¹ اما ليمان هو الثقة في الشيء اللي نستناو فيه و نصدقوا امور ما تتشافش. ² وبيه هو اللي شهد الله لناس زمان. ³ بالايمان نعرفوا باللي ربي خلق الدنيا بكلمة من عندو, و خرج لنا حوايج نشوفوها من حوايج ما نشوفوهاش. ⁴ بالايمان ذبح هابيل ذبيحة لله خير من ذبيحة قايين. و بالايمان شهد عليه ربي باللي راه بار من لبرار, و رضى عليه. و حتى لو كان مات مازال ليمان تاعو يهدر! ⁵ بالايمان رفع الله اخنوخ بلا ما يموت, و واحد ما زاد شافو على خاطر ربي رفعو عندو. وشهد عليه لكتاب باللي قبل ما يرفعو الله عندو كان راضي عليه. ⁶ على خاطر بلا ايمان ما نقدروش نرضيو الله, اللي يجي عند الله لازم قبل يامن باللي راه موجود, و باللي يكافي الناس اللي يطلبوه. ⁷ بالايمان نوح نهار اللي وحى ليه الله على امور راح تصرى خاف, و بنى فلوكة باه يمنع عايلتو, و جاء لهلاك للعالم الكل, اما هو ورث البر اللي كان الثمرة تاع الايمان. ⁸ بالايمان ابراهيم نهار اللي دعاه الله باه يخرج من ارضو اللي كان راح يورثها, خرج و هو ما علابالوش وين يروح. ⁹ و تغرب في لرض للي وعدو بيها الله تقول عليه في الغربة, و سكن في القيطون مع اسحاق و يعقوب الشركاء تاعو في العاهد تاع الله بالذات. ¹⁰ على خاطر كان يرجى في مدينة مبنية على الساس اللي ربي هو صانعها و بانيها. ¹¹ و بالايمان حتى سارة, وهي العاقرة و زاد فاتها لعمر, جعلها تهز بالكرش و تولد, على خاطر عرفت باللي هاذاك اللي وعد صادق. ¹² و جابت من واحد قرب يموت, ذرية قد نجوم السماء, و قد الرمل اللي في شط لبحر من كثرتها ما تتحسبش. ¹³ و كلهم ماتوا و هما في الايمان, و ما نالوش لمور اللي وعد بيها الله, بالصح شافوها من بعيد و صدقوها و حياوها, و استعرفوا باللي راهم غرباء و ما همش دايمين في الدنيا. ¹⁴ و اللي يقولوا كيما هكا يبينوا باللي راهم طالبين وطن. ¹⁵ و لو كان جاو يهدروا على لبلاد اللي خرجوا منها, كانت عندهم الفرصة باه يرجعولها. ¹⁶ بالصح همّا يرجاو وطن اخر خير وخير, وطن سماوي. على هذا الشيء الله ما يحشمش بيهم كي يكون هو الاله تاعهم. و هو اللي وجّد لهم مدينة. ¹⁷ بالايمان قدم ابراهيم وليدو لفريد اسحاق ذبيحة نهار اللي جربو الله. قدم هاذاك اللي اعطاه الله العاهد, ¹⁸ اللي قال عليه: "من اسحاق يكون ليك نسل". ¹⁹ على خاطر عارف باللي الله قادر يعاود يحييه من بين الموتى, و على هذا رجع ليه وليدو اسحاق, و هذا الشيء فيه معنى. ²⁰ بالايمان اسحاق بارك يعقوب و عيسو من جوايه ياسر. ²¹ و بالايمان يعقوب قبل ما يموت بارك ولاد يوسف في زوز كل واحد وحدو, و سجد لله و هو متكي على العكاز تاعو. ²² و بالايمان يوسف و هو قاعد يموت ذكر خروج بني اسرائيل من ارض مصر و وصاهم باه يهزوا لعظام تاعو معاهم. ²³ و بالايمان موسى, بعد ما ولد خزنوه والديه ثلاثة شهر, على خاطر شافوه طفل مليح, و ما خافوش من امر السلطان. ²⁴ و موسى كي كبر ما حبش يتسمى ولد بنت فرعون, ²⁵ وخاير يكون في الذل مع شعب الله و ما يكونش في المتعة اللي مادومش تاع المعصية, ²⁶ عندو هو العار تاع المسيح اغنى من كنوز مصر, على خاطر كان يشوف في الاجر اللي يسنى فيه. ²⁷ و بالايمان خلى مصر وما كانش خايف من السلطان لا يغضب عليه, و عقد العزم و ثبت روحو, تقول عليه كان يشوف في حوايج ما تشوفهاش العين. ²⁸ بالايمان دار الفصح و رش الدم باه كي يعدي ملاك الموت اللي يهلك كل بدري, ما يمس حتى واحد من بني اسرائيل. ²⁹ بالايمان عداو في لبحر تقول عليه بر, و كي حبوا المصريين يلحوقهم غرقوا. ³⁰ بالايمان طاحت لسوار تاع اريحا بعد ما طافوا عليها سبعة ايام. ³¹ بالايمان منعت راحاب الزانية من لهلاك اللي لحق المذنبين, كي ضيفت عندها الجواسيس في زوز. ³² واش نزيد نقول ثاني؟ ما يكفيش الوقت كان خبرتكم على جدعون, و باراق, و شمشون, و يفتاح, و داود, و صموئيل, و لنبياء, ³³ اللي بالايمان قهروا مماليك, داروا العدل, و نالوا وعود الله, و سدوا للصيودة فوامهم, ³⁴ طفاو قوة النار, و منعوا من السيف, و تقووا من الضعف, و ولاو في الحرب ابطال, و غلبوا جيوش البرانية. ³⁵ نساء رجعوا اللي ماتولهم بالقيامة. و اخرين تعذبوا و ما رضاوش يمنْعوا ارواحهم على خاطر حابين ينالوا قيامة اخرى خير. ³⁶ و اخرين قاساو العار و الجلد, و سلاسل وحباس, ³⁷ ترجموا, قصوهم بالمنشار, نحاو لهم روسهم تشردوا في البلدان هاربين في جلود لغنم ولمعيز محرومين مقهورين مظلومين, ³⁸ هاذي الدنيا ما تستاهلش وحايد كيما هما. هاملين في الصحاري و في الجبال ولمغاغر و الكيفان. ³⁹ هاذوك الكل مشهود ليهم بالايمان, ما نالوش العاهد, ⁴⁰ على خاطر وجّد لنا احنا ما خير, و راد الله باه ما يتكملوش غير بينا.