¹ كتاب لولادة تاع يسوع المسيح بن داود بن براهيم: ² ابراهيم جاب اسحاق. و اسحاق جاب يعقوب. و يعقوب جاب يهوذا و خاوتو. ³ و يهوذا جاب فارص و زارح من ثامار. و فارص جاب حصرون. و حصرون جاب آرام. ⁴ و ارام جاب عميناداب. و عميناداب جاب نحشون. و نحشون جاب سلمون. ⁵ و سلمون جاب بوعز من راحاب. و بوعز جاب عوبيد من راعوث. و عوبيد جاب يسى. ⁶ و يسى جاب داود الملك. و داود الملك جاب سليمان من لمرى اللي كانت زوجة اوريا. ⁷ و سليمان جاب رحبعام. و رحبعام جاب ابيا. و ابيا جاب آسا. ⁸ و آسا جاب يهوشافاط. و يهوشافاط جاب يورام. و يورام جاب عزيا. ⁹ و عزيا جاب يوثام. و يوثام جاب آحاز. وآحاز جاب حزقيّا. ¹⁰ و حزقيّا جاب منسّى. و منسّى جاب آمون. و آمون جاب يوشيا. ¹¹ و يوشيا جاب يكنيا و خاوتو وقت اللي داوهم للسبي لبابل. ¹² و من ورى السبي تاع بابل جاب شألتيئيل. و شألتيئيل جاب زربابل. ¹³ و زربابل جاب ابيهود. و ابيهود جاب ألياقيم. و ألياقيم جاب عازور. ¹⁴ و عازور جاب صادوق. و صادوق جاب أخيم. و أخيم جاب أليود. ¹⁵ و أليود جاب أليعازر. و أليعازر جاب متّان. و متّان جاب يعقوب. ¹⁶ و يعقوب جاب يوسف اللي تزوج بمريم التي تولد منها يسوع اللي يسموه المسيح. ¹⁷ مجموع لجيال من براهيم لداود ربعطاش ن جيل, و من داود حتى لزمان السبي ربعطاش ن جيل, و من زمان السبي حتى للمسيح ربعطاش ن جيل. ولادة يسوع المسيح ¹⁸ اما لولادة تاع يسوع المسيح كانت هكا: في الوقت اللي كانت مريم امو مخطوبة ليوسف, و قبل ما يجيبها لدارو حبلت من الروح القدس. ¹⁹ و كان يوسف راجلها يخاف ربي, ما حبش يفضحها, و نوى يخليها في السر. ²⁰ و كي كان يخمم في هاذي الامور, ظهر ليه الملاك تاع ربي في لمنام و قالو: "يا يوسف بن داود, ما تخافش تاخذ مريم مرتك. على خاطر اللي في كرشها هو من الروح القدس. ²¹ راح تجيب طفل و تسميه يسوع. على خاطر هو اللي ينجي شعبو من الذنوب تاعهم". ²² و هاذا الكل صرى باه يتم الشيء اللي تقال من عند ربي بالنبي اللي قال: ²³ "هاي العذراء تهز بالكرش و تجيب طفل, و يسموه عمانوئيل" اللي معناتو: الله معانا. ²⁴ و كي ناض يوسف من النوم عمل كيما طلب منو الملاك تاع ربي, و جاب مرتو لدارو. ²⁵ و ما مسهاش حتى ن ولدت و جابت وليدها البدري. و سماه يسوع.