¹ U Judi,uwambombo wa Yesu kilisitu sona uwambombo wa Yakobo, kubala bitishiwe,baghaniwa mwa Chala u tata, sona basungiwa ba Yesu kilisitu : ² Leka i chisa sona nulutenganio sona nulughano lubale kukwinyu umwe ³ Baghaniwa, bwo ingupanga mumaka ghoshi ukubasimbila umwe isha ubupoki bwa weshi, ingubasimbila umwe ukubakwesha umwe ukulwisha ingani isha lwitiko lwo lukapeghiwa kamukene kuboshi a bandu a ba Chala. ⁴ Papo abandu bamu batyelemukite mubushifu pakati papinyu. Aba bandu bo bakamanyikwa pakulongiwa. Bandu bashita ukuba nu chala babo bandwile i chisa icha Chala ukuyamunyinog'ono, sona bobo bakukana U songo witu yuyo sona nu Malafyale , u Yesu kilisitu. ⁵ Apa ingulonda imbakumbushe umwe_pobule mukashimanya kamukene_ukuti Umalafyale akapoka a bandu ukufuma mucisu cha Ejiputi, lole bwo pendapo panyuma akabasambukisa bala bo batakasubila. ⁶ Sona,nabandumi bo batakasunga amalo ghabo agha bulamulilo, lole bo bakaleka ghabo ghakwikalapo _ Uchala abasungite mumbingu shabwila nabwila, muchisi pakwisa papulongiwa pishiku ikulu ingani. ⁷ Po sona Usodomu nu Gomora nutwaya to tushungulire nabo bakipa pabene ku sha bwomalaya sona nimbombo sha bwo malaya inyali. Bakubomba ingati fifwanikisho fya bala bo bakutamiwa nubolongi ubwa moto wa bwilanabwila. ⁸ Pobule musila yimuyene, aba filota bope bakunyesha imibili yabo. Bakukana ubulaghili, sona bakuyuga fikulu ifibibi fya mukulu yumuywene. ⁹ Lole nu Mikayeli uwandumi usongo, bwo akulwana numubibi sona nukumupwatila isha mubili wa Mose, atakamupasha pakumupa ubulongi ukususania nawe. Mubuyo bwake akati, ''Leka Umalafyale akukalipe uwe!'' ¹⁰ Lole abanduaba bakukana fyo batakufipulikisha; sona bakulikisha fyosho mwo fikapeleliwa, ingati finyamana fyo fitakwinong'ona, ifi fyofyo findu fyo fikubakomania babo . ¹¹ Mukoshi kubabo! papo bakwenda musila iya Kayini sona bingila mu bubibi bwa Balamu ukuti bapindule. Banangika mukushita kupulikila kokaba mwa korasi. ¹² Abandu bo babibi mu fyakusekelela ifyalughano, kusekelera numwe pamupene ukukosha isoni_abaputi bobakwilisha bene. Aba bobo mabingu ghakushita ifula ghakunyamuliwa nimbepo; balingati makokwe gha pachisanya, ashita ifiseke_bafwilekabili, nukunyukuliwa. ¹³ Bomayigha ghoghanyamukite panyanja bobakufumya umutotofulu uwa kukosha isoni; indondwa shoshikwendakwenda, papo kukuwa ubutitu bwa chisi chakukwanila busenguliwe kukwabo bwilanabwila. ¹⁴ U Enoki uwa uwanambala 7 ukufuma kwa Adamu, akakunguluka isha babo, ukuyugha ukuti, ''Tesha! Umalafyale akwisa pamupene namasawuzandi namasawuzandi ghabikemu bene. ¹⁵ Akwisa nulufundo kuweshi yula. Akwisa pakuwasusha boshi abashita uchala mumbombo shoshi shobabomba musila yabushita uchala, sona namashu amakali ghoshi agha bashita uchala abatulanongwa bayugha ifya kususania naweyuyo.'' ¹⁶ Aba bandu bakwing'ung'usha, bakwilumbusha, ukukongana nifinyenywa ifibibi fyabo. Imilomu yabo yikugha ngani umwakwitufya, sona panongwa yapindu wabo, bakubakomania nabangi. ¹⁷ Lore baghaniwa, mukumbuke amashu ghoghakayughiwa kunyuma nabafundiwa bamalafyale witu Yesu kilisitu. ¹⁸ Bakayugha kukwinyu umwe, ''mutubaliro twabumalilo kukwisa ukuba abakoyela bobakwisa ukukongagha ifinyenywa ifya bushita chala wabo.'' ¹⁹ Aba bandu bobakupangisha ukupatungana pa chisu sona batanumbepo. ²⁰ Lole umwe baghaniwa, mwisenge pamwibene palwitiko lwa bikemu winyu sona mwiputaghe mwa mbepo mwikemu. ²¹ Mwisunge mwibene mulughano lwa Chala, sona mulindilile pa chisa cha malafyale witu Yesu kilisitu yuyo akutupa utwe ubwumi bwabwilanabwila. ²² Mube bachisa kubala bobakukayikila. ²³ Mupoke abangi pakubanyamula ukufuma pamulilo. Kubangi mube bachisa nubwogha .Mubenge nimyenda yabo yoyinyalite panongwa ya mubili. ²⁴ Apa kuyuyo abaghile ukuponesha umwe pakwipunula sona ukupangisha umwe ukwimilila pamaso ghabukulu bwake ukushita akalema sona nulusekelo ulukulu, ²⁵ kwa Chala yumuywene umupoki witu ukwendela mwa Yesu kilisitu umalafyale witu, ubushishi, ubukulu, amaka, sona nubulaghili, mutubalilo twoshi, apa, sona bwilanabwila.Ameni.