¹ و كي قربوا لاورشليم في جيهة بيت فاجي و بيت عنيا , بحذى جبل الزيتون , بعث زوز من التلامذة تاعو, ² و قال لهم :"روحوا للقرية اللي مقابلتكم و في الوقت اللي انتوما داخلين تلقاو جحش مربوط مازال ما ركب عليه حتى واحد من الناس. حلوا الرباط تاعو و جيبوه ليا. ³ و كان كاش واحد قال لكم علاه والا واش راكم تديروا ؟ قولوا لو: الرب محتاج ليه . في ساعتو يبعثوا لهنا". ⁴ راحو كيما قال لهم و لقاو الجحش مربوط عند الباب واقف في نص الطريق , حلوه. ⁵ و كاين ناس من اللي موجودين لثم قالوا لهم :"واش تعملوا علاش راكم تحلوا في الرباط تاع الجحش ؟". ⁶ و كي جاوبوهم كيما وصاهم يسوع . خلاوهم. ⁷ جابوا الجحش ليسوع , و حطوا عليه قشهم باه يركب . ⁸ و كاين ياسر من الناس اللي فرشوا قشهم في نص الطريق , و وحايد اخرين قصوا اعراف من الشِّجر و فرشوها في الطريق , ⁹ و الناس اللي كانوا قدامو و وراه كانوا يعيطوا و يقولوا :" اوصنا! يتبارك اللي جاي باسم الرب ! ¹⁰ تتبارك المملكة تاع بابانا داود باسم الرب! اوصانا في لعلالي!". يسوع يدعي على الشجرة تاع الكرطوس ¹¹ و دخل يسوع لاورشليم و للهيكل, و بعد ما شاف كل شيء كانت عشات لعشية , خرج من لثم و راح لبيت عنيا هو و التلامذة ف الثناش . ¹² و ليوم وغدوة كي خرجوا من بيت عنيا جاع , ¹³ و شاف شجرة تاع كرطوس من بعيد معبية بالورق , وجاء كاش ما يلقى فيها حاجة , و كي وصل ما لقى غير لورق , على خاطر مازال ماهوش وقت كرطوس. ¹⁴ تكلم يسوع و قال لها :"من اليوم ما يزيد حتى واحد ياكل من الفاكية تاعك!". و كانوا التلامذة يسمعوا فيه . تطهير الهيكل ¹⁵ و جاو لاورشليم . و كي دخل يسوع للهيكل بدا يخرج في هاذوك اللي كانوا يبيعوا و يشريو لثم , و قلب لمْيِد تاع الصرافة و لكراسي تاع اللي يبيعوا في لحمام . ¹⁶ و ما خلى حتى واحد يدخل بالسلعة للهيكل . ¹⁷ و كان يعلم و يقول:" ياخي مكتوب : بيتي يتسمى بيت صلاة للشعوب الكل ؟ و انتوما قلبتوه غار تاع سراقين ". ¹⁸ و كي سمعوا بيه الكتبة و الرياس تاع الكهنة بداو يخمموا كيفاه يقتلوه , على خاطر خافوا من الناس اللي حاروا في التعليم تاعو . ¹⁹ و كي عشات لعشية خرج من لمدينة . شجرة الكرطوس اليابسة ²⁰ و في الصباح كي كانوا معديين شافوا الشجرة تاع الكرطوس يبست باها بعروقها , ²¹ تفكر بطرس و قالو:" يا سيدي , شوف ! الشجرة اللي دعيت عليها يبست !". ²² جاوب يسوع و قال لهم :" خلي عندكم ايمان بالله . ²³ على خاطر نقول لكم الحق : لو كان واحد يقول لهاذا الجبل : اتهز و ارم روحك في لبحر! و ما يكونش عندو شك في قلبو بالصح يآمن بلي الشيء اللي يقولو يصرى , مهما واش يقول يكون ليه . ²⁴ علاها نقول لكم : كل واش تطلبوا كي تكونوا تصليو, كي تامنوا بلي راح تنالوه , يكون لكم . ²⁵ و في الوقت اللي توقفوا باه تصليو , اغفروا اذا كان كاش واحد دار لكم حاجة , باه يغفر ليكم ثاني باباكم اللي في السماوات ذنوبكم . ²⁶ و اذا كان انتوما ما تغفروش حتى باباكم اللي في السماوات ما يغفرش ليكم ذنوبكم". الشيوخة يسقسيو يسوع على السلطان تاعو ²⁷ و زادوا جاو ثاني لاورشليم , و كي كان يسوع يمشي في الهيكل , جاو ليه الرياس تاع الكهنة و معاهم الكتبة و الشيوخة , ²⁸ و قالوا لو :" بواش من سلطان راك تعمل في هاذا الشيء؟ و شكون مدلك الحق باه تدير هكذا؟ ". ²⁹ جاوبهم يسوع و قال لهم :" و حتى انا نسقسيكم حاجة واحدة برك . كي تجاوبوني , نقول لكم انا بواش من سلطان راني نعمل هكذا ³⁰ قولولي المعمودية تاع يوحنا : كانت من عند الله و الا من عند الناس ؟ ". ³¹ و كي خمموا مع ارواحهم قالوا :" كان قلنا : من عند الله , يقول لنا : علاش مالا ما تامنوش بيه؟ ³² و كان قلنا : من عند الناس ". يوليو يخافوا من الشعب . على خاطر كان يوحنا عند الناس الكل نبي تاع الصح . ³³ ولاو جاوبوا يسوع و قالوا لو :"ما نعرفوش ". قال لهم يسوع :" حتى انا ما نقولش بواش من سلطان ندير واش راني ندير ".