¹ Ukalata uyu akafuma kukwangu une ne songo uwa chipanga. Ingukusimbila ukalata uyu uwe we mukolo yuyo uChala akusalite pamupene na bana bako babo imbaghanite naloli. Indabaghinite nimweneshe, lole na bala boshi babo bumenye ubwanaloli bope babaghanite umwe naloli. ² Tubaghanite umwe ku nongwa iya kuti une pamupene nu mwe tubumenye ubwanloli ubwo indibubange mu ndumbula shitu bwila nabwila. ³ Tukusuma ukuti nu lutenganio ukufuma kwa Tata uChala na kwa Yesu Kilisitu uMwana wake fibange pamupene nutwe ku nongwa iya kuti tubumenye ubwanaloli nu kuti batughanite. ⁴ Ingahoboka leka bwo ingupulika ukuti abana bamu mu bana bako bakubukonga ubwanaloli isa mumwo uChala akatulaghila. ⁵ We mukolo umughaniwa, ingukusuma ukongaghe ululaghilo lulwo lukuti tughananaghe twebenebene. Indakukuksimbila ululaghilo ulupya, lole lula lulwo tukaba nalwo ukufuma kubwandilo bwo twamwitika uKilisitu. ⁶ Ku sila iya kughanana twebenebene, tukulangisha ukti tukushikonga indaghilo isha Chala. Papo ukufuma kubwandilo uChala akatulaghila ukuti tughananaghe twebenebene. ⁷ Abamanyishi aba bumyashi abingi bisile mu chisu. Abamanyishi abo bakubashimbula abandu ukuti bwo uYesu kilisitu isa pa chisu ichi, atakaba nu mubili ungati mundu. Umundu yuyo akuyugha ulwo, mumyashi sona mulughu uwa Kilisitu. ⁸ Ku nongwa iyo, mubange maso na bamyashi abo ukuti manye babashimbulaghe nu kuti imbombo yinyu manye yibe ya pabubu. Papo linga babashimbula, mutakambilile umufwalo ghugho ghubaghile ukufuma kwa Chala. ⁹ Umundu weshi yuyo atakufyitika ifimanyisho fya Kilisitu sona atakwendelela ukufikonga ifimanyisho ifyo, umundu uyo atali pamupene nu Chala. Lole umundu weshi yuyo akwendelela ukufyitika ifimanyisho fya Kilisitu, ali pamupene nu Tata uChala nu Mwana wake. ¹⁰ Linga umundu yuyo akwisa kukwinyu nu kumanyisha ifimanyisho fifyo fili pashima ni fya Kilisitu, manye mumumwambililaghe mu nyumba shinyu, sons manye mumulamukaghe ungati mwitiki munyinyu. ¹¹ Papo umwitiki yoyo akumwambilila nu kumulamuka umundu uyo ungati mwitiki umunine, umwitiki uyo akwafwana pamupene nu munduuyo ukubomba imbibi shake. ¹² Indi nasho inyingi isha kubasimbila, lole indakulonda ukushisimba mwa kalata uyu. Inguyugha ulwo ku nongwa iya kuti ingusubalile ukwisa kukwinyu ukuti tukomane nu kuyughisania pamupene. Ku sila iyo inditukahoboke leka. ¹³ Abana aba muyemba wako yuyo uChala amusalite bakukulamuka.