn, atsaka, yi wolatsi djodjo djoe le axu yio gbe dede kudo yio dan wawa ta. ²⁶ Djipo yio nusɛn la hunhun. Amɔ wo lavɔn yi wo la danta nɔn yi wola kuxueyi le nutsiwo gbɔnnɔn djɔdjɔ gbé le xixɛamɛn ŋtsi. ²⁷ Wokpɔ amɛngbetɔ viɛ lɔ yi le lilikpoɔmɛn gbɔn nɔn kudo nusɛn kudo ŋtsikɔkɔɛ gan. ²⁸ Nɔn enuyɛ wo le djɔdjɔ ɔlɔ, ke xɔna mishite ne mian hɔtayidji, doŋtsia miɔ xɔxɔ gamɛn gogo. ²⁹ Yesu do lo yɛ nɔn wo be: Mikpɔ asisrɔɛti (figueti) kudo atibu wo kpata da. ³⁰ Nɔn wole makpa towɔkpɔlɔ, mian ŋtowo miankpɔɛ be kudidi gamɛn gogo. ³¹ Nɛn nɛn ke nɔn mianwo tsan, nɔn mikpɔ enuyɛ wo yi wole emɛn vaɔlɔ mian nyabe Mawu yio fiɔ duduɔlɔ gogo. ³² Ŋle totoɔ nɔn mile nyɔn texué mɛn be djidji mɛn yɛ wo ŋtsi ŋle yiyiɔdo keŋ gbɔxué nɔn enuyɛ wo ŋgbe va mɛn o. ³³ Djipo kudo anyigban nu la va yi, ganke nyɔn nyui tsinyɛn nu ŋda va yi gbe deo. ³⁴ Mikpɔ miadeki dji nyuide nɔn nusu dúdu, ahamumu kudo djitsitsi, nɔn agbe yɛ mɛn yio nu gan djidji ŋgbeva xɔ miɔ susumɛn o. Kususu be kodjodogbé ŋgbeva gogomi o. ³⁵ Doŋtsiŋtsia eladjé mɛntsiwo kpata nɔn anyigban bliboɔlɔ yio ŋmɛndji. ³⁶ Yiŋtsilɔ minɔn ŋzɔn nɔn miandogbeda yi mian kpɔ nusɛn ato le nutsiwo kpata gbɔnnɔn djɔdjɔ gbe lɔ mɛn, yi mian va to do amɛngbetɔ viɛ lɔ yio ŋmɛn. ³⁷ Le ŋkekéɛmɛn lɔ, Yesu fianu le Mawu yio xo lɔ mɛn, yi le wetrɔmɛn lɔ edjo nɔn avɛdɔn amitɔlɔ dji. ³⁸ Ŋdekan nyɛn mɛn lɔ duɔmɛntɔwo kpata bɔ nɔn va gbɔ le Mawu yio xɔmɛn be yewoa sé yio nyɔn.