¹ البدية تاع انجيل يسوع المسيح ابن الله , ² كيما مكتوب في الكتب تاع لنبياء :" انا راح نبعث قدامك الرسول تاعي , اللي يوجد لك طريقك قدامك. ³ صوت ينادي في الصحراء و يقول :" وجدوا طريق ربي , و اجعلوا مساربو مقدودة ". ⁴ كان يوحنا يعمد في الصحراء و يبشر للناس بالمعمودية تاع التوبة لغفران الذنوب . ⁵ و جاو ليه من الجوايه الكل تاع اليهودية و القدس و تعمدوا كلهم على يديه في واد الاردن , مستعرفين بذنوبهم . ⁶ و كان يوحنا يلبس وبر الجمال و متحزم بحزام تاع جلد على جنابو و ياكل في الجراد و لعسل البري . ⁷ و كان يبشر و يقول :" يجي بعدي اللي هو اقوى مني , اللي انا ما نستاهلش تنابس و نحل السيور تاع صباطو . ⁸ انا عمدتكم بالماء , اما هو راح يعمدكم بالروح القدس" . المعمودية تاع يسوع المسيح و التجريبة تاعو ⁹ و في هاذيك ليام جا يسوع من الناصرة للجليل و تعمد على يد يوحنا المعمدان في الاردن . ¹⁰ و في الوقت اللي كان طالع فيه من الماء , شاف السماوات تشقت ’ و الروح هابط عليه كي لحمامة . ¹¹ و كان صوت من السماوات بقول:" انت وليدي لحبيب اللي بيه فرحت". ¹² وفي هاذاك الوقت بالذات اداه الروح للصحراء , ¹³ و كان لثمة في الصحراء مدة اربعين يوم يتجرب من ابليس . و كان في وسط الوحوش . و جات الملايكة تخدم فيه . المسيح ينادي التلامذة لولين ¹⁴ و بعد ما تقبض على يوحنا جاء يسوع للجليل و بدا يبشر بالبشارة تاع ملكوت الله ¹⁵ و يقول :"الزمان كمل و ملكوت الله قرب , غير توبوا و امنوا بالانجيل ". ¹⁶ و كي كان يمشي على شط لبحر في الجليل شاف سمعان وخوه اندراوس يرميو في الشبكة في لبحر ’ على خاطر كانوا صيادة. ¹⁷ قال ليهم يسوع :" ارواحوا تبعوني و انا نجعلكم صيادين للناس " ¹⁸ و في هاذاك الوقت بالذات خلاو الشبكة و تبعوه. ¹⁹ و من بعد غير فات من لثمة شوية زاد شاف يعقوب بن زبدي و خوه يوحنا , في الفلوكة يخيطوا في الشبكة تاعهم . ²⁰ عيطلهم و في هاذاك الوقت بالذات خلاو باباهم زبدي في الفلوكة مع الخدامة و مشاو وراه. الخروح تاع روح منجوس ²¹ و بعدها دخلوا كفرناحوم , و في هاذاك الوقت بالذات دخل للمجمع نهار السبت و بدا يقري. ²² و حاروا في التعليم تاعو على خاطر كان يقري فيهم كيما اللي عندو سلطان و مش كيما الكتبة . ²³ و كان في هاذاك المجمع راجل ساكنو روح منجوس , بدا يعيط ²⁴ و يقول :" آو! واش كاين بيننا و بينك آ يسوع الناصري ؟ راك جاي باه تهلكنا ؟ انا نعرفك شكون انت : القدوس تاع الله !" ²⁵ نهرو يسوع و قالو :" اسكت! و اخرج منو!". ²⁶ الروح المنجوس صرعو و غيط بصوت عالي و خرج منو . ²⁷ الناس الكل حاروا و بداو يسقسيو في بعضاهم :" وش هذا ؟ وش هو هذا التعليم الجديد؟ على خاطر بسلطان يامر حتى على الارواح المنجوسة و تطيعو !". ²⁸ و في هاذاك الوقت بالذات تنشر الخبر تاعو في كل الجوايه الدايرة بالجليل. نسيبة بطرس ترتاح هي و وحايد اخرين ²⁹ و في هاذاك الوقت بالذات كي خرجوا من المجمع راحوا لدار بطرس و اندراوس مع يعقوب و يوحنا, ³⁰ و كانت نسيبة سمعان عندها السخانة و حاكمة لفراش, حكاولو عليها و في هاذاك الوقث بالذات . ³¹ قرب ليها و حكمها من يدها و وقفها, ثم ثم راحت عليها السخانة و بدات تخدم فيهم . ³² و كي عشات لعشية , و غربت الشمس, جابوا ليه كل الناس المرضى و اللي مسكونين , ³³ و كانت المدينة كلها عند الباب . ³⁴ و رتح ياسر اللي كانوا عندهم مروضات , و خرَّج شواطن ياسر , وما خلاش الشواطن تتكلم على خاطر عرفوه. التبشير في الجليل ³⁵ و ناض في الصباح بكري خلاص و خرج و راح لواحد المضرب خالي و كان لثم يصلي وحدو, ³⁶ وراح سمعان والناس الي كانوا معاه يتبعوا فيه . ³⁷ و كي لقاوه قالوا لو :" آم الناس الكل يحوسوا عليك ". ³⁸ وقال لهم :" هيا نروحوا للدشر لقريبة من هنا . باه نبشرهم هما ثاني على خاطر هاذي السبة اللي خرجت على جالها " . ³⁹ و كان يبشر في المجامع في الجليل كلها و يخرج الشواطن . واحد ابرص يرتاح ⁴⁰ و جا ليه واحد ابرص و ركع قدامو و قال لو :" كان حبيت تقدر تجعلني طاهر". ⁴¹ حن عليه يسوع و مد يدو و مسو وقالو :" نعم نحب , كون طاهر!" ⁴² و في هاذاك الوقت بالذات و هو مازال يهدر راح عليه لبرص و نظاف . ⁴³ و وصاه و بعثوا في هاذاك الوقت بالذات , ⁴⁴ و قالو :" شوف , ما تقول لحتى واحد , بالصح روح وري روحك للكاهن و قدم الشيء اللي وصى بيه موسى , باه تشهد عليهم ". ⁴⁵ اما هو راح و بدا يهدر على طول صوتو وينشر في لخبر, حتى ولى يسوع ما يقدرش يدخل حتى مدينة وهو باين , وولى يقعد بعيد في الاماكن الخالية , و كانوا الناس يجيو ليه من كل جيهة.